ಜಿಲ್ಲೆಯಲ್ಲಿ ಆನೆ-ಮಾನವ ಸಂಘರ್ಷ ಹೆಚ್ಚಳ

ಕಾಡಾನೆ-ಮಾನವ ಸಂಘರ್ಷದಲ್ಲಿ ಅತೀ ಹೆಚ್ಚು ಕಾರ್ಮಿಕರು, ಬಡವರು, ರೈತರು ಜೀವ ಕಳೆದುಕೊಳ್ಳುತ್ತಿದ್ದಾರೆ. ಅವರ ಜೀವಕ್ಕೂ ಬೆಲೆ ಇದೆ. ಕಾಡಾನೆ ಹಾವಳಿ ನಿಯಂತ್ರಣಕ್ಕೆ ಶಾಶ್ವತ ಪರಿಹಾರ ಕಂಡು ಹಿಡಿಯಲೇ ಬೇಕು. ಕಾಡಾನೆಗಳನ್ನು ನಿರ್ದಿಷ್ಟ ಮೀಸಲು ಅರಣ್ಯದಲ್ಲಿ ಬಿಡಬೇಕು.

ಆನೆ-ಮಾನವ ಸಂಘರ್ಷಕ್ಕೆ ಸಂಬAಧಿಸಿದAತೆ ಉಪಟಳ ನೀಡುವ ಆನೆಗಳನ್ನು ಮಾತ್ರ ಬೇರೆಡೆಗೆ ಸ್ಥಳಾಂತರಿಸುವುದರಿAದ ಸಮಸ್ಯೆಗೆ ಶಾಶ್ವತ ಪರಿಹಾರ ಸಿಗುವುದಿಲ್ಲ. ಕಾಡಾನೆಗಳು ಅರಣ್ಯದಲ್ಲೇ ಇರಬೇಕಲ್ಲದೆ ನಾಡಿನ ಕಡೆ ನುಸುಳದಂತೆ ಅರಣ್ಯ ಇಲಾಖೆ ಶಾಶ್ವತ ಪರಿಹಾರ ಒದಗಿಸಬೇಕು. ಆನೆಗಳಿಗೆ ಅರಣ್ಯದಲ್ಲಿ ಅವುಗಳ ಹಸಿವು, ಬಾಯಾರಿಕೆ ನೀಗದಿದ್ದಲ್ಲಿ ಮಾತ್ರ ಅವುಗಳು ನಾಡಿನೆಡೆ ಬರುತ್ತವೆ. ಈ ಸಂದರ್ಭ ಮತ್ತೆ ಆನೆ-ಮಾನವ ಸಂಘರ್ಷ ಮರುಕಳಿಸುವುದು ಖಂಡಿತ. ಮುಖ್ಯವಾಗಿ ಅರಣ್ಯದ ಗಡಿಯಲ್ಲಿ ಸುತ್ತಲೂ ಆನೆಗಳು ದಾಟದಂತೆ ಕಂದಕ ನಿರ್ಮಿಸುವುದು ಸೂಕ್ತ.

ಕೊಡಗಿನಲ್ಲಿ ಆನೆ-ಮಾನವ ಸಂಘರ್ಷ ಅನೇಕ ವರ್ಷಗಳಿಂದ ಇದ್ದು ಇದಕ್ಕೆ ಇಂದಿಗೂ ಶಾಶ್ವತ ಪರಿಹಾರ ಸಿಕ್ಕಿಲ್ಲ. ಕಾಡಾನೆಗಳನ್ನು ಹಿಡಿದು ಬೇರೆಡೆ ಬಿಡುವುದರಿಂದ ಪರಿಹಾರ ಸಿಗುವುದಿಲ್ಲ. ಅವುಗಳಿಗೆ ಬೇಕಾದ ಆಹಾರ ಪದಾರ್ಥಗಳನ್ನು ಅವಿರುವ ಸ್ಥಳದಲ್ಲಿ ಒದಗಿಸುವ ನಿಟ್ಟಿನಲ್ಲಿ ಕ್ರಮ ತೆಗೆದುಕೊಳ್ಳಬೇಕು. ಕಾಡಾನೆ ಹಿಡಿದು ಬೇರೆಡೆಗೆ ಬಿಟ್ಟು ರೈತರ ಕಣ್ಣೊರೆಸುವ ಕೆಲಸ ಆಗಬಾರದು.

