ಮೆಗಾ ಟೌನ್‌ಶಿಪ್‌ಗಳು ಮತ್ತು ರೆಸಾರ್ಟ್ಗಳನ್ನು ತಕ್ಷಣ ತೆರವುಗೊಳಿಸಿ

ಕೊಡಗಿನ ಪರಿಸರದ ಮೇಲೆ ವಿನಾಶಕಾರಿ ಪರಿಣಾಮ ಬೀರುತ್ತಿರುವ ಮತ್ತು ಕೊಡವ ಭೂಪ್ರದೇಶದ ಮೇಲೆ ಮಿತಿ ಮೀರಿದ ಒತ್ತಡ ಹೇರುತ್ತಿರುವ ಹೊರಗಿನ ಬಂಡವಾಳಶಾಹಿಗಳ ಮೆಗಾ ಟೌನ್‌ಶಿಪ್‌ಗಳು ಮತ್ತು ರೆಸಾರ್ಟ್ಗಳನ್ನು ತಕ್ಷಣ ತೆರವುಗೊಳಿಸಬೇಕೆಂದು ಆಗ್ರಹಿಸಿ ಕೊಡವ ನ್ಯಾಷನಲ್ ಕೌನ್ಸಿಲ್ ಸಂಘಟನೆ ಮಡಿಕೇರಿಯಲ್ಲಿ ಶುಕ್ರವಾರ ಸತ್ಯಾಗ್ರಹ ನಡೆಸಿತು. ನಗರದ ಜಿಲ್ಲಾಧಿಕಾರಿಗಳ ಕಚೇರಿ ಎದುರು ಸಿಎನ್‌ಸಿ ಅಧ್ಯಕ್ಷ ಎನ್.ಯು. ನಾಚಪ್ಪ ನೇತೃತ್ವದಲ್ಲಿ ನಡೆದ ಸತ್ಯಾಗ್ರಹದಲ್ಲಿ ಮೆಗಾ ಟೌನ್‌ಶಿಪ್‌ಗಳು ಮತ್ತು ರೆಸಾರ್ಟ್ಗಳಿಂದ ಕೊಡಗಿನ ಮೇಲಾಗುತ್ತಿರುವ ದುಷ್ಪರಿಣಾಮಗಳ ಕುರಿತು ವಿವರಿಸಲಾಯಿತು.

ಆದಿಮಸಂಜಾತ, ಏಕ-ಸಂಸ್ಕೃತಿಯ, ಪ್ರಕೃತಿ ಆರಾಧಕರಾದ ಕೊಡವ ಜನರ ಜೀವನ, ಪರಂಪರೆ ಮತ್ತು ಪರಿಸರದ ಮೇಲಾಗುವ ಭವಿಷ್ಯದ ವಿನಾಶಕಾರಿ ಪರಿಣಾಮಗಳನ್ನು ತಡೆಗಟ್ಟಲು ಕೊಡವ ಪ್ರದೇಶದಲ್ಲಿ ಕಾರ್ಯಾಚರಿಸುತ್ತಿರುವ ಅಥವಾ ನಿರ್ಮಾಣ ಹಂತದಲ್ಲಿರುವ ಹೊರಗಿನವರ ಎಲ್ಲಾ ಮೆಗಾ ಟೌನ್‌ಶಿಪ್‌ಗಳು ಹಾಗೂ ರೆಸಾರ್ಟ್ಗಳನ್ನು ತಕ್ಷಣ ಧ್ವಂಸಗೊಳಿಸಬೇಕು. ಕಾಫಿ ಭೂಮಿ ಪರಿವರ್ತನೆಯ ಕುರಿತು ಕರ್ನಾಟಕ ಹೈಕೋರ್ಟ್ ತೋರಿದ ಕಳಕಳಿಯಂತೆ ಕೊಡವ ಪ್ರದೇಶ ಮತ್ತು ರಾಷ್ಟಿçÃಯ ಕಾಫಿ ಭದ್ರತೆಯನ್ನು ರಕ್ಷಿಸಲು ಭೂಪರಿವರ್ತನೆಯನ್ನು ತಕ್ಷಣ ನಿಲ್ಲಿಸಬೇಕು ಎಂದು ಎನ್.ಯು. ನಾಚಪ್ಪ ಒತ್ತಾಯಿಸಿದರು.

