ಮಾದಕ ವಸ್ತುಜಾಲ ನಿರ್ಮೂಲನೆ ಆಗಲಿ

ಹದಿಹರೆಯದ ಮನಸ್ಸುಗಳು ಯಾವುದೇ ವಿಚಾರಕ್ಕೂ ಬಹುಬೇಗ ವಾಲಿ ಬಿಡುತ್ತಾರೆ. ಸಮಾಜಘಾತುಕ ಶಕ್ತಿಗಳು ಇದನ್ನೇ ಬಂಡವಾಳ ಮಾಡಿಕೊಂಡು ಯುವಜನತೆಯನ್ನು ಮಾದಕತೆಯ ನಶೆಗೆ ತಳ್ಳಿ ಅವರ ಭವಿಷ್ಯಕ್ಕೆ ಕಂಟಕರಾಗುತ್ತಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ಈಶಾನ್ಯ ರಾಜ್ಯಗಳಿಂದ ಬಂದು ಬೀಡು ಬಿಟ್ಟಿರುವ ರೋಹಿಂಗ್ಯಾ ಮೂಲದ ವಲಸೆ ಕಾರ್ಮಿಕರು ಇದನ್ನು ದಂಧೆಯನ್ನಾಗಿ ಮಾಡಿಕೊಂಡು ರಾಜಾರೋಷವಾಗಿ ಓಡಾಡುತ್ತಿದ್ದಾರೆ. ನಕಲಿ ದಾಖಲೆಗಳ ಮೂಲಕ ದೇಶ - ರಾಜ್ಯಗಳಲ್ಲಿ ಮತ್ತು ನಮ್ಮ ಜಿಲ್ಲೆಯಲ್ಲಿಯೂ ವ್ಯಾಪಕವಾಗಿ ನೆಲೆಸಿರುವ ಇವರನ್ನು ಕೂಲಂಕುಷವಾಗಿ ಪರಿಶೀಲಿಸಿ ಕಾನೂನು ಕ್ರಮದ ಜತೆಗೆ ಗಡಿಪಾರು ಮಾಡಲೇಬೇಕಾಗಿದೆ. ಇವರೊಂದಿಗೆ ಸ್ಥಳೀಯರು ಯಾರಾದರೂ ಈ ಕೃತ್ಯದಲ್ಲಿ ಕೈಜೋಡಿಸಿದ್ದಲ್ಲಿ ಕಠಿಣ ಶಿಕ್ಷೆಗೆ ಒಳಪಡಿಸಬೇಕು.

— ನಿಧಿನಿತಿನ್ ನಾಯಕಂಡ, ಬೇಟೋಳಿ ಗ್ರಾಮ

ಇತ್ತೀಚೆಗೆ ಕೊಡಗಿನಲ್ಲಿ ಮಾದಕ ವಸ್ತುಗಳ ಜಾಲ ವ್ಯಾಪಿಸುತ್ತಿರುವುದು ಅತ್ಯಂತ ಗಂಭೀರ ವಿಷಯವಾಗಿದೆ. ಇದಕ್ಕೆ ಬಲಿಯಾಗುತ್ತಿರುವವರು ನಮ್ಮ ಕೊಡಗಿನ ವಿದ್ಯಾರ್ಥಿಗಳು ಮತ್ತು ಯುವಜನರು. ಮುಖ್ಯವಾಗಿ ಈಶಾನ್ಯ ರಾಜ್ಯಗಳಿಂದ ಕಾರ್ಮಿಕರು ಬಂದಿಳಿಯುವ ರೈಲು, ಬಸ್ಸು ನಿಲ್ದಾಣಗಳಲ್ಲಿ ಕಟ್ಟುನಿಟ್ಟಿನ ತಪಾಸಣೆ ಅನುಸರಿಸಬೇಕಾಗಿದೆ. ಲೈನ್ ಮನೆಗಳಲ್ಲಿ ವಾಸಿಸುವ ಹೊರ ರಾಜ್ಯದ ಕಾರ್ಮಿಕರ ಮೇಲೆ ತೋಟ ಮಾಲೀಕರು ಹಾಗೂ ಸ್ಥಳೀಯ ಸಹಕಾರ್ಮಿಕರು ತೀವ್ರ ನಿಗಾ ವಹಿಸಿ ಅಂತಹವರ ಸುಳಿವನ್ನು ಪೊಲೀಸ್ ಇಲಾಖೆಗೆ ತಿಳಿಸುವಂತಾಗಬೇಕು. ಜಿಲ್ಲೆಯಲ್ಲಿ ನಡೆಯುವಂಥ ರೇವ್, ಪಬ್ಬ್ ಸಂಸ್ಕೃತಿಗಳಿದ್ದರೆ ಅಂತಹ ಕಾರ್ಯಕ್ರಮಗಳಿಗೆ ಕಡಿವಾಣ ಬೀಳಬೇಕಾಗಿದೆ.

