ಶ್ವಾನ ಹರಕೆಯಿಂದ ಸರ್ವವೂ ಪ್ರಾಪ್ತಿ

ಕೇರಳದ ಆರಾಧನಾ ಪರಂಪರೆಯ ಪ್ರಮುಖ ದೈವವಾದ ಮುತ್ತಪ್ಪ, ನಂಬಿ ಬರುವ ಭಕ್ತರ ಸಂಕಷ್ಟ ಪರಿಹರಿಸಿ ಇಷ್ಟಾರ್ಥ ಸಿದ್ಧಿಸುತ್ತಾನೆ ಎಂಬ ನಂಬಿಕೆ ಇಲ್ಲಿನ ಭಕ್ತರದ್ದು. ಇದೇ ಕಾರಣಕ್ಕೆ ಕೊಡಗು ಮಾತ್ರವಲ್ಲದೆ ಮೈಸೂರು, ಹಾಸನ, ಕೇರಳ ಸೇರಿದಂತೆ ವಿವಿಧ ಭಾಗಗಳಿಂದ ಭಕ್ತರು ವರ್ಷಪೂರ್ತಿ ದೇವರ ದರ್ಶನಕ್ಕೆ ಆಗಮಿಸುತ್ತಾರೆ.

ಭಕ್ತರು ಇಷ್ಟಾರ್ಥಗಳಿಗಾಗಿ ಹರಕೆ ಹೊರುತ್ತಾರೆ. ವಿಶೇಷವಾಗಿ ಶ್ವಾನಕ್ಕೆ ಸಂಬಂಧಿಸಿದ ಹರಕೆಯನ್ನು ಸಮರ್ಪಿಸುವ ಸಂಪ್ರದಾಯ ಈ ಕ್ಷೇತ್ರದ ಪ್ರಮುಖ ವೈಶಿಷ್ಟೃವಾಗಿದೆ. ಮುತ್ತಪ್ಪ ದೈವದ ವಾಹನವೆಂದು ಪರಿಗಣಿಸಲ್ಪಡುವ ನಾಯಿಗೆ ಗೌರವ ಸಲ್ಲಿಸುವ ಈ ಆಚರಣೆ ಕೇರಳದ ಮುತ್ತಪ್ಪ ಆರಾಧನೆ ಪರಂಪರೆಯ ಪ್ರತಿಬಿಂಬಿವಾಗಿದೆ.

ಮುತ್ತಪ್ಪ ಮತ್ತು ತಿರುವಪ್ಪ ವೆಳ್ಳಾಟಂ, ಪೈಂಗುತ್ತಿ ಪೂಜೆಗಳ ಬಳಿಕ ಆ ಸ್ಥಳವನ್ನು ತೆರವುಗೊಳಿಸಲು ಮುಂದಾದಾಗ ಮುತ್ತಪ್ಪ ದೈವ ಅಲ್ಲಿಯೇ ನೆಲೆನಿಂತಿರುವ ದೈವಿಕ ಅನುಭವ ಭಕ್ತರಿಗೆ ದೊರೆತಿದೆ ಎನ್ನುವುದು ಸ್ಥಳೀಯರ ನಂಬಿಕೆ. ಈ ಘಟನೆ ದೇವಾಲಯ ನಿರ್ಮಾಣಕ್ಕೆ ಪ್ರೇರಣೆಯಾಗಿ ಸಮಾನ ಮನಸ್ಕರು ಹಾಗೂ ಭಕ್ತರು ಒಗ್ಗೂಡಿ ದೇವಾಲಯ ಕಟ್ಟುವ ಸಂಕಲ್ಪ ಮಾಡಿದರು.

ಭಕ್ತರು ಮತ್ತು ದಾನಿಗಳ ಸಹಕಾರದಿಂದ 2011ರಲ್ಲಿ ಶ್ರೀ ಕೋವಿಲ್ ದೇವಾಲಯ ನಿರ್ಮಾಣಗೊಂಡಿತು. ಕೇರಳದ ತಂತ್ರಿಗಳ ನೇತೃತ್ವದಲ್ಲಿ ಶಾಸ್ತ್ರೋಕ್ತವಾಗಿ ಮುತ್ತಪ್ಪ ದೈವವನ್ನು ಪ್ರತಿಷ್ಠಾಪಿಸಲಾಯಿತು. ದೇವರ ಮಹಿಮೆ ಹರಡುತ್ತಿದ್ದಂತೆ ಭಕ್ತರ ಸಂಖ್ಯೆ ವರ್ಷದಿಂದ ವರ್ಷಕ್ಕೆ ಹೆಚ್ಚಿತು. 2013ರಲ್ಲಿ ಮುತ್ತಪ್ಪ ಮತ್ತು ತಿರುವಪ್ಪ ದೇವರೊಂದಿಗೆ ಗುಳಿಗ ದೈವವನ್ನೂ ಪ್ರತಿಷ್ಠಾಪಿಸಲಾಯಿತು. ಪ್ರಸ್ತುತ ದೇವಾಲಯದಲ್ಲಿ ಮುತ್ತಪ್ಪ, ತಿರುವಪ್ಪ, ಗುಳಿಗ, ಭಗವತಿ ಹಾಗೂ ಬಸುರಿಮಾಲ ದೇವರುಗಳ ಆರಾಧನೆ ನಡೆಯುತ್ತಿದೆ.