ಮಳೆ ಕೊರತೆಯಿಂದ ಭತ್ತ ಕೃಷಿಗೆ ಹಿನ್ನಡೆ

ಹಬ್ಬಹರಿದಿನಗಳೊಂದಿಗೆ ಇಲ್ಲಿನ ಕೃಷಿ ಬೆಸೆದುಕೊಂಡಿದೆ. ಅದರಲ್ಲಿಯೂ ತಾಲೂಕಿನ ಗ್ರಾಮೀಣ ಭಾಗದಲ್ಲಿ ಭತ್ತದ ಕೃಷಿ ಅನಾದಿ ಕಾಲದಿಂದ ಮಳೆ ಆಧಾರಿತವಾಗಿ ನಡೆದುಕೊಂಡು ಬಂದಿದೆ. ಆದರೆ ಈ ವರ್ಷ ಮಳ ಕೊರತೆ ಎದುರಾಗಿದ್ದು, ಜನವರಿಯಿಂದ ಇಲ್ಲಿಯವರೆಗೆ 787.52 ಮಿ.ಮೀ. ಮಳೆಯಾಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ 1,754.40 ಮಿ.ಮೀ. ಮಳೆಯಾಗಿತ್ತು. ಕಳೆದ ವರ್ಷಕ್ಕೆ ಹೋಲಿಸಿದರೆ ಸುಮಾರು 967.88 ಮಿ.ಮೀ ಮಳೆ ಕೊರತೆ ತಾಲೂಕಿನಲ್ಲಿ ಎದುರಾಗಿದೆ.

ವಾಡಿಕೆ ಪ್ರಕಾರ ಈ ಭಾಗದ ರೈತರು ಪ್ರತಿ ವರ್ಷ ಜೂನ್ ಅಂತ್ಯ ಹಾಗೂ ಜುಲೈ ಆರಂಭಿಕ ಹಂತದಲ್ಲಿ ಬರುವ ಉತ್ತಮ ಮಳೆಗೆ ಕೃಷಿ ಭೂಮಿಯನ್ನು ಉಳುಮೆ ಮಾಡಿ ಭತ್ತದ ಸಸಿ ಮಡಿಗಳನ್ನು ಸಿದ್ಧಪಡಿಸುತ್ತಿದ್ದರು. ಆದರೆ ಈ ಬಾರಿ ಮಳೆ ಕೊರತೆಯಿಂದ ಸಸಿ ಮಡಿ ತಯಾರಿಗೆ ಭಾರಿ ಹಿನ್ನಡೆಯಾಗಿದ್ದು, ಕೆಲವು ಕಡೆ ಇತ್ತೀಚೆಗೆ ಬಿತ್ತನೆ ಕಾರ್ಯ ಆರಂಭ ಮಾಡಿದ್ದಾರೆ.

