ಚೇರಂಬಾಣೆಯಲ್ಲಿ ಗೌಡ ಮಹಿಳಾ ಒಕ್ಕೂಟದಿಂದ ಹಬ್ಬ ಆಚರಣೆ

ನಾಪೋಕ್ಲು: ಚೇರಂಬಾಣೆ ಗೌಡ ಮಹಿಳಾ ಒಕ್ಕೂಟದ ವತಿಯಿಂದ ಹಿಂದು ಪಂಚಾಂಗದ ವರ್ಷದ ಮೊದಲ ದಿನ ಯುಗಾದಿ ಹಬ್ಬವನ್ನು ಅರ್ಥಪೂರ್ಣವಾಗಿ ಆಚರಿಸಲಾಯಿತು.

ಕಾರುಗುಂದ ಗೌಡ ಸಮಾಜದಲ್ಲಿ ಏರ್ಪಡಿಸಲಾಗಿದ್ದ ಕಾರ್ಯಕ್ರಮದಲ್ಲಿ ಒಕ್ಕೂಟದ ಸದಸ್ಯರು ಪರಸ್ಪರ ಬೇವು-ಬೆಲ್ಲ ಹಂಚಿಕೊಳ್ಳುವುದರೊಂದಿಗೆ ಯುಗಾದಿಗೆ ಸಂಬಂಧಿಸಿದಂತೆ ಗೀತ ಗಾಯನ ಹಾಗೂ ಯುಗಾದಿ ವಿಶೇಷ ವಿಚಾರಗಳನ್ನು ವಿನಿಮಯ ಮಾಡಿಕೊಂಡರು.

ಒಕ್ಕೂಟದ ಕಾರ್ಯದರ್ಶಿ ಕೇಕಡ ಪೂಜಾ ನಾಗೇಂದ್ರ ಮಾತನಾಡಿ, ಹಿಂದು ಕ್ಯಾಲೆಂಡರ್ ಪ್ರಕಾರ 60 ಸಂವತ್ಸರಗಳಲ್ಲಿ ಇದು 40ನೇ ವರ್ಷ ಪರಾಭವ ಸಂವತ್ಸರವಾಗಿದೆ. ಪರಾಭವ ಎಂದರೆ ಶತ್ರುಗಳ ಅಥವಾ ಅಹಂಕಾರದ ನಾಶ. ಇದು ದುಷ್ಟಶಕ್ತಿಗಳ ಪರಾಭವ ಮತ್ತು ಸಾಧನೆಯ ವರ್ಷವೆಂದು ಪರಿಗಣಿಸಲಾಗಿದೆ ಎಂದರು.

ಸಂಘಟನಾ ಕಾರ್ಯದರ್ಶಿ ಬೈಮನ ಜ್ಯೋತಿ ತಿಮ್ಮಯ್ಯ ಮಾತನಾಡಿ. ಹಬ್ಬ ಆಚರಣೆಗಳ ಸಂದರ್ಭ ಬಾಗಿಲಿಗೆ ಮಾವು ಬೇವಿನ ತೋರಣಗಳನ್ನು ಕಟ್ಟುವುದರಿಂದ ಅವುಗಳಿಂದ ಹೊರಸುಸುವ ರೋಗ ನಿರೋಧಕ ಶಕ್ತಿಗಳು ಸದಾ ನಮ್ಮನ್ನು ಮುಟ್ಟುತ್ತವೆ ಅಲ್ಲದೆ ತೋರಣದಲ್ಲಿ ಬಳಸುವ ಮಾವಿನ ಎಲೆಗಳಲ್ಲಿ ದೇವತೆಗಳು ನೆಲೆಸಿರುತ್ತಾರೆ ಎಂದು ಅಭಿಪ್ರಾಯಪಟ್ಟರು.

ಹಬ್ಬಾಚರಣೆಗಳಲ್ಲಿ ವಿವಿಧ ವಿನ್ಯಾಸದ ಮಾವಿನ ಎಲೆಯ ತೋರಣ ಕಟ್ಟುವ ಬಗ್ಗೆ ಅಧ್ಯಕ್ಷೆ ತುಳಸಿ ಮೋಹನ್ ತರಬೇತಿ ನೀಡಿದ ಕಾರ್ಯಕ್ರಮದಲ್ಲಿ ಒಕ್ಕೂಟದ ಉಪಾಧ್ಯಕ್ಷರಾದ ಹೊಸೊಕ್ಲು ಲತಾ ಮೊಣ್ಣಪ್ಪ, ಕೋಶಾಧಿಕಾರಿ ಕೊಡಪಾಲು ತೀರ್ಥ ಗಣಪತಿ, ಸಮೃದ್ಧಿ ಆಸ್ಪತ್ರೆಯ ಸಂಸ್ಥಾಪಕರಾದ ಹೇಮಲತಾ ಟಿ.ಎ.ಬೈಮನ ಕಾಂತಿ ದಯಾನಂದ ಸೇರಿದಂತೆ ಒಕ್ಕೂಟದ ನಿರ್ದೇಶಕರು, ಸದಸ್ಯರು ಭಾಗವಹಿಸಿದ್ದರು.