ಮಹಿಳೆಯ ಪತ್ತೆಗೆ ಅಧ್ಯಾತ್ಮದ ಮೊರೆ ಹೋದ ಕುಡಿಯ ಜನಾಂಗ

ಕೊಡಗಿನ ರಮಣೀಯ ಸ್ಥಳದಲ್ಲಿ ಒಂದಾದ ಕಕ್ಕಬ್ಬೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಗೆ ಒಳಪಟ್ಟ ಯಾವಕಪಾಡಿ ಗ್ರಾಮದ ತಡಿಯಂಡಮೊಳ್ ಬೆಟ್ಟಕ್ಕೆ ಶುಕ್ರವಾರ ಟ್ರೆಕ್ಕಿಂಗ್  ತೆರಳಿದ್ದ ಕೇರಳದ ಶರಣ್ಯ(35) ಹಿಂತಿರುಗದೆ ನಾಪತ್ತೆಯಾಗಿರುವ ಹಿನ್ನೆಲೆಯಲ್ಲಿ ಶರಣ್ಯ ಯಾವುದೇ ತೊಂದರೆಗೊಳಗಾಗದೆ ಮರಳಿ ಬರುವಂತಾಗಲಿ ಎಂದು ಅಲ್ಲಿಯ ಕುಡಿಯ ಜನಾಂಗದವರು ಶನಿವಾರ ತಮ್ಮ ಕುಟುಂಬದ ದೈವಗಳಲ್ಲಿ ವಿಶೇಷ ಪ್ರಾರ್ಥಿಸಿ, ಹರಕೆ ಮಾಡಿಕೊಂಡಿದ್ದಾರೆ.

ಯವಕಪಾಡಿ ಗ್ರಾಮದ ಕೋಳಿಂದ ಕುಡಿಯ ಕುಟುಂಬಸ್ಥರು ತಮ್ಮ ಐನ್‌ಮನೆಯಲ್ಲಿ ಸೇರಿ ಕುಡಿಯರ ಕುಲದೈವವಾದ ಮಲೆ ತಮ್ಮಚ್ಚನಿಗೆ ಮತ್ತು ಕರಿ ಚಾಮುಂಡಿ, ಪನ್ನಗಾಲ ತಮ್ಮೆ, ಇಗ್ಗುತ್ತಪ್ಪ, ದೈವ ದೇವರುಗಳಿಗೆ ವಿಶೇಷ ಪ್ರಾರ್ಥನೆಯನ್ನು ಸಲ್ಲಿಸಿ ನಾಪತ್ತೆಯಾದ ಶರಣ್ಯ ಹಾಗೂ ಹುಡುಕಲು ಅರಣ್ಯದ ಒಳಗೆ ತೆರಳುವವರಿಗೆ ಯಾವುದೇ ಅಡ್ಡಿ, ಆತಂಕಗಳು ಬಾರದಂತೆ ಕುಟುಂಬದ ಪಟ್ಟಿದಾರ ಕೆ.ಎ.ಚಿನ್ನಪ್ಪ ಎಲ್ಲರ ಪರವಾಗಿ ವಿಶೇಷ ಪ್ರಾರ್ಥನೆ ಮಾಡಿದರು.

ಗ್ರಾಮದ ದೇವರಾದ ಪನ್ನಗಾಲ ತಮ್ಮೆ ಹಬ್ಬಕ್ಕೆ ಶುಕ್ರವಾರ ಕಟ್ಟುಬಿದ್ದಿದ್ದು ಈ ಸಂದರ್ಭದಲ್ಲಿ ಗ್ರಾಮಸ್ಥರು ಯಾರೂ ಅರಣ್ಯದ ಒಳಗೆ ಹೋಗುವುದಾಗಲಿ, ಮರಗಿಡಗಳನ್ನು ಕಡಿಯುವುದಾಗಲಿ, ಶಬ್ದ ಮಾಡುವುದಾಗಲಿ ಮಾಡುವಂತಿಲ್ಲ. ಈ ನಿರ್ಬಂಧ (ಆಚರಣೆ) ಕುಡಿಯ ಜನಾಂಗದಲ್ಲಿ ಇದೆ. ಯಾವುದೇ ತೊಂದರೆಗಳಾಗದೆ ಇರಲೆಂದು ತಾವು ನಂಬಿದ ದೇವರಿಗೆ ಸೇಂದಿ, ಹಂದಿ, ಕೋಳಿ ಹರಕೆ ರೂಪದಲ್ಲಿ ಕೊಡುವುದಾಗಿ ಹರಕೆ ಮಾಡಿಕೊಂಡಿದ್ದೇವೆ ಎಂದು ಮಡಿಕೇರಿ ತಾಲೂಕು ಬುಡಕಟ್ಟು ಕೃಷಿಕರ ಸಂಘದ ಅಧ್ಯಕ್ಷ ಕುಡಿಯರ ಮುತ್ತಪ್ಪ ತಿಳಿಸಿದ್ದಾರೆ.

ಮುಂದುವರಿದ ಶೋಧ: ಗುರುವಾರದಿಂದ ನಾಪತ್ತೆಯಾದ ಬೆಟ್ಟಕ್ಕೆ ಟ್ರಕ್ಕಿಂಗ್ ತೆರಳಿದ ಮಹಿಳೆ ಶರಣ್ಯಳ ಹುಡುಕಾಟ ಮೂರು ದಿನಗಳಿಂದ ಮುಂದುವರಿದಿದ್ದು ಶುಕ್ರವಾರ ಸಂಜೆವರೆಗೆ ಯಾವುದೇ ಸುಳ್ಳು ದೊರೆತಿರಲಿಲ್ಲ. ಶನಿವಾರ ಎಎನ್‌ಎಫ್ ವಿಶೇಷ  ಪಡೆಯ ಸುಮಾರು 20 ಸದಸ್ಯರು, ಗ್ರಾಮಸ್ಥರು, ಭಾಗಮಂಡಲ ವಲಯ ಅಧಿಕಾರಿ ಶಂಕರ, ಪೊಲೀಸ್ ಠಾಣಾ ಅಧಿಕಾರಿ ರಾಘವೇಂದ್ರ ಹಾಗೂ ಸಿಬ್ಬಂದಿ ಸ್ಥಳದಲ್ಲಿ ಡ್ರೋನ್ ಸಹಿತ ಬೀಡು ಬಿಟ್ಟಿದ್ದು ಕಾರ್ಯಾಚರಣೆ ಮುಂದುವರಿದಿದೆ. ಶರಣ್ಯಳ ಅಣ್ಣ ಶಾಮ್ ಜತೆಯಲ್ಲಿದ್ದಾರೆ.