ಸಾಲದ ಯಮಪಾಶಕ್ಕೆ ಕ್ಯಾನ್ ಅದಾಲತ್ ಮುಕ್ತಿ

ಕಾಫಿ ತೋಟವೊಂದರ ನೋಟ (ಸಾಂದರ್ಭಿಕ ಚಿತ್ರ)

Published on:

01 Aug 2026, 9:49 am

ಮಡಿಕೇರಿ:

ಬ್ಯಾಂಕ್ ಸುಸ್ತಿದಾರ ಕಾಫಿ ಬೆಳೆಗಾರರಿಗೆ ಅನುಕೂಲ ಮಾಡಿಕೊಡುವ ನಿಟ್ಟಿನಲ್ಲಿ ಕೆನರಾ ಬ್ಯಾಂಕ್ ಕ್ಯಾನ್ ಅದಾಲತ್‌ಗೆ ದಿನಾಂಕ ನಿಗದಿ ಮಾಡಿದೆ. ಸರ್ಫೇಸಿ (ಹಣಕಾಸು ಆಸ್ತಿಗಳ ಭದ್ರತೀಕರಣ ಮತ್ತು ಪುನರ್ನಿರ್ಮಾಣ ಹಾಗೂ ಭದ್ರತಾ ಹಿತಾಸಕ್ತಿ ಜಾರಿ ಕಾಯ್ದೆ) ಕಾಯಿದೆಯಡಿ ಕಾಫಿ ತೋಟಗಳ ಹರಾಜಿನ ಆತಂಕದಲ್ಲಿ ಇರುವವರಿಗೆ ಇದು ಒಂದಿಷ್ಟು ನಿರಾಳತೆ ಮೂಡಿಸಿದೆ. ಜಿಲ್ಲೆಯ 3 ಶಾಖೆಗಳಲ್ಲಿ ಆ.3ರಿಂದ ಆ.5ರ ತನಕ ಒನ್ ಟೈಮ್ ಸೆಟಲ್‌ಮೆಂಟ್‌ಗೆ ಅವಕಾಶ ಕಲ್ಪಿಸಲಾಗಿದ್ದು, ಇದನ್ನು ಬಳಸಿಕೊಳ್ಳುವ ಮೂಲಕ ಬೆಳೆಗಾರರು ತಮ್ಮ ತೋಟಗಳನ್ನು ತಮ್ಮ ಬಳಿಯೇ ಉಳಿಸಿಕೊಳ್ಳಬಹುದಾಗಿದೆ.

ಕೊಡಗಿನ ಕಾಫಿ ಬೆಳೆಗಾರರ ತೋಟಗಳನ್ನು ಕೃಷಿ ಭೂಮಿ ಎಂದೇ ಪರಿಗಣಿಸಿ ಸರ್ಫೇಸಿ ಕಾಯಿದೆಯಿಂದ ಕಾಯಂ ವಿನಾಯಿತಿ ನೀಡಬೇಕು ಎಂಬುದು ಬೆಳೆಗಾರರು ಮತ್ತು ರೈತ ಸಂಘಟನೆಗಳು ಬಹಳ ಹಿಂದಿನಿAದಲೇ ಒತ್ತಾಯ ಮಾಡಿಕೊಂಡು ಬರುತ್ತಿವೆ. ಆದರೆ ಇದಕ್ಕೆ ತಾರ್ಕಿಕ ಅಂತ್ಯ ಕಾಣದ ಹಿನ್ನೆಲೆಯಲ್ಲಿ ಬ್ಯಾಂಕ್ ಸುಸ್ತಿದಾರ ಕಾಫಿ ಬೆಳೆಗಾರರು ಸಾಲದ ಸುಳಿಯಲ್ಲಿ ಸಿಲುಕಿ ತೋಟದ ಜಪ್ತಿ ಮತ್ತು ಹರಾಜು ಭೀತಿ ಎದುರಿಸುವಂತಾಗಿದೆ. ಜಿಲ್ಲೆಯ ಸ್ವಾಭಿಮಾನಿ ಕಾಫಿ ಬೆಳೆಗಾರರು ಸಾಲ ಮರುಪಾವತಿ ಮಾಡುವುದಿಲ್ಲ ಎಂದು ಎಲ್ಲಿಯೂ ಹೇಳಿಲ್ಲ. ಆದರೆ ಕಾಫಿ ಉದ್ಯಮದ ಪ್ರಸ್ತುತ ಪರಿಸ್ಥಿತಿ ಸಾಲ ಮರುಪಾವತಿಗೆ ಅಡ್ಡಿಯಾಗಿದೆ.

