ಕುಶಾಲನಗರದಲ್ಲಿ ಎಲ್‌ಐಸಿ ಸಂಸ್ಥಾಪನಾ ದಿನಾಚರಣೆ

ಭಾರತೀಯ ಜೀವ ವಿಮಾ ನಿಗಮ ಕೋಟ್ಯಂತರ ಭಾರತೀಯರ ಜೀವಕ್ಕೆ ಭದ್ರತೆ ನೀಡುತ್ತಾ ದೇಶದ ಆರ್ಥಿಕತೆಯ ಬೆನ್ನೆಲುಬಾಗಿ ನಿಂತಿದೆ ಎಂದು ಎಲ್‌ಐಸಿ ಕುಶಾಲನಗರ ಶಾಖಾ ವ್ಯವಸ್ಥಾಪಕ ಎಸ್.ಬಿ. ಶಿವಪ್ರಸಾದ್ ಹೇಳಿದರು. ಇಲ್ಲಿನ ಎಲ್‌ಐಸಿ ಶಾಖಾ ಕಚೇರಿಯಲ್ಲಿ ಬುಧವಾರ ಆಯೋಜಿಸಲಾಗಿದ್ದ ಸಂಸ್ಥೆಯ 70ನೇ ಸಂಸ್ಥಾಪನಾ ದಿನಾಚರಣೆಯಲ್ಲಿ ವಿಮಾ ಸಪ್ತಾಹ ಕಾರ್ಯಕ್ರಮದ ಉದ್ದೇಶ ಕುರಿತು ಮಾತನಾಡಿದರು.

1956 ಸೆಪ್ಟೆಂಬರ್ 1 ರಂದು ಅಸ್ತಿತ್ವಕ್ಕೆ ಬಂದ ಎಲ್‌ಐಸಿ, ರಾಷ್ಟ್ರೀಕರಣಗೊಂಡು ಪಾಲಿಸಿದಾರರಿಗೆ 69 ವರ್ಷಗಳ ಸುದೀರ್ಘ ಸಾರ್ಥಕ ಸೇವೆಯನ್ನು ಪೂರೈಸಿ ಇದೀಗ 70ನೇ ವರ್ಷದ ವಸಂತಕ್ಕೆ ಪಾದಾರ್ಪಣೆ ಮಾಡಿದೆ. ಗ್ರಾಹಕರಿಗೆ ಸುಲಭ ಸೇವೆ ಒದಗಿಸಲು ಮೈ ಎಲ್ ಐ ಸಿ ಮೊಬೈಲ್ ಆಪ್ ಸೇರಿದಂತೆ ಹಲವು ಆಧುನಿಕ ತಂತ್ರಜ್ಞಾನಗಳನ್ನು ಸಂಸ್ಥೆ ಅಳವಡಿಸಿಕೊಂಡಿದೆ ಎಂದು ವಿವರ ನೀಡಿದರು.

ಇದೇ ಸಂದರ್ಭದಲ್ಲಿ ಹೊಸ ವಿಮಾ ಪಾಲಿಸಿಗಳಾದ ಜೀವನ್ ರಕ್ಷಾ ಮತ್ತು ಬೀಮಾ ಪ್ಲಾಟಿನಂ ಬಿಡುಗಡೆಗೊಳಿಸಿ ಮಾತನಾಡಿದ ಸುಂಟಿಕೊಪ್ಪದ ವಾಣಿಜ್ಯೋದ್ಯಮಿ ಎಡ್ವರ್ಡ್ ಜಾರ್ಜ್ ವಿಲಿಯಮ್, ಆರ್ಥಿಕ ಜೀವನ ಭದ್ರತೆ ಒದಗಿಸುವ ವಿಮಾ ಪಾಲಿಸಿಗಳು ನಮ್ಮ ಕುಟುಂಬಕ್ಕೆ ಆರ್ಥಿಕವಾಗಿ ದೊಡ್ಡ ಮಟ್ಟದ ನೆರವು ನೀಡುತ್ತವೆ ಎಂದರು.

ಕಾರ್ಯಕ್ರಮದಲ್ಲಿ ಎಲ್‌ಐಸಿಯ ಧ್ಯೇಯ, ಸಾಧನೆ ಹಾಗೂ ಸಮಾಜಕ್ಕೆ ನೀಡಿರುವ ಕೊಡುಗೆಯನ್ನು ಸ್ಮರಿಸಲಾಯಿತು. ಗ್ರಾಹಕರಿಗೆ ಉತ್ತಮ ಸೇವೆ ಒದಗಿಸುವುದರೊಂದಿಗೆ ಹೆಚ್ಚಿನ ಕುಟುಂಬಗಳಿಗೆ ಜೀವ ವಿಮೆಯ ಭದ್ರತೆಯನ್ನು ತಲುಪಿಸುವ ಸಂಕಲ್ಪವನ್ನು ಇನ್ಶೂರೆನ್ಸ್ ಕುಶಾಲನಗರ ತಂಡವು ಕೈಗೊಂಡಿತು.

ಸಮಾರಂಭದಲ್ಲಿ ಎಲ್‌ಐಸಿ ಕಚೇರಿ ಆಡಳಿತಾಧಿಕಾರಿ ಪದ್ಮನಾಭ ನಾಯಕ್, ಅಭಿವೃದ್ಧಿ ಅಧಿಕಾರಿಗಳಾದ ಎಂ.ಡಿ. ಅಶೋಕ್, ಡಿ.ಎಸ್. ಸತೀಶ್, ಉಲ್ಲಾಸ್ ಕೃಷ್ಣ, ಗ್ಯಾಲಕ್ಸಿ ಕ್ಲಬ್ ಪ್ರತಿನಿಧಿ ಕೆ.ಆರ್. ಸುಬ್ರಮಣಿ, ಸಿಎಂ ಕ್ಲಬ್ ಪ್ರತಿನಿಧಿ ಎಚ್.ಎನ್. ದಿನೇಶ್ ಕುಮಾರ್, ವೆಂಕಟೇಶ್, ಕವಿತ, ರೋಜ, ತಾರಾಭಟ್, ಎ.ಎಂ. ನಾಗರಾಜ್, ಕಚೇರಿ ಸಹಾಯಕರಾದ ಸುದೀಪ್, ರಮ್ಯ ಹಾಗೂ ಇತರರು ಇದ್ದರು.