ಕೊಡಗಿಗೆ ವಿದೇಶಿ ಕಾಫಿ

ಕೆಲವು ಖಾಸಗಿ ನರ್ಸರಿಗಳ ಆಕರ್ಷಕ ಜಾಹೀರಾತುಗಳಿಗೆ ಮರುಳಾಗಿ ಕಾಫಿ ಬೆಳೆಗಾರರು ಅಪಾಯಕಾರಿ ತೀರ್ಮಾನಗಳನ್ನು ತೆಗೆದುಕೊಳ್ಳುತ್ತಿರುವುದು ಆತಂಕ ಹುಟ್ಟಿಸಿದೆ. ಹೆಚ್ಚು ಲಾಭದ ಆಮಿಷಕ್ಕೆ ಬಲಿಯಾಗಿ ವಿಯೆಟ್ನಾಂ, ಬ್ರಿಜಿಲ್ ಸೇರಿದಂತೆ ವಿದೇಶಿ ತಳಿಯ ಕಾಫಿ ಗಿಡಗಳನ್ನು ತೋಟಗಳಲ್ಲಿ ನಾಟಿ ಮಾಡುತ್ತಿರುವುದರಿಂದ ಭವಿಷ್ಯದಲ್ಲಿ ದೊಡ್ಡ ಮಟ್ಟದ ಸಮಸ್ಯೆಗಳು ಉದ್ಭವವಾಗುವ ಬಗ್ಗೆ ತಜ್ಞರು ಎಚ್ಚರಿಕೆ ನೀಡಿದ್ದಾರೆ. ಭಾರತೀಯ ಕಾಫಿ ಮಂಡಳಿ ಶಿಫಾರಸ್ಸು ಮಾಡಿರುವ ತಳಿಗಳನ್ನು ಮಾತ್ರ ಬೆಳೆಯುವಂತೆ ಸಲಹೆ ನೀಡಲಾಗುತ್ತಿದೆ.

ಗಿಡದಲ್ಲಿ ಎಲೆಗಳೇ ಕಾಣದಂತೆ ತುಂಬಿಕೊAಡಿರುವ ಕಾಫಿ ಹಣ್ಣುಗಳು, ಕಣದಲ್ಲಿ ದೊಡ್ಡದಾದ ಕಾಫಿ ರಾಶಿ, ಬೆಳೆಗಾರನ ಐಷಾರಾಮಿ ಬದಕು ಬಿಂಬಿಸುವ ಫೋಟೋ...ವಿದೇಶಿ ತಳಿಯ ಕಾಫಿ ಗಿಡಗಳನ್ನು ಮಾರಾಟ ಮಾಡುವ ಖಾಸಗಿ ನರ್ಸರಿಗಳ ಜಾಹೀರಾತುಗಳಲ್ಲಿ ಬಹುತೇಕ ಇದೇ ರೀತಿಯ ಫೋಟೋಗಳು ಜತೆಯಲ್ಲಿ ಆಕರ್ಷಕ ವಾಕ್ಯಗಳು ಕಂಡುಬರುತ್ತದೆ. ಖಾಸಗಿ ನರ್ಸರಿಗಳ ಈ ಮೋಹದ ಬಲೆಗೆ ಬೆಳೆಗಾರ ಬಿದ್ದರೆ ಭವಿಷ್ಯದಲ್ಲಿ ಆತ ಮಾತ್ರವಲ್ಲ, ಆತನ ಸುತ್ತಮುತ್ತಲಿನ ತೋಟಗಳಲ್ಲೂ ಪರಿಹಾರ ಕಾಣದಂಥ ಸಮಸ್ಯೆಗಳು ಉದ್ಭವವಾಗುವ ಎಲ್ಲಾ ಸಾಧ್ಯತೆಗಳ ಬಗ್ಗೆ ತಜ್ಞರು ಎಚ್ಚರಿಕೆ ಕೊಟ್ಟಿದ್ದಾರೆ.