ಕೊಡಗಿನ ಅರ್ಥವ್ಯವಸ್ಥೆಯ ಬೆನ್ನೆಲುಬಾಗಿರುವ ಕಾಫಿ ಉದ್ಯಮ ಕಳೆದ ಕೆಲವು ವರ್ಷಗಳಿಂದ ಹವಾಮಾನ ವೈಪರೀತ್ಯ, ಕೀಟಬಾಧೆ, ರಸಗೊಬ್ಬರಗಳ ಬೆಲೆ ಏರಿಕೆ ಹಾಗೂ ಸೂಕ್ತ ಬೆಲೆ ಸಿಗದೆ ತೀವ್ರ ಸಂಕಷ್ಟದಲ್ಲಿದೆ. ಇಂಥ ಸಂದರ್ಭದಲ್ಲಿ ಸಾಲದ ಸುಳಿಯಲ್ಲಿ ಸಿಲುಕಿರುವ ಬೆಳೆಗಾರರಿಗೆ ಸರ್ಫೇಸಿ ಕಾಯಿದೆ ಯಮಪಾಶದಂತೆ ಪರಿಣಮಿಸಿದೆ.

ಸರ್ಫೇಸಿ ಕಾಯಿದೆ ಪ್ರಕಾರ ಬ್ಯಾಂಕುಗಳಿAದ ಸಾಲ ಪಡೆದು ಅದನ್ನು ಮರುಪಾವತಿಸದೆ ಖಾತೆ ಸುಸ್ತಿಯಾದಾಗ ಬ್ಯಾಂಕುಗಳು ಯಾವುದೇ ನ್ಯಾಯಾಲಯ ಅಥವಾ ಟ್ರಿಬ್ಯೂನಲ್ ಮೆಟ್ಟಿಲೇರದೆ, ಸಾಲಕ್ಕಾಗಿ ಅಡಮಾನ ಇಟ್ಟ ಆಸ್ತಿಯನ್ನು ನೇರವಾಗಿ ಮುಟ್ಟುಗೋಲು ಹಾಕಿಕೊಳ್ಳಲು ಅಥವಾ ಹರಾಜು ಹಾಕಲು ಈ ಕಾಯಿದೆ ಬ್ಯಾಂಕುಗಳಿಗೆ ಅಧಿಕಾರ ನೀಡುತ್ತದೆ. ಸಾಲ ಮರುಪಾವತಿಯಾಗದಿದ್ದಾಗ ಬ್ಯಾಂಕ್ ಸಾಲಗಾರನಿಗೆ 60 ದಿನಗಳ ಕಾಲಾವಕಾಶದ ನೋಟಿಸ್ ನೀಡುತ್ತದೆ. ಈ ಅವಧಿಯಲ್ಲಿ ಸಾಲ ತೀರಿಸದಿದ್ದರೆ, ಜಮೀನು, ಮನೆ ಸೇರಿದಂತೆ ಅಡಮಾನವಿಟ್ಟ ಆಸ್ತಿಯನ್ನು ಬ್ಯಾಂಕ್ ತನ್ನ ವಶಕ್ಕೆ ತೆಗೆದುಕೊಂಡು ಹರಾಜು ಹಾಕಬಹುದು.

