ಕೊಡಗು

ಹಿಂದೂ ಸಮಾಜವು ಸಂಘಟಿತವಾಗಲಿ

ಆರ್ಜಿ ಬೇಟೋಳಿ ಮಂಡಲದಲ್ಲಿ ಹಿಂದೂ ಸಂಗಮ ಕಾರ್ಯಕ್ರಮದ ಶೋಭಾಯಾತ್ರೆಯಲ್ಲಿ ಪಾಲ್ಗೊಂಡ ಹಿಂದೂ ಭಾಂದವರು.
ಆರ್ಜಿ ಬೇಟೋಳಿ ಮಂಡಲದಲ್ಲಿ ಹಿಂದೂ ಸಂಗಮ ಕಾರ್ಯಕ್ರಮದ ಶೋಭಾಯಾತ್ರೆಯಲ್ಲಿ ಪಾಲ್ಗೊಂಡ ಹಿಂದೂ ಭಾಂದವರು.
ನಾಗೇಶ ಎಸ್
Published on: 
ವಿರಾಜಪೇಟೆ: ಹಿಂದೂ ಸಮಾಜ ಭವ್ಯ ಪರಂಪರೆಯನ್ನು ಹೊಂದಿದ್ದು, ಸಂಘಟಿತ ಸಮಾಜವಾಗಬೇಕು ಎಂದು ಮಂಗಳೂರು ವಿಭಾಗದ ಕಾರ್ಯವಾಹ ಸಂಯೋಜಕ ಜಿತೇಂದ್ರ ಕರೆನೀಡಿದರು.
ಪೆರಂಬಾಡಿ ವಾಲ್ಮೀಕಿ ಭವನದಲ್ಲಿ ಆರ್ಜಿ ಬೇಟೋಳಿ ಮಂಡಲದ ವತಿಯಿಂದ ಇತ್ತೀಚೆಗೆ ಆಯೋಜಿಸಿದ್ದ ಹಿಂದೂ ಸಂಗಮ ಸಭಾ ಕಾರ್ಯಕ್ರಮದಲ್ಲಿ ಮಾತನಾಡಿ, ಇಂದು ಜಗತ್ತು ಭಾರತವನ್ನು ನೋಡುತ್ತಿದ್ದು, ಭಾರತದ ನಾಯಕತ್ವವನ್ನು ಒಪ್ಪಿಕೊಂಡಿದೆ. ಭಾರತವು ಜಗತ್ತಿಗೆ ಜ್ಞಾನದ ಬೆಳಕನ್ನು ನೀಡಿದೆ. ಆರ್‌ಎಸ್‌ಎಸ್ ಹಿಂದೂ ಸಮಾಜವನ್ನು ಸಂಘಟಿತ ಸಮಾಜವನ್ನಾಗಿ ಮಾಡಲು ಆರಂಭಗೊಂಡಿತು ಎಂದರು.
ನಮ್ಮಲ್ಲಿನ ಒಗ್ಗಟ್ಟಿನ ಕೊರತೆಯಿಂದಾಗಿ ವಿವಿಧ ರೀತಿಯಲ್ಲಿ ವಿಭಜನೆಯಾಗಲು ಕಾರಣವಾಯಿತು. ಒಗ್ಗಟ್ಟು ಪ್ರತಿಯೊಬ್ಬರಲ್ಲಿಯೂ ಅತ್ಯವಶ್ಯ. ರಾಷ್ಟ್ರಪ್ರೇಮವನ್ನು ಹೊಂದುವುದರ ಮೂಲಕ ಸಮರ್ಪಣೆ ಮಾಡುವ ವ್ಯಕ್ತಿಗಳ ನಿರ್ಮಾಣವಾಗಬೇಕು. ಭಾರತವು ಭಾರತವಾಗಿಯೇ ಉಳಿದಲ್ಲಿ ಮಾತ್ರ ಜಗತ್ತು ಉಳಿಯಲು ಸಾಧ್ಯ. ಭೇದಭಾವಗಳು ದೂರವಾಗಿ ಗ್ರಾಮಗಳೆಲ್ಲವೂ ರಾಮರಾಜ್ಯವಾಗಲಿ ಎಂದು ಹೇಳಿದರು.
ನಿವೃತ್ತ ಕ್ಯಾಪ್ಟನ್ ಬಿ.ವಿ.ಭವಾನಿಶಂಕರ್ ಬೋರ್ಕರ್ ಮಾತನಾಡಿ, ಪ್ರತಿಯೊಬ್ಬರೂ ಸಂಘಟನೆ, ಸೇವೆ ಹಾಗೂ ಸಾಮೂಹಿಕ ಎಂಬ ಮೂರು ಅಂಶಗಳನ್ನು ಅರಿತಾಗ ಮಾತ್ರ ಸದೃಢ ರಾಷ್ಟ್ರದ ನಿರ್ಮಾಣ ಮಾಡಬಹುದಾಗಿದೆ ಎಂದು ಹೇಳಿದರು.
ಜಿಪಂ ಮಾಜಿ ಸದಸ್ಯ ಅಚ್ಚಪಂಡ ಮಹೇಶ್ ಗಣಪತಿ ಮಾತನಾಡಿದರು. ನಿವೃತ್ತ ಪ್ರಾಂಶುಪಾಲ ಪಟ್ಟಡ ಪೂವಣ್ಣ ಅಧ್ಯಕ್ಷತೆ ವಹಿಸಿದ್ದರು. ಹಿಂದೂ ಸಂಗಮ ಕಾರ್ಯಕ್ರಮದ ಸಂಚಾಲಕ ಜೀವನ್ ಇದ್ದರು.
ಸಭಾ ಕಾರ್ಯಕ್ರಮಕ್ಕೂ ಮುನ್ನ ಆರ್ಜಿ ಗ್ರಾಮದಿಂದ ಶೋಭಾಯಾತ್ರೆ ನಡೆಯಿತು. ಪೆರಂಬಾಡಿಯ ಚಂಡೆ ಬಳಗದವರಿಂದ ಚಂಡೆ ಸೇವೆ, ಬೇಟೋಳಿ ಪುದುಪಾಡಿ ಶ್ರೀ ಅಯ್ಯಪ್ಪ ಸ್ವಾಮಿ ದೇವಸ್ಥಾನದ ಮಕ್ಕಳ ಕುಣಿತ, ಭಜನೆ ತಂಡ, ವಿನಾಯಕ ಮಹಿಳಾ ಭಜನಾ ಮಂಡಳಿಯ ಭಜನಾವಳಿ ಶೋಭಾಯಾತ್ರೆಗೆ ಮೆರುಗು ನೀಡಿತು. ಮಹಿಳೆಯರು ಕಳಸವನ್ನು ಹಿಡಿದು ಶೋಭಾಯಾತ್ರೆಯಲ್ಲಿ ಸಾಗಿದರು. ಶೋಭಾಯಾತ್ರೆಯು ಪೆರಂಬಾಡಿ ವಾಲ್ಮೀಕಿ ಭವನವರೆಗೆ ನಡೆಯಿತು.
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net