ಕೇರಳದ ವಯನಾಡು ಪ್ರದೇಶದಲ್ಲಿ 2024ರ ವಿಕೋಪ ಮರುಕಳಿಸಿದೆ. ಇದು ಕೊಡವ ನಾಡಿಗೆ ಎಚ್ಚರಿಕೆಯ ಗಂಟೆಯಾಗಿರುವುದರಿAದ ಬೆಟ್ಟಗುಡ್ಡಗಳ ಮೇಲಿನ ಕಾಂಕ್ರಿಟೀಕರಣ ಮತ್ತು ಭೂಪರಿವರ್ತನೆಯನ್ನು ತಕ್ಷಣ ನಿಲ್ಲಿಸಬೇಕು. ಕೊಡವ ನಾಡು ಇಂದು ಭಾರತದ ದಕ್ಷಿಣದ ಟಿಬೆಟ್ ನಂತಾಗಿದೆ. ಆಕ್ರಮಣಕ್ಕೊಳಗಾಗಿರುವ ಭೂಪ್ರದೇಶ, ಪರಿಸರ-ಸೂಕ್ಷö್ಮ ಜಲ ಗೋಪುರ, ಕೊಡವ ಪ್ರದೇಶ ಅಪಾಯದಂಚಿನಲ್ಲಿದೆ.

ಕೊಡವ ನಾಡಿನಲ್ಲಿ ಭೂ ಮಾಫಿಯಾ, ಕಪ್ಪು ಹಣದ ಹೂಡಿಕೆ, ಕಾನೂನುಬಾಹಿರ ಭೂನೋಂದಣಿ ಮತ್ತು ಕಡತಗಳ ವಿಲೇವಾರಿಗಾಗಿ ನೋಂದಾಣಾಧಿಕಾರಿಗಳನ್ನು ವಿಮಾನದ ಮೂಲಕ ತಾವಿದ್ದ ಪ್ರದೇಶಗಳಿಗೆ ಕರೆಯಿಸಿಕೊಳ್ಳುವುದರ ವಿರುದ್ಧ ತುರ್ತು ಕ್ರಮ ಕೈಗೊಳ್ಳಬೇಕು.

ಸಿದ್ದಾಪುರದ 2400 ಎಕರೆ ಕಾಫಿ ತೋಟದ ಪ್ರದೇಶದಿಂದ ಹಿಡಿದು ಮಲ್ಮ ಕುಂದ್ ವರೆಗೆ, ಹೊರಗಿನ ಉದ್ಯಮಿಗಳ ಒಡೆತನದ ಮೆಗಾ-ರೆಸಾರ್ಟ್, ಟೌನ್‌ಶಿಪ್‌ಗಳು ಮತ್ತು ವಿಲ್ಲಾಗಳು ಇಡೀ ಕೊಡಗನ್ನು ಆವರಿಸುತ್ತಿದ್ದು, ತೀವ್ರ ವಿನಾಶವನ್ನು ಉಂಟು ಮಾಡುತ್ತಿದೆ. ಈ ನಿರ್ಣಾಯಕ ಹಂತದಲ್ಲಿ, ನೆರೆಯ ವಯನಾಡಿನಲ್ಲಿ 2024ರಲ್ಲಿ ಸಂಭವಿಸಿದ ಭೀಕರ ಭೂಸ್ಫೋಟ ಮತ್ತು ಮೇಘಸ್ಫೋಟ ಇದೇ ಜು.7 ರಂದು ಮರುಕಳಿಸಿದೆ. 2018ರಲ್ಲಿ ವಾಯುವ್ಯ ಕೊಡಗಿನಲ್ಲಿ ಕಾಡಿದ ಭೀಕರ ಜಲಪ್ರಳಯ ಮತ್ತು ಪ್ರಾಕೃತಿಕ ವಿಕೋಪಗಳು ಕೊಡಗಿನಲ್ಲಿ ವಯನಾಡಿನ ಮಾದರಿಯಲ್ಲೇ ಮರುಕಳಿಸುವುದಿಲ್ಲ ಎಂಬುವುದಕ್ಕೆ ಯಾವುದೇ ಖಾತರಿ ಇಲ್ಲ. ಆದ್ದರಿಂದ ಆಡಳಿತ ನಡೆಸುವವರು ಕೊಡವ ಭೂಪ್ರದೇಶದ ರಕ್ಷಣೆಗೆ ಅಗತ್ಯ ಕ್ರಮಗಳನ್ನು ಕೈಗೊಳ್ಳಬೇಕು.