ಆನೆಗಳ ಸ್ಥಳಾಂತರ ಎನ್ನುವುದು ಪ್ರಯೋಜನ ಇಲ್ಲದ ಒಂದು ಯೋಜನೆ. ಈಚೆಗೆ ಸುಂಟಿಕೊಪ್ಪ ಬಳಿ ಸೆರೆ ಹಿಡಿದಿದ್ದ ಆನೆಯನ್ನು ದೂರದಲ್ಲಿ ಎಲ್ಲೋ ಬಿಟ್ಟು ಬರಲಾಗಿತ್ತು. ಆದರೆ ಮಾರನೆಯ ದಿನವೇ ಆ ಆನೆ ಹಿಡಿದ ಸ್ಥಳದಲ್ಲಿ ಪ್ರತ್ಯಕ್ಷ ಆಗಿತ್ತು. ಆನೆಗಳು ಪ್ರತಿ ದಿನ 40-50 ಕಿಮೀ ನಡೆಯುತ್ತವೆ. ಆನೆಗಳ ಸಂಖ್ಯೆಯೂ ಹೆಚ್ಚಾಗಿದೆ. ಹಾಗಾಗಿ ಕಾಡಂಚಿನ ಪ್ರದೇಶದಲ್ಲಿ ಇರುವವರು ಎಚ್ಚರಿಕೆಯಿಂದ ಇರುವ ಬಗ್ಗೆ ಜಾಗೃತಿ ಮೂಡಿಸುವುದಷ್ಟೇ ಸದ್ಯಕ್ಕೆ ಇರುವ ಪರಿಹಾರ.

ಸಿದ್ದಾಪುರದಲ್ಲಿ ಒಂದು ಆನೆ, ಚೆಂಬೆಳ್ಳೂರಿನಲ್ಲಿ ಒಂದು ಆನೆ ಸೇರಿದಂತೆ ಇತ್ತೀಚಿನ ದಿನಗಳಲ್ಲಿ ಮೂರು ಆನೆಗಳನ್ನು ಸೆರೆಹಿಡಿಯಲಾಗಿದೆ. ಇದೇ ರೀತಿಯಲ್ಲಿ ತೊಂದರೆ ಕೊಡುವ ಆನೆಗಳನ್ನು ಗುರುತಿಸಿ ಹಿಡಿಯುವ ಕೆಲಸ ಮಾಡಲಾಗುತ್ತಿದೆ. ಆನೆಗಳನ್ನು ಹಿಡಿದ ಕೂಡಲೇ ಪರಿಸರವಾದಿಗಳು, ಎನ್‌ಜಿಒಗಳು ಇವರು ಆನೆಗಳನ್ನು ಹಿಡಿದುಬಿಟ್ಟರು ಎಂದು ಸುಪ್ರೀಂಕೋರ್ಟ್ನಲ್ಲಿ ಪ್ರಕರಣ ದಾಖಲು ಮಾಡಿದ್ದಾರೆ. ಇವೆಲ್ಲವುಗಳ ನಡುವೆ ಸಮತೋಲನ ಕಾಯ್ದುಕೊಂಡು ಆನೆ-ಮಾನವ ಸಂಘರ್ಷ ಪರಿಹಾರಕ್ಕೆ ಪ್ರಯತ್ನ ನಡೆಸಲಾಗುತ್ತಿದೆ. ಇದಕ್ಕೆ ಎಲ್ಲರೂ ಸಹಕಾರ ಕೊಡಬೇಕು.