ಸಾಮಾಜಿಕ ಜಾಲತಾಣಗಳಲ್ಲಿ ಒಂದನ್ನೊAದು ಮೀರಿಸುವ ಜಾಹೀರಾತುಗಳು, ಸೋಷಿಯಲ್ ಮೀಡಿಯಾ ಇನ್ಫೂಲಿಯನ್ಸರ್‌ಗಳ ಬಣ್ಣದ ಮಾತುಗಳ ಮೂಲಕ ಮೂಲಕ ವಿಯೆಟ್ನಾಂ ಮತ್ತು ಬ್ರೆಜಿಲ್ ಮೂಲದ ವಿದೇಶಿ ಕಾಫಿ ತಳಿಗಳ ಸಸಿಗಳನ್ನು ಅನಧಿಕೃತವಾಗಿ ಮಾರಾಟ ಮಾಡುವ ದಂಧೆ ಇತ್ತೀಚಿನ ದಿನಗಳಲ್ಲಿ ಹೆಚ್ಚಾಗಿದೆ. ಇದು ಕಾಫಿ ಮಂಡಳಿ ತಜ್ಞರ ಗಮನಕ್ಕೂ ಬಂದಿದ್ದು, ವಿದೇಶಿ ಮೂಲದ ಕಾಫಿ ಗಿಡಗಳನ್ನು ಖರೀದಿಸಿ ತಮ್ಮ ತೋಟದಲ್ಲಿ ನಾಟಿ ಮಾಡುವ ಬೆಳೆಗಾರರಿಗೆ ಮಂಡಳಿ ಈಗಾಗಲೇ ಕಟ್ಟುನಿಟ್ಟಿನ ಎಚ್ಚರಿಕೆ ಸಂದೇಶ ರವಾನಿಸಿದೆ.

ಖಾಸಗಿ ಸಸಿಮಡಿಗಳು ಮತ್ತು ಕೆಲವು ವ್ಯಕ್ತಿಗಳು ವಿಯೆಟ್ನಾಂ ಮೂಲದ ಟಿಎಸ್ 5, ಟಿಆರ್ 9, ಟಿಆರ್ 11 ಎನ್ನುವ ಹೆಸರಿನ ತಳಿಗಳು ಮತ್ತು ಇದರ ಜತೆಗೆ ಬ್ರೆಜಿಲ್, ಕೊಲಂಬಿಯಾ ಮೂಲದ ಕಾಫಿ ಗಿಡಗಳನ್ನು ಇದೊಂದು ಲಾಭದಾಯಕ ಬೆಳೆ ಎಂದು ಬಿಂಬಿಸಿ ಆನ್‌ಲೈನ್‌ನಲ್ಲಿ ಪ್ರಚಾರ ಮಾಡುತ್ತಿದ್ದಾರೆ. ಆದರೆ, ಈ ತಳಿಗಳ ವೈಜ್ಞಾನಿಕ ಸತ್ಯಾಸತ್ಯತೆ, ಇಳುವರಿ ಸಾಮರ್ಥ್ಯ ಅಥವಾ ಭಾರತದ ವಾತಾವರಣಕ್ಕೆ ಇವು ಹೊಂದಿಕೊಳ್ಳುವ ಬಗ್ಗೆ ಯಾವುದೇ ಅಧಿಕೃತ ಮಾಹಿತಿ ಇಂಥ ನರ್ಸರಿ ಅಥವಾ ವ್ಯಕ್ತಿಗಳು ಬೆಳೆಗಾರರಿಗೆ ಕೊಡುತ್ತಿಲ್ಲ.

ವಿದೇಶಿ ತಳಿಗಳನ್ನು ಭಾರತಕ್ಕೆ ಆಮದು ಮಾಡಿಕೊಳ್ಳಬೇಕಾದರೆ ಸಾಕಷ್ಟು ನಿಯಮಗಳಿವೆ. ಆದರೆ ಕಾಫಿ ವಿಷಯದಲ್ಲಿ ಖಾಸಗಿ ನರ್ಸರಿಗಳು ಈ ನಿಯಮಗಳನ್ನು ಪಾಲಿಸುತ್ತಿಲ್ಲ ಎನ್ನುವ ಆರೋಪಗಳಿವೆ. ಈ ರೀತಿಯ ಅನಧಿಕೃತ ಆಮದಿನಿಂದ ಭೀಕರ ಕೀಟ ಅಥವಾ ರೋಗಗಳ ಅಪಾಯದ ಬಗ್ಗೆ ತಜ್ಞರು ಆತಂಕ ವ್ಯಕ್ತಪಡಿಸಿದ್ದಾರೆ. ಸೂಕ್ತ ಆಮದು ಪರವಾನಗಿ ಮತ್ತು ಕ್ವಾರಂಟೈನ್ ನಿಯಮಾವಳಿಗಳನ್ನು ಪಾಲಿಸದೆ ದೇಶಕ್ಕೆ ತರಲಾಗುವ ವಿದೇಶಿ ತಳಿಗಳು ಭಾರತದ ಕಾಫಿ ತೋಟಗಳಿಗೆ ಮಾರಕವಾಗಬಹುದು ಎನ್ನುವ ಎಚ್ಚರಿಕೆಯನ್ನು ಕೊಡಲಾಗಿದೆ.