ಮದ್ರಾಸ್ ಹೈಕೋರ್ಟ್ ತೀರ್ಪಿಗೆ ಸ್ಪಂದಿಸಿದ ತಮಿಳುನಾಡು ಸರ್ಕಾರ ನೀಲಗಿರಿ ಜಿಲ್ಲೆಯ ಮಸಿನಗುಡಿಯಲ್ಲಿ ಬಂಡವಾಳಶಾಹಿಗಳು ನಿರ್ಮಿಸಿದ್ದ ನೂರಾರು ಪಂಚತಾರಾ ರೆಸಾರ್ಟ್ಗಳನ್ನು ಧ್ವಂಸಗೊಳಿಸಿತು. ಅದೇ ರೀತಿ, ಈ ಪವಿತ್ರ ಕೊಡವ ಭೂಮಿಯನ್ನು ಪಾವನಗೊಳಿಸಲು ಕೊಡಗಿನಲ್ಲಿ ಹೊರಗಿನವರ ಒಡೆತನದ ಎಲ್ಲಾ ಮೆಗಾ-ರೆಸಾರ್ಟ್ಗಳು ಮತ್ತು ಟೌನ್‌ಶಿಪ್‌ಗಳನ್ನು ಧ್ವಂಸಗೊಳಿಸಬೇಕು.

ಇಡೀ ಕೊಡವ ಪ್ರದೇಶವು ಒಂದು ಅಭಯಾರಣ್ಯವಾಗಿದೆ, ಪ್ರತಿ ಹಳ್ಳಿಯೂ ಒಂದು ಪವಿತ್ರ ಕೊಡವ ಮಂದ್ ಅನ್ನು ಹೊಂದಿದೆ. ಇದು ಕೊಡವ ಪರಂಪರೆಯ ಆದಿಮಸಂಜಾತ, ಏಕ-ಸಂಸ್ಕೃತಿಯ, ಪ್ರಕೃತಿ ಆರಾಧನೆಯ, ಪೂರ್ವಜರ ಪೀಠವಾಗಿದೆ. ಕೊಡವ ಪ್ರದೇಶದ ಪ್ರತಿಯೊಂದು ಗ್ರಾಮವೂ ದೇವರ ವಾಸಸ್ಥಾನವಾಗಿದೆ, ದೇವರ ಸ್ವರ್ಗದಂತಿದೆ. ಆದರೆ ಇಂದು ಕೊಡವ ನಾಡಿನಲ್ಲಿ 3 ಸಾವಿರಕ್ಕೂ ಹೆಚ್ಚು ಮೆಗಾ ರೆಸಾರ್ಟ್ಗಳು ಮತ್ತು ಟೌನ್‌ಶಿಪ್‌ಗಳು ಕಾರ್ಯನಿರ್ವಹಿಸುತ್ತಿವೆ ಅಥವಾ ನಿರ್ಮಾಣ ಹಂತದಲ್ಲಿವೆ.