— ಕಣಜಾಲು ಪೂವಯ್ಯ, ಮಾಜಿ ಯೋಧ, ಚೆಟ್ಟಳ್ಳಿ

ಯುವಕರು ಮತ್ತು ವಿದ್ಯಾರ್ಥಿಗಳು ಹೆಚ್ಚಾಗಿ ಈ ಮಾದಕ ವ್ಯಸನಕ್ಕೆ ಬಲಿಯಾಗುತ್ತಿದ್ದಾರೆ. ಇದರಿಂದ ಅಪರಾಧಿ ಚಟುವಟಿಕೆಗಳು, ಕಳ್ಳತನ ಮತ್ತು ಹಿಂಸಾಚಾರ ಹೆಚ್ಚಾಗುತ್ತಿದೆ. ಇದರ ವ್ಯಸನದಿಂದಾಗಿ ಖಿನ್ನತೆ ಹೆಚ್ಚಾಗಿ ಆತ್ಮಹತ್ಯೆಯಂತಹ ಅಚಾತುರ್ಯಕ್ಕೆ ಮನಸ್ಸು ಜಾರುವ ಸಾಧ್ಯತೆ ಹೆಚ್ಚಾಗಿರುತ್ತದೆ ಈ ಪಿಡುಗಿನಿಂದ ಸಾಮಾಜಿಕ ಹಾಗೂ ಅರೋಗ್ಯದ ಮೇಲೆ ಗಂಭೀರವಾದ ದುಷ್ಪರಿಣಾಮಗಳು ಬಿರುತ್ತದೆ. ಇದರಿಂದ ಕೊಡಗಿನ ಶಾಂತಿಯುತ ಸಂಸ್ಕೃತಿ ಮತ್ತು ಪ್ರವಾಸೋದ್ಯಮದ ಮೇಲೆ ಪರಿಣಾಮಗಳು ಆಗುತ್ತದೆ.

— ಪೂರ್ಣಿಮಾ ಪಾಂಡಿಮನೆ, ಭಾಗಮಂಡಲ

ಇತ್ತೀಚಿನ ದಿನಗಳಲ್ಲಿ ಕೊಡಗಿನಲ್ಲಿ ಮಾದಕ ವಸ್ತುಗಳು ಹೆಚ್ಚಿನ ಪ್ರಮಾಣದಲ್ಲಿ ಬಳಕೆಯಾಗುವಂತೆ ಕಾಣುತ್ತಿದೆ. ಅದರಲ್ಲೂ ಕೂಡ ಯುವ ಸಮುದಾಯವನ್ನು ಟಾರ್ಗೆಟ್ ಮಾಡಿ ಈ ಕುಕೃತ್ಯ ನಡೆಯುತ್ತಿದೆ. ಪೋಷಕರು ಆದಷ್ಟು ತಮ್ಮ ಮಕ್ಕಳ ಕಡೆ ಗಮನ ಕೊಡಬೇಕು. ಶಾಲಾ, ಕಾಲೇಜು ಬಿಡುವ ಸಮಯದಲ್ಲಿ ಪೊಲೀಸರು ನಗರದಲ್ಲಿ ಒಂದಷ್ಟು ಗಸ್ತು ತಿರುಗಬೇಕು. ವಿದ್ಯಾರ್ಥಿಗಳಲ್ಲಿ ಮಾದಕ ವಸ್ತುವನ್ನು ಬಳಸದಿರುವ ಕುರಿತು ಅರಿವು ಮೂಡಿಸಬೇಕು. ಹೊರ ಜಿಲ್ಲೆ, ಹೊರ ರಾಜ್ಯದವರು ಬಂದು ಮಾದಕ ವಸ್ತುಗಳನ್ನು ಮಾರಾಟ ಮಾಡಲು ಪ್ರಯತ್ನಿಸುವುದು ಕಂಡು ಬಂದರೆ ಕಠಿಣ ಶಿಕ್ಷೆಯೊಂದಿಗೆ ಗಡಿಪಾರು ಮಾಡಬೇಕು.

— ರಮ್ಯಾ, ವಿರಾಜಪೇಟೆ