ಕ್ಲೀನ್ ಸಿಟಿ-ಸ್ವಚ್ಛ ಕುಶಾಲನಗರ ಅಭಿಯಾನ

ರೋಟರಿ ಕುಶಾಲನಗರ ಅಧ್ಯಕ್ಷ ಮನು ಪೆಮ್ಮಯ್ಯ ಮಾತನಾಡಿ, ಇದರ ಮೂರು ದಿನಗಳ ಕಾಲ ಚಿತ್ರಕಲೆ ಕಾರ್ಯ ಆಯೋಜಿಸಲಾಗಿತ್ತು. ಸ್ವಚ್ಛ ಕುಶಾಲನಗರ ಎಂಬುದು ಕೇವಲ ಅಭಿಯಾನವಲ್ಲ, ಪ್ರತಿಯೊಬ್ಬ ನಾಗರಿಕನ ಜವಾಬ್ದಾರಿಯಾಗಿದೆ. ಮಡಿಕೇರಿ ಶಾಸಕ ಡಾ. ಮಂತರ್ ಗೌಡ ಅವರು ರೋಟರಿ ಕುಶಾಲನಗರದೊಂದಿಗೆ ಕೈಜೋಡಿಸಿ ಈ ಸ್ವಚ್ಛತಾ ಅಭಿಯಾನಕ್ಕೆ ಸಂಪೂರ್ಣ ಬೆಂಬಲ ನೀಡಿದ್ದಾರೆ ಎಂದರು.

ಕುಶಾಲನಗರ ಪುರಸಭೆ ಮುಖ್ಯಾಧಿಕಾರಿ ಗಿರೀಶ್, ಆರೋಗ್ಯಾಧಿಕಾರಿ ಉದಯ್, ರೋಟರಿ ಸದಸ್ಯರಾದ ಮಹೇಶ್ ನಲ್ವಾಡೆ, ಡಾ.ಹರೀಶ್ ಎ.ಶೆಟ್ಟಿ, ಉಲ್ಲಾಸ್ ಕೃಷ್ಣ, ಕ್ರೆಝ್‌ವೆಲ್ ಕೋಟ್ಸ್, ಕಾರ್ಯದರ್ಶಿ ಎಚ್.ಪಿ.ಮಂಜುನಾಥ ಈ ಸಂದರ್ಭ ಇದ್ದರು. ಇದೇ ಸಂದರ್ಭದಲ್ಲಿ ಎಸ್‌ಎಲ್‌ಎನ್ ಸಂಸ್ಥೆಯಿಂದ ತ್ಯಾಜ್ಯ ವಿಂಗಡಣೆ ಯಂತ್ರವನ್ನು ಕೊಡುಗೆಯಾಗಿ ನೀಡಲಾಯಿತು.

ಕ್ಲೀನ್ ಸಿಟಿ-ಸ್ವಚ್ಛ ಕುಶಾಲನಗರ ಅಭಿಯಾನದ ಭಾಗವಾಗಿ ಕೊಡಗು-ಮೈಸೂರು ಜಿಲ್ಲೆಗಳ ಗಡಿಭಾಗದ ಕಾವೇರಿ ಸೇತುವೆಯ ಎರಡೂ ಕಡೆ ಇರುವ ತಡೆಗೋಡೆಗಳನ್ನು ಸ್ವಚ್ಛಗೊಳಿಸಲಾಗಿದೆ. ಸ್ವಚ್ಛತೆಯನ್ನು ಕಾಪಾಡಿ ಎಂಬ ಸಂದೇಶದೊಂದಿಗೆ ಕೊಡಗಿನ ಪ್ರವಾಸಿತಾಣಗಳಲ್ಲಿ ತ್ಯಾಜ್ಯ ನಿರ್ವಹಣೆ, ಒಣ ಹಾಗೂ ಹಸಿ ಕಸದ ಸಂಗ್ರಹಣೆ ಕುರಿತು ಸಾರ್ವಜನಿಕರಲ್ಲಿ ಜಾಗೃತಿಯನ್ನೂ ಮೂಡಿಸಲಾಯಿತು.

ಸ್ವಚ್ಛತಾ ಜಾಗೃತಿ ಚಿತ್ರಕಲೆ ಕಾರ್ಯವನ್ನು ಕುಶಾಲನಗರ ಪಟ್ಟಣದ ಪ್ರಮುಖ ಸ್ಥಳಗಳಲ್ಲಿ ಹಮ್ಮಿಕೊಳ್ಳಲಾಗಿದೆ. ಜಿಎಂಪಿ ಶಾಲಾ ಆವರಣ, ಕೆಎಸ್‌ಆರ್‌ಟಿಸಿ ಬಸ್ ನಿಲ್ದಾಣದ ತಡೆಗೋಡೆ, ಅರಣ್ಯ ಇಲಾಖೆ ಆವರಣ, ಸರ್ಕಾರಿ ಆಸ್ಪತ್ರೆ ಆವರಣ ಸೇರಿದಂತೆ ಹಲವು ಪ್ರಮುಖ ಬೀದಿಗಳ ಗೋಡೆಗಳ ಮೇಲೆ ಒಣ ಮತ್ತು ಹಸಿ ಕಸದ ನಿರ್ವಹಣೆ ಕುರಿತ ಜಾಗೃತಿ ಚಿತ್ರಗಳನ್ನು ಬರೆಯಲಾಗಿದೆ. ಕೊಡಗಿನ ಸುಂದರ ಪ್ರಕೃತಿ ಮತ್ತು ಪ್ರವಾಸೋದ್ಯಮ ಪ್ರತಿಬಿಂಬಿಸುವ ಚಿತ್ರಗಳು ಮೂಡಿಬಂದಿವೆ.