ಗಾಡ್ಗೀಳ್ ಮತ್ತು ಕಸ್ತೂರಿರಂಗನ್ ವರದಿಗಳ ಮಾದರಿಯಲ್ಲಿ 900 ಮೀಟರ್‌ಗಿಂತ ಎತ್ತರದಲ್ಲಿರುವ ಕೊಡಗಿನ ಪ್ರದೇಶಗಳನ್ನು ಕಟ್ಟಡ ರಹಿತ ವಲಯ ಎಂದು ಘೋಷಿಸಬೇಕು. ಕೊಡಗಿನ ಆಸ್ತಿಗಳಿಗೆ ಸಂಬAಧಿಸಿದAತೆ ಕಳೆದ 5 ವರ್ಷಗಳಲ್ಲಿ ಕೊಡಗಿನ ವ್ಯಾಪ್ತಿಯ ಹೊರಗೆ ನಡೆದ ಎಲ್ಲಾ ಭೂ ನೋಂದಣಿಗಳ ಬಗ್ಗೆ ಸಿಬಿಐ ಅಥವಾ ಇಡಿ ತನಿಖೆ ನಡೆಸಬೇಕು. ನೋಂದಣಿಗಾಗಿ ಕೊಡಗನ್ನು ತೊರೆದ ಎಲ್ಲಾ ಸಬ್-ರೆಜಿಸ್ಟಾçರ್ ಗಳನ್ನು ಅಮಾನತುಗೊಳಿಸಿ ಕಪ್ಪುಪಟ್ಟಿಗೆ ಸೇರಿಸಬೇಕು. ಕೊಡಗಿನಲ್ಲಿ ಎಲ್ಲಾ ನೋಂದಣಿಗಳಿಗೆ ವಿಡಿಯೋ ರೆಕಾರ್ಡಿಂಗ್, ಜಿಪಿಎಸ್ ಟ್ಯಾಗಿಂಗ್ ಕಡ್ಡಾಯಗೊಳಿಸಬೇಕು. ಕೊಡಗು ಜಿಲ್ಲೆಯಲ್ಲಿ ಕೊಡವರಲ್ಲದವರು ಭೂಮಿ ಖರೀದಿಸುವುದನ್ನು 5 ವರ್ಷಗಳವರೆಗೆ ನಿಷೇಧಿಸಬೇಕು ಎಂದು ಎನ್.ಯು.ನಾಚಪ್ಪ ಒತ್ತಾಯಿಸಿದರು.

ವಿವಿಧ ಬೇಡಿಕೆಗಳ ಮನವಿ ಪತ್ರವನ್ನು ಹೆಚ್ಚುವರಿ ಜಿಲ್ಲಾಧಿಕಾರಿ ಡಾ. ಸಹನಾ ಎಸ್.ಹಾದಿಮನಿ ಅವರ ಮೂಲಕ ಸರ್ಕಾರಕ್ಕೆ ಸಲ್ಲಿಸಲಾಯಿತು.

ಪುಲ್ಲೇರ ಸ್ವಾತಿ ಕಾಳಪ್ಪ, ಬೊಟ್ಟಂಗಡ ಸವಿತಾ ಗಿರೀಶ್, ಅರೆಯಡ ಸವಿತಾ ಗಿರೀಶ್, ಚೋಳಪಂಡ ಜ್ಯೋತಿ ನಾಣಯ್ಯ, ಮುದ್ದಿಯಡ ಲೀಲಾವತಿ, ಪಟ್ಟಮಾಡ ಕುಶ, ನಂದೇಟಿರ ರವಿ ಸುಬ್ಬಯ್ಯ, ಅಜ್ಜಿಕುಟ್ಟಿರ ಲೋಕೇಶ್, ಅರೆಯಡ ಗಿರೀಶ್ ತಿಮ್ಮಯ್ಯ, ಕಾಟುಮಣಿಯಂಡ ಲೇಯರ್, ಅವರೆಮಾದಂಡ ಚೆಂಗಪ್ಪ ಹಾಗೂ ಅಳಮಂಡ ನೆಹರು ಮತ್ತಿತರರು ಸತ್ಯಾಗ್ರಹದಲ್ಲಿ ಪಾಲ್ಗೊಂಡಿದ್ದರು.