ಅನಧಿಕೃತವಾಗಿ ತಳಿಗಳ ಆಮದಿನಿಂದ ಹೊಸ ಕೀಟ ಮತ್ತು ರೋಗಗಳು ಭಾರತಕ್ಕೆ ಪ್ರವೇಶ ಮಾಡಲು ದಾರಿ ಮಾಡಿ ಕೊಟ್ಟಂತೆ ಆಗಬಹುದು. ವಿದೇಶಗಳಿಂದ ಅನಧಿಕೃತವಾಗಿ ತರಲಾಗುವ ಸಸಿಗಳಿಂದ ದೇಶದಲ್ಲಿ ಇಲ್ಲಿಯ ತನಕ ಕಂಡುಬರದ ಭಯಾನಕ ಕೀಟಗಳು, ರೋಗಕಾರಕ ಜೀವಿಗಳು ಹಾಗೂ ನಿಯಂತ್ರಿಸಲಾಗದ ಅಪಾಯಕಾರಿ ಕಳೆಗಳು ಸ್ಥಳೀಯ ತೋಟಗಾರಿಕಾ ವ್ಯವಸ್ಥೆಗೆ ಪ್ರವೇಶ ಪಡೆಯುವ ಸಾಧ್ಯತೆ ಬಗ್ಗೆ ತಜ್ಞರು ಆತಂಕ ವ್ಯಕ್ತಪಡಿಸಿದ್ದಾರೆ.

ದೇಶದ ಜೈವಿಕ ಸುರಕ್ಷತೆಯನ್ನು ಕಾಯ್ದುಕೊಳ್ಳಲು ಭಾರತ ಸರ್ಕಾರ ಕಟ್ಟುನಿಟ್ಟಿನ ಕ್ವಾರಂಟೈನ್ ನಿಯಮಗಳನ್ನು ಜಾರಿಗೊಳಿಸಿದೆ. ಈ ನಿಯಮಗಳನ್ನು ಗಾಳಿಗೆ ತೂರಿ ಸಸಿಗಳನ್ನು ಸಾಗಿಸುವುದು ಕಾನೂನುಬಾಹಿರವಾಗಿದೆ. ಯಾವುದೇ ವಿದೇಶಿ ಕಾಫಿ ತಳಿಗಳನ್ನು ಆಮದು ಮಾಡಿಕೊಳ್ಳಲು, ಬೆಳೆಸಲು ಅಥವಾ ಮಾರಾಟ ಮಾಡಲು ಯಾವುದೇ ಖಾಸಗಿ ಸಸಿಮಡಿಗಳಿಗೆ ಅಥವಾ ಖಾಸಗಿ ತೋಟಗಳಿಗೆ ಕಾಫಿ ಮಂಡಳಿ ಇಲ್ಲಿಯ ತನಕ ಅಧಿಕಾರ ಅಥವಾ ಅಥವಾ ಮಾನ್ಯತೆ ನೀಡಿಲ್ಲ.

ಯಾವುದೇ ಖಾತರಿ ಇಲ್ಲದ ಇಂತಹ ಅನಧಿಕೃತ ಸಸಿಗಳನ್ನು ಖರೀದಿಸಿ ನೆಡುವುದು ಬೆಳೆಗಾರರಿಗೆ ಭವಿಷ್ಯದಲ್ಲಿ ಆರ್ಥಿಕ ನಷ್ಟಕ್ಕೆ ಕಾರಣ ಆಗಬಹುದು. ಇಡೀ ಭಾರತೀಯ ಕಾಫಿ ಉದ್ಯಮದ ಸುಸ್ಥಿರತೆಗೇ ಮಾರಕವಾಗಿ ಪರಿಣಮಿಸಬಹುದು. ಭಾರತೀಯ ಹವಾಮಾನದಲ್ಲಿ ಈ ತಳಿಗಳ ಯಶಸ್ಸು ಅಥವಾ ಇಳುವರಿ ಸಾಮರ್ಥ್ಯವನ್ನು ಕಾಫಿ ಮಂಡಳಿ ಎಲ್ಲಿಯೂ ದೃಢೀಕರಿಸಿಲ್ಲ. ದೇಶದಲ್ಲಿ ಕಾಫಿಯನ್ನು ನೆರಳಿನಲ್ಲಿ ಬೆಳೆಸಲಾಗುತ್ತದೆ. ಆದರೆ ವಿದೇಶದಲ್ಲಿ ಕಾಫಿಯನ್ನು ಬಿಸಿಲಿನಲ್ಲಿ ಬೆಳೆಯಲಾಗುತ್ತದೆ. ಇಂಥ ವೈರುಧ್ಯಗಳು ವಿದೇಶಿ ತಳಿಯ ಕಾಫಿಯಿಂದಾಗಿ ಸ್ಥಳೀಯ ವ್ಯವಸ್ಥೆಗೆ ಮಾರಕ ಆಗಬಹುದು.