ಸಾಮಾನ್ಯವಾಗಿ ಕೃಷಿ ಭೂಮಿಗೆ ಸರ್ಫೇಸಿ ಕಾಯಿದೆಯಿಂದ ವಿನಾಯಿತಿ ಇದೆ ಕಾನೂನು ಪ್ರಕಾರ ಕೃಷಿ ಭೂಮಿಯನ್ನು ಜಪ್ತಿ ಮಾಡುವಂತಿಲ್ಲ. ಆದರೆ, ಕೊಡಗಿನಲ್ಲಿ ಕಾಫಿ ತೋಟವನ್ನು ಕೃಷಿ ಭೂಮಿ ಎಂದು ಪರಿಗಣಿಸದಿರುವುದೇ ಕಾಫಿ ಬೆಳೆಗಾರರಿಗೆ ಸರ್ಫೇಸಿ ಕಾಯಿದೆ ದೊಡ್ಡ ಕಂಟಕವಾಗಲು ಕಾರಣವಾಗಿದೆ. ಬ್ಯಾಂಕುಗಳು ಕಾಫಿ, ಅಡಿಕೆ, ಟೀ ತೋಟಗಳನ್ನು ವಾಣಿಜ್ಯ ಬೆಳೆ ಅಥವಾ ಕೃಷಿಯೇತರ ಆಸ್ತಿ ಎಂದು ಪರಿಗಣಿಸಿ, ಕೃಷಿ ವಿನಾಯಿತಿ ವ್ಯಾಪ್ತಿಯಿಂದ ಹೊರಗಿಟ್ಟು ಸರ್ಫೇಸಿ ನೋಟಿಸ್ ಜಾರಿ ಮಾಡುತ್ತಿವೆ.

ಸತತ ಪ್ರವಾಹ, ಕಾಯಿ ಕೊಳೆ ರೋಗ ಮತ್ತು ಹವಾಮಾನ ವೈಪರೀತ್ಯದಿಂದಾಗಿ ಕಾಫಿ ಬೆಳೆಗಾರರು ನಿರೀಕ್ಷಿತ ಆದಾಯ ಗಳಿಸಲು ಸಾಧ್ಯವಾಗದೆ ಸಾಲ ಮರುಪಾವತಿಸಲು ವಿಫಲರಾಗಿದ್ದಾರೆ. ಇಂಥ ಪರಿಸ್ಥಿತಿಯಲ್ಲಿ ಬ್ಯಾಂಕುಗಳು ಏಕಾಏಕಿ ನೋಟಿಸ್ ನೀಡಿ, ತೋಟಗಳನ್ನು ಹರಾಜು ಹಾಕಲು ಮುಂದಾಗುತ್ತಿರುವುದರಿAದ ಬೆಳೆಗಾರರನ್ನು ಬೀದಿಗೆ ತರುವಂತಾಗುತ್ತಿದೆ. ತಲೆತಲಾಂತರದಿAದ ಬಂದ ತೋಟಗಳು ಕೈತಪ್ಪಿ ಹೋಗುವ ಭೀತಿಯಿಂದ ಕೊಡಗಿನ ಅನೇಕ ಸಣ್ಣ ಮತ್ತು ಅತಿ ಸಣ್ಣ ಬೆಳೆಗಾರರು ತೀವ್ರ ಮಾನಸಿಕ ಒತ್ತಡಕ್ಕೆ ಒಳಗಾಗಿದ್ದಾರೆ.