ತಾಲೂಕಿನ ಕೆಲವು ರೈತರು ಹಳೆಯ ಕಾಲದಿಂದ ಬಂದ ಬಿಕೆಬಿ, ಇಂಟಾನ್, ಬಿಳಿಯಾ, ದೊಡ್ಡಿ, ರಾಶಿ, ಕ್ಯಾತರೆ ದೊಡ್ಡಿ, ಸಣ್ಣ ಜೀರಿಗೆಯಂತಹ ದೀರ್ಘಾವಧಿ ತಳಿಯ ಭತ್ತದ ಸಸಿ ಮಡಿಯನ್ನು ಜೂನ್‌ನಲ್ಲಿ ತಯಾರಿಸಿ ಈ ಸಮಯದಲ್ಲಿ ನಾಟಿ ಕಾರ್ಯ ಆರಂಭಿಸುತ್ತಿದ್ದರು. ಆದರೆ ಈ ಬಾರಿ ನಿರೀಕ್ಷಿತ ಪ್ರಮಾಣದಲ್ಲಿ ಮಳೆಯಾಗದ ಕಾರಣ ಬಹುತೇಕ ರೈತರಿಗೆ ಸಸಿಮಡಿ ಮಾಡಲು ಸಾಧ್ಯವಾಗಿಲ್ಲ. ಜುಲೈ ಅಂತ್ಯವಾಗುತ್ತಿದ್ದರೂ ಉರಿಬಿಸಿಲು ಮುಂದುವರಿದಿದ್ದು ಗದ್ದೆಗಳಲ್ಲಿ ಸಂಗ್ರಹವಾಗಿದ್ದ ನೀರೂ ಸಹ ಬತ್ತಿ ಹೋಗುತ್ತಿದೆ. ಜಲಮೂಲಗಳಲ್ಲೂ ನೀರಿನ ಪ್ರಮಾಣ ಕಡಿಮೆಯಾಗುತ್ತಿದೆ. ತಾಲೂಕಿನ ಕೆಲವು ಕಡೆಗಳಲ್ಲಿ ನೀರಿನ ತೇವಾಂಶ ಉಳಿದಿರುವ ಕೃಷಿ ಭೂಮಿಗಳಲ್ಲಿ ಮಾತ್ರ ಉಳುಮೆ, ಗದ್ದೆ ಸಿದ್ಧತೆ ಹಾಗೂ ಸಸಿಮಡಿ ಕಾರ್ಯಗಳು ನಡೆಯುತ್ತಿದೆ. ಮಳೆ ಸಮರ್ಪಕವಾಗಿ ಸುರಿಯದಿದ್ದರೆ ದೀರ್ಘಾವಧಿ ತಳಿಗಳ ನಾಟಿ ಮತ್ತಷ್ಟು ವಿಳಂಬವಾಗುವ ಸಾಧ್ಯತೆ ಇದೆ. ಇದರಿಂದ ಇಳುವರಿ ಕುಸಿತವಾಗುವ ಆತಂಕವೂ ಎದುರಾಗಿದೆ.

ವಾಡಿಕೆ ಪ್ರಕಾರ ಜುಲೈ ಅಂತ್ಯ ಹಾಗೂ ಆಗಸ್ಟ್ ಆರಂಭದಲ್ಲಿ ಬಹುತೇಕ ನಾಟಿ ಕೆಲಸ ಪೂರ್ಣಗೊಳ್ಳಬೇಕಿತ್ತು. ಆದರೆ ಮಳೆ ಕೊರತೆಯಿಂದ ಸಸಿ ಮಡಿ ತಯಾರಿಕೆ ಈಗ ಆರಂಭವಾಗಿದೆ. ಗದ್ದೆ ಉಳುಮೆ ಹಾಗೂ ಬಿತ್ತನೆಗೆ ಸಹಕಾರಿಯೆಂಬಂತೆ ಜುಲೈ ಮೊದಲ ವಾರದಲ್ಲಿ ಉತ್ತಮ ಮಳೆಯಾಗಿತ್ತು. ನಂತರದ ದಿನಗಳಲ್ಲಿ ಮಳೆ ಪ್ರಮಾಣ ಕಡಿಮೆಯಾಗುತ್ತ ಬಂದು ಬಿಸಿಲಿನ ವಾತಾವರಣ ಆರಂಭವಾಯಿತು. ಸಸಿ ಮಡಿಗಳಿಗೆ ನಿರಂತರ ನೀರನ್ನು ಕಟ್ಟಿ ಬೆಳೆಸಲು ಸಾಧ್ಯವಿಲ್ಲ. ಹಳೆಯ ನೀರು ಹೊರಬಿಟ್ಟು ಹೊಸ ನೀರನ್ನು ಗದ್ದೆಗೆ ಸೇರಿಸುತ್ತ ಸಸಿ ಮಡಿಯ ಬೆಳವಣಿಗೆ ಮಾಡುವುದು ವಾಡಿಕೆ. ಇಲ್ಲವಾದಲ್ಲಿ ಸಸಿ ಮಡಿಯ ತಳಭಾಗದಲ್ಲಿ ಪಾಚಿ ಕಟ್ಟಲು ಆರಂಭವಾಗುತ್ತದೆ. ಸದ್ಯದ ಮಟ್ಟಿಗೆ ಕೆಲವು ರೈತರು ಕೆರೆಯಿಂದ ನೀರನ್ನು ಪೂರೈಕೆ ಮಾಡುತಿದ್ದರೆ, ಇನ್ನೂ ಕೆಲವು ರೈತರು ಬಾವಿಯ ನೀರನ್ನು ಪೈಪ್‌ಗಳ ಮೂಲಕ ಹರಿಸಿ ಸಸಿ ಮಡಿ ಬೆಳೆಸಲು ಹರಸಾಹಸ ಪಡುತಿದ್ದಾರೆ.