ಕಾಫಿ ಕೃಷಿಯನ್ನು ಆರ್ಥಿಕವಾಗಿ ಲಾಭದಾಯಕ ಹಾಗೂ ಸುಸ್ಥಿರಗೊಳಿಸಲು ಭಾರತೀಯ ಕಾಫಿ ಮಂಡಳಿಯ ಕೇಂದ್ರೀಯ ಕಾಫಿ ಸಂಶೋಧನಾ ಸಂಸ್ಥೆ ನಿರಂತರವಾಗಿ ಸಂಶೋಧನೆ ನಡೆಸುತ್ತಿದೆ. ಯಾವುದೇ ತಳಿಯನ್ನು ಬೆಳೆಯಲು ಬೆಳೆಗಾರರಿಗೆ ಶಿಫಾರಸು ಮಾಡುವ ಮುನ್ನ ವಿವಿಧ ಕಾಫಿ ಬೆಳೆಯುವ ಪ್ರದೇಶಗಳಲ್ಲಿ ಸುದೀರ್ಘ ಕಾಲ ಬಹು-ಸ್ಥಳೀಯ ಪ್ರಯೋಗಗಳನ್ನು ನಡೆಸಲಾಗುತ್ತದೆ. ಮಣ್ಣಿನ ಗುಣಧರ್ಮ, ಹವಾಮಾನ ಮತ್ತು ಕೀಟ ನಿರೋಧಕ ಶಕ್ತಿಯನ್ನು ಕೂಲಂಕುಷವಾಗಿ ಪರಿಶೀಲಿಸಿದ ನಂತರವೇ ಪ್ರಮಾಣೀಕೃತ ತಳಿ, ಕ್ಲೋನ್‌ಗಳು ಮತ್ತು ಮಿಶ್ರ ತಳಿಗಳನ್ನು ಬಿಡುಗಡೆ ಮಾಡಲಾಗುತ್ತದೆ.

ಸ್ಥಳೀಯ ಕಾಫಿ ಬೆಳೆಯಲ್ಲಿ ಸುಸ್ಥಿರತೆ ಕಾಪಾಡಿಕೊಳ್ಳಲು, ತೋಟಗಳನ್ನು ಉಳಿಸಿಕೊಳ್ಳಲು ಸಾಮಾಜಿಕ ಜಾಲತಾಣಗಳಲ್ಲಿ ಕಂಡುಬರುವ ವರ್ಣರಂಜಿತ ಹಾಗೂ ಮೋಸದ ಜಾಹೀರಾತುಗಳನ್ನು ನಂಬಿ ವಿದೇಶಿ ತಳಿಗಳನ್ನು ನಾಟಿ ಮಾಡದಂತೆ ಬೆಳಗಾರರÀಲ್ಲಿ ತಜ್ಞರು ಮನವಿ ಮಾಡಿಕೊಂಡಿದ್ದಾರೆ. ಕಾಫಿ ಬೆಳೆಗಾರರ ಸಂಘಗಳು, ತೋಟದ ಮಾಲೀಕರು ಹಾಗೂ ಕೃಷಿಕರು ಇಂತಹ ಅನಧಿಕೃತ ಮಾರಾಟದ ಕುರಿತು ಜಾಗೃತರಾಗಿರಬೇಕು. ಯಾವುದೇ ಹೊಸ ತಳಿಯ ಸಸಿಗಳನ್ನು ಖರೀದಿಸುವ ಮುನ್ನ ಕಾಫಿ ಮಂಡಳಿಯ ವಿಜ್ಞಾನಿಗಳು ಅಥವಾ ಸ್ಥಳೀಯ ವಿಸ್ತರಣಾಧಿಕಾರಿಗಳನ್ನು ಸಂಪರ್ಕಿಸಿ ಸತ್ಯಾಸತ್ಯತೆಯನ್ನು ಖಚಿತಪಡಿಸಿಕೊಳ್ಳಬೇಕು ಎಂದು ಭಾರತೀಯ ಕಾಫಿ ಮಂಡಳಿ ರೈತರಲ್ಲಿ ಮನವಿ ಮಾಡಿಕೊಂಡಿದೆ.

"