ಕೊಡಗಿನಲ್ಲಿ ಕೆನರಾ ಬ್ಯಾಂಕ್ ಮತ್ತು ಯೂನಿಯನ್ ಬ್ಯಾಂಕ್ ಕಾಫಿ ಬೆಳೆಗಾರರಿಗೆ ದೊಡ್ಡ ಪ್ರಮಾಣದಲ್ಲಿ ಸಾಲ ನೀಡಿವೆ. ಸರ್ಫೇಸಿ ಕಾಯಿದೆ ಅಡಿ ಕಾಫಿ ತೋಟಗಳನ್ನು ಹರಾಜು ಹಾಕು ಪ್ರಕ್ರಿಯೆಯಲ್ಲಿ ಈ ಎರಡೂ ಬ್ಯಾಂಕ್‌ಗಳೇ ಮುಂದಿವೆ. ಇಂಥ ಸಂದರ್ಭದಲ್ಲಿ ಕಾಫಿ ಬೆಳೆಗಾರರ ಹಿತ ಕಾಯುವ ಸಲುವಾಗಿ ಮಧ್ಯಪ್ರವೇಶಿಸಿರುವ ಭಾರತೀಯ ಕಾಫಿ ಮಂಡಳಿ ಕೇಂದ್ರ ಸರ್ಕಾರ ಮತ್ತು ಸಂಬAಧಿಸಿದ ಬ್ಯಾಂಕ್‌ಗಳ ಪ್ರಮುಖರ ಜತೆ ನಿರಂತರ ಸಂಪರ್ಕದಲ್ಲಿದ್ದು ಕಾಫಿ ತೋಟಗಳು ಬೆಳೆಗಾರರ ಕೈ ತಪ್ಪಿ ಹೋಗದಂತೆ ಸತತ ಪ್ರಯತ್ನ ನಡೆಸುತ್ತಿದೆ.

ಇಂಥ ಒಂದು ಪ್ರಯತ್ನದ ಭಾಗವಾಗಿ ಕೆನರಾ ಬ್ಯಾಂಕ್ ಈಗ ಕ್ಯಾನ್ ಅದಾಲತ್ ನಡೆಸಲು ದಿನಾಂಕ ನಿಗದಿ ಮಾಡಿದೆ. ಬ್ಯಾಂಕ್ ಮತ್ತು ಸಾಲಗಾರರ ನಡುವಿನ ವ್ಯಾಜ್ಯಗಳನ್ನು ನ್ಯಾಯಾಲಯದ ಹೊರಗಡೆಯೇ ಸೌಹಾರ್ದಯುತವಾಗಿ ಬಗೆಹರಿಸಿಕೊಳ್ಳಲು ಕೆನರಾ ಬ್ಯಾಂಕ್‌ನ ಕ್ಯಾನ್ ಅದಾಲತ್ ಸಹಕಾರಿ ಆಗಲಿದೆ ಎನ್ನುವ ನಿರೀಕ್ಷೆಯಿದ್ದು ಬ್ಯಾಂಕ್‌ನ ಒನ್ ಟೈಂ ಸೆಟಲ್‌ಮೆಂಟ್ ಬೆಳೆಗಾರರಿಗೆ ಅನೂಕೂಲ ಆಗಲಿದೆ ಎನ್ನಲಾಗುತ್ತಿದೆ.

ಕ್ಯಾನ್ ಅದಾಲತ್‌ನಲ್ಲಿ ಭಾಗವಹಿಸುವ ಬೆಳೆಗಾರರಿಗೆ ಬ್ಯಾಂಕ್ ತಮ್ಮ ನಿಯಮಾವಳಿಗಳಂತೆ ಬಡ್ಡಿ, ಚಕ್ರಬಡ್ಡಿ ಅಥವಾ ದಂಡದ ಮೊತ್ತದಲ್ಲಿ ವಿನಾಯಿತಿ ನೀಡುವ ಅವಕಾಶಗಳು ಇರುತ್ತದೆ. ಅಸಲು ಮತ್ತು ಕನಿಷ್ಠ ಬಡ್ಡಿಯನ್ನು ಪಾವತಿಸಿ ಸಾಲವನ್ನು ಸಂಪೂರ್ಣವಾಗಿ ಪಾವತಿ ಮಾಡಲು ವೇದಿಕೆ ಒದಗಿಸುತ್ತದೆ. ಬೆಳೆಗಾರರು ಕ್ಯಾನ್ ಅದಾಲತ್ ಮೂಲಕ ಸಾಲವನ್ನು ಸೌಹಾರ್ದಯುತವಾಗಿ ತೀರಾವಳಿ ಮಾಡಿಕೊಂಡರೆ, ಬ್ಯಾಂಕ್ ಜಾರಿ ಮಾಡಿರುವ ಸರ್ಫೇಸಿ ನೋಟಿಸ್, ತೋಟ ಹರಾಜು ಪ್ರಕ್ರಿಯೆ ಮತ್ತು ನ್ಯಾಯಾಲಯದ ವ್ಯಾಜ್ಯಗಳು ಕೂಡಲೇ ರದ್ದಾಗಲಿವೆ.