ಕೆಲವು ದಿನಗಳ ಹಿಂದೆ ಮೂರು ದಿನ ಉತ್ತಮ ಮಳೆಯಾಗಿದ್ದು ತಾಲೂಕಿನ ಕೆಲವು ಭಾಗದ ಕೆರೆ, ತೋಡು, ಹಳ್ಳಗಳಲ್ಲಿ ನೀರಿನ ಪ್ರಮಾಣ ಹೆಚ್ಚಿದೆ. ಸಣ್ಣ ಹಳ್ಳ, ಕೊಳ್ಳ ಹಾಗೂ ತೊರೆಗಳಲ್ಲೂ ನೀರಿನ ಹರಿವು ಹೆಚ್ಚಾಗಿದ್ದು ನೀರಾವರಿ ಸೌಲಭ್ಯ ಇರುವ ಪ್ರದೇಶಗಳಲ್ಲಿ ರೈತರು ಕೃಷಿ ಚಟುವಟಿಕೆ ವೇಗಗೊಳಿಸಿದ್ದಾರೆ. ಹಲವು ಗ್ರಾಮಗಳಲ್ಲೂ ಕಳೆದ ಕೆಲವು ದಿನಗಳಲ್ಲಿ ಉತ್ತಮ ಮಳೆಯಾಗಿದ್ದು, ಮಳೆಯ ತೀವ್ರತೆ ಕಡಿಮೆಯಾಗುತ್ತಿದ್ದಂತೆ ರೈತರು ಗದ್ದೆ ಉಳುಮೆ ಮತ್ತು ನಾಟಿಗೆ ಸಿದ್ಧತೆ ಆರಂಭಿಸಿದ್ದಾರೆ. ಉತ್ತಮ ಮಳೆ ಮುಂದುವರಿದರೆ ಕೃಷಿ ಚಟುವಟಿಕೆ ಇನ್ನು ಚುರುಕುಗೊಳ್ಳುವ ನಿರೀಕ್ಷೆ ಇದೆ.

ತಾಲೂಕಿನಲ್ಲಿ ಮಳೆಯ ಕೊರತೆಯಿಂದ ಒಂದೆಡೆ ರೈತರು ಸಂಕಷ್ಟಕ್ಕೆ ಸಿಲುಕಿದ್ದರೆ, ಮತ್ತೊಂದೆಡೆ ಉತ್ತಮ ಮಳೆಯಾದ ಪ್ರದೇಶಗಳಲ್ಲಿ ಕೃಷಿ ಚಟುವಟಿಕೆ ಬಿರುಸಿನಿಂದ ಸಾಗುತ್ತಿವೆ. ಮುಂದಿನ ಕೆಲವೇ ದಿನಗಳಲ್ಲಿ ಉತ್ತಮ ಮಳೆಯಾದರೆ ಮಾತ್ರ ಭತ್ತದ ನಾಟಿ ಸಾಮಾನ್ಯ ಸ್ಥಿತಿಗೆ ಮರಳುವ ಸಾಧ್ಯತೆ ಇದೆ. ಇಲ್ಲವಾದರೆ ಈ ವರ್ಷದ ಭತ್ತ ಉತ್ಪಾದನೆ ಪ್ರಮಾಣದ ಮೇಲೂ ಪರಿಣಾಮ ಬೀಳುವ ಆತಂಕ ರೈತರಲ್ಲಿ ಮನೆ ಮಾಡಿದೆ.