ಸಾಲ ತೀರಾವಳಿಯಾದ ನಂತರ ಬೆಳೆಗಾರರ ಖಾತೆಯು ಸಾಲಮುಕ್ತವಾಗುತ್ತದೆ. ಇದರಿಂದ ಅವರ ಸಿಬಿಲ್ ಸ್ಕೋರ್ ಸುಧಾರಿಸಿ, ಭವಿಷ್ಯದಲ್ಲಿ ಮತ್ತೆ ಕೃಷಿ ಚಟುವಟಿಕೆಗಳಿಗೆ ಹೊಸ ಸಾಲ ಪಡೆಯಲು ಹಾದಿ ಸುಗಮವಾಗುತ್ತದೆ. ಕೋರ್ಟ್, ಟ್ರಿಬ್ಯೂನಲ್ ಮೆಟ್ಟಿಲೇರಿ ವಕೀಲರ ಶುಲ್ಕ ತೆರುವುದು ತಪ್ಪುತ್ತದೆ. ಬೆಳೆಗಾರರು ನೇರವಾಗಿ ಬ್ಯಾಂಕ್ ಅಧಿಕಾರಿಗಳೊಂದಿಗೆ ಮಾತುಕತೆ ನಡೆಸಿ ಸ್ಥಳದಲ್ಲೇ ಸಮಸ್ಯೆ ಬಗೆಹರಿಸಿಕೊಳ್ಳಬಹುದಾಗಿದೆ. ಈ ನಿಟ್ಟಿನಲ್ಲಿ ಸುಸ್ತಿದಾರ ಕಾಫಿ ಬೆಳೆಗಾರರು ಕೆನರಾ ಬ್ಯಾಂಕ್‌ನ ಕ್ಯಾನ್ ಅದಾಲತ್ ನಂಥ ಏಕಕಾಲದ ಸಾಲ ತೀರಾವಳಿ ಯೋಜನೆಗಳ ಸೌಲಭ್ಯವನ್ನು ಸದ್ಬಳಕೆ ಮಾಡಿಕೊಳ್ಳಬಹುದಾಗಿದೆ.

ಈಗಾಗಲೇ ಬ್ಯಾಂಕುಗಳಲ್ಲಿ ಒನ್ ಟೈಮ್ ಸೆಟಲ್‌ಮೆಂಟ್ ಮೂಲಕ ರಿಯಾಯಿತಿ ದರದಲ್ಲಿ ಸಾಲ ಪಾವತಿಗೆ ಅವಕಾಶ ನೀಡಲಾಗಿತ್ತು. ಆದರೂ ಕೆಲವು ಬೆಳೆಗಾರರು ವೈಯಕ್ತಿಕ ಕಾರಣಗಳಿಂದ ಅವಕಾಶ ವಂಚಿತರಾಗಿದ್ದರು. ಹಾಗಾಗಿ ಮತ್ತೊಮ್ಮೆ, ಕೆನರಾ ಬ್ಯಾಂಕ್ ಕಾರ್ಯನಿರ್ವಾಹಕ ನಿರ್ದೇಶಕ ಹಾರ್ದಿಕ್ ಸಿಂಗ್ ಅಹ್ವಾಲಿಯ ಅವರನ್ನು ಕಾಫಿ ಮಂಡಳಿ ಅಧ್ಯಕ್ಷ ಎಂ.ಜೆ. ದಿನೇಶ್ ಖುದ್ದಾಗಿ ಭೇಟಿ ಮಾಡಿ ಕಾಫಿ ಬೆಳೆಗಾರರ ಸಮಸ್ಯೆಗಳನ್ನು ಗಮನಕ್ಕೆ ತಂದು, ಒನ್ ಟೈಮ್ ಸೆಟಲ್‌ಮೆಂಟ್‌ಗೆ ಅವಕಾಶ ನೀಡುವಂತೆ ಮನವಿ ಮಾಡಿದ್ದರು. ಈ ಹಿನ್ನೆಲೆಯಲ್ಲಿ ಈಗ ಮತ್ತೆ ಕ್ಯಾನ್ ಅದಾಲತ್‌ಗೆ ಅವಕಾಶ ಸಿಕ್ಕಿದೆ.

ಕೊಡಗಿನಲ್ಲಿ ಕುಶಾಲನಗರ ಶಾಖೆಯಲ್ಲಿ ಆ. 3ಕ್ಕೆ, ಗೋಣಿಕೊಪ್ಪಲು ಶಾಖೆಯಲ್ಲಿ ಆ. 4ಕ್ಕೆ ಹಾಗೂ ಮಡಿಕೇರಿ ಶಾಖೆಯಲ್ಲಿ ಆ.4 ಮತ್ತು 5ರಂದು ಕೆನರಾ ಬ್ಯಾಂಕ್ ಕ್ಯಾನ್ ಅದಾಲತ್ ನಿಗದಿಯಾಗಿದೆ.

ಈಗಾಗಲೇ ಬ್ಯಾಂಕುಗಳಲ್ಲಿ ಒನ್ ಟೈಮ್ ಸೆಟಲ್‌ಮೆಂಟ್ ಮೂಲಕ ರಿಯಾಯಿತಿ ದರದಲ್ಲಿ ಸಾಲ ಪಾವತಿಗೆ ಅವಕಾಶ ನೀಡಲಾಗಿತ್ತು. ಆದರೂ ಕೆಲವು ಬೆಳೆಗಾರರು ವೈಯಕ್ತಿಕ ಕಾರಣಗಳಿಂದ ಅವಕಾಶ ವಂಚಿತರಾಗಿದ್ದರು. ಹಾಗಾಗಿ ಮತ್ತೊಮ್ಮೆ, ಕೆನರಾ ಬ್ಯಾಂಕ್ ಕಾರ್ಯನಿರ್ವಾಹಕ ನಿರ್ದೇಶಕ ಹಾರ್ದಿಕ್ ಸಿಂಗ್ ಅಹ್ವಾಲಿಯ ಅವರನ್ನು ಖುದ್ದಾಗಿ ಭೇಟಿ ಮಾಡಿ ಕಾಫಿ ಬೆಳೆಗಾರರ ಸಮಸ್ಯೆಗಳನ್ನು ಗಮನಕ್ಕೆ ತಂದು, ಒನ್ ಟೈಮ್ ಸೆಟಲ್‌ಮೆಂಟ್‌ಗೆ ಅವಕಾಶ ನೀಡುವಂತೆ ಮನವಿ ಮಾಡಲಾಗಿತ್ತು. ನಮ್ಮ ಮನವಿಗೆ ಸ್ಪಂದಿಸಿದ ಅವರು ಕ್ಯಾನ್ ಅದಾಲತ್‌ಗೆ ಅವಕಾಶ ನೀಡಿದ್ದಾರೆ. ಈ ಅವಕಾಶವನ್ನು ಕಾಫಿ ಬೆಳೆಗಾರರು ಸದುಪಯೋಗ ಪಡಿಸಿಕೊಂಡು ಸಾಲದಿಂದ ಮುಕ್ತರಾಗಬೇಕೆಂದು ವಿನಂತಿ ಮಾಡುತ್ತೇನೆ.

— ಎಂ.ಜೆ. ದಿನೇಶ್, ಅಧ್ಯಕ್ಷ, ಭಾರತೀಯ ಕಾಫಿ ಮಂಡಳಿ

Bank