ವಿಶೇಷ ಕರಿಮೆಣಸು ತಳಿಯ ಅಭಿವೃದ್ಧಿ

ಹಲವು ಅಪರೂಪದ ಜೀವಸಂಕುಲದ ಆಶ್ರಯತಾಣವಾಗಿರುವ ಪಶ್ಚಿಮಘಟ್ಟದ ಅರಣ್ಯಪ್ರದೇಶದಲ್ಲಿ ವಿಶೇಷ ಕರಿಮೆಣಸು ತಳಿಯೊಂದನ್ನು ಕೊಡಗು ಜಿಲ್ಲೆ ಗರ್ವಾಲೆ ಗ್ರಾಮದ ಹವ್ಯಾಸಿ ಕೃಷಿ ಸಂಶೋಧಕ ನಾಪಂಡ ಪೂಣಚ್ಚ ಪತ್ತೆಹಚ್ಚಿದ್ದಾರೆ. 15 ವರ್ಷಗಳ ಹಿಂದೆ ಕಾಡಿನಲ್ಲಿ ಆಕಸ್ಮಿಕವಾಗಿ ಕಂಡುಬAದ ಸಾಸಿವೆ ಕಾಳು ಗಾತ್ರದ ಹಣ್ಣಿನಲ್ಲಿ ಕಾಳು ಮೆಣಸಿನ ಅಂಶವನ್ನು ಗುರುತಿಸಿ ಅದನ್ನೀಗ ವಾಣಿಜ್ಯಿಕವಾಗಿ ಬೆಳೆಯಲು ಸಾಧ್ಯವಾಗುವಂತೆ ತಳಿ ಅಭಿವೃದ್ಧಿಪಡಿಸಲಾಗಿದೆ. ಈ ಹೊಸ ಬೆಳೆ ತಜ್ಞರ ಕುತೂಹಲಕ್ಕೂ ಕಾರಣವಾಗಿದೆ.

ನೋಡಲು ಹಿಪ್ಪುನೇರಳೆ ಹಣ್ಣಿನಂತೆ ಕಾಣುವ ಗೊಂಚಲು. ಇದರಲ್ಲಿ ಸಾಸಿವೆ ಕಾಳಿಗಿಂತಲೂ ಸ್ವಲ್ಪ ಚಿಕ್ಕದಾದ ಕಡು ಹಸಿರು ಕಾಯಿಗಳು. ಹಣ್ಣಾದಾಗ ಗಾಢ ನೀಲಿಗೆ ತಿರುಗುವ ಬಣ್ಣ. ಒಣಗಿಸಿದರೆ ಕಡುಕಪ್ಪಾಗುವ ಗುಣ. ಇದು ನಾಪಂಡ ಪೂಣಚ್ಚ ಸಂಶೋಧಿಸಿದ ನಮಪತ್ರೆ ಎನ್ನುವ ಪ್ರಭೇದದ ಕರಿಮೆಣಸು. ರುಚಿಯಲ್ಲಿ ಸಾಮಾನ್ಯ ಕರಿಮೆಣಸಿಗಿಂತಲೂ ಹೆಚ್ಚು ಖಾರ ಇದೆ. ಇದರ ಬಳ್ಳಿಯ ಎಲೆಗಳು ವಿಳ್ಯದೆಲೆ ಮಾದರಿಯಲ್ಲಿದ್ದು ಸಿಹಿಮಿಶ್ರಿತ ಖಾರವಿದೆ. ರುಚಿ ದಾಲ್ಚಿನ್ನಿ ಗಿಡದ ಎಲೆಯ ಸ್ವಾಧದ ಅನುಭವ ಕೊಡುತ್ತದೆ.

15 ವರ್ಷದ ಹಿಂದೆ ನಾಪಂಡ ಪೂಣಚ್ಚ ಅವರು ಗರ್ವಾಲೆಯ ತಮ್ಮ ತೋಟದಲ್ಲಿ ಸುತ್ತಾಡುವ ಸಂದರ್ಭ ಕಾಳುಮೆಣಸು ರೀತಿಯ ಬಳ್ಳಿ ಕಣ್ಣಿಗೆ ಬಿದ್ದಿದೆ. ಸಾಮಾನ್ಯ ಕಾಳುಮೆಣಸು ಗೊಂಚಲು ನೆಲಕ್ಕೆ ಅಭಿಮುಖವಾಗಿ ನೇತಾಡಿದರೆ ಈ ಬಳ್ಳಿಯ ಪುಟ್ಟ ಗೊಂಚಲುಗಳು ಆಕಾಶಭಿಮುಖವಾಗಿ ನಿಂತಿರುವುದು ಇವರ ಕುತೂಹಲ ಕೆರಳಿಸಿತ್ತು. ಎಲೆಯನ್ನು ಕಚ್ಚಿನೋಡಿದಾಗ ಇದರಲ್ಲಿ ಏನೋ ವಿಶೇಷ ಇದೆ ಎನ್ನುವುದರ ಅರಿವಾಗಿ ಮತ್ತಷ್ಟು ಕೆದಕಿದಾಗ ಬಳ್ಳಿಯಲ್ಲಿ ಹಿಪ್ಪುನೇರಳೆ ಹಣ್ಣಿನ ಮಾದರಿ ಗೊಂಚಲಿನಲ್ಲಿ ಪುಟ್ಟ ಕಾಯಿಗಳು ಕಂಡುಬAದವು. ಇದರ ರುಚಿ ಕರಿಮೆಣಸಿನ ರುಚಿಗೆ ಹೋಲಿಕೆಯಾದಾಗ ಇದನ್ನು ತೋಟದ ಬೆಳೆಯಾಗಿ ಅಭಿವೃದ್ಧಿ ಪಡಿಸಲು ನಿರ್ಧರಿಸಿದರು.

ತಳಿ ಅಭಿವೃದ್ಧಿಪಡಿಸಲು ಮುಂದಾದಾಗ ಕೇವಲ ಗಂಡು ಬಳ್ಳಿ ಮಾತ್ರ ಬಹುತೇಕ ಕಡೆಗಳಲ್ಲಿ ಕಂಡುಬರುತ್ತಿತ್ತು. ಕೊನೆಗೆ ಹೆಣ್ಣು ಬಳ್ಳಿ ಸಿಕ್ಕಿದ ನಂತರ ತಳಿ ಅಭಿವೃದ್ಧಿ ಪಡಿಸುವ ಕೆಲಸ ಶುರುಮಾಡಿದರು. ಪೂಣಚ್ಚ ಅವರು ಕಂಡುಕೊAಡAತೆ ಈ ಪ್ರಭೇದದ ಕಾಳು ಮೆಣಸು ಪಶ್ಚಿಮಘಟ್ಟದ ಪುಷ್ಪಗಿರಿ ಶ್ರೇಣಿ, ಮಡಿಕೇರಿ ವ್ಯಾಪ್ತಿಯ ನಿಶಾನಿಮೊಟ್ಟೆ, ನಾಪೋಕ್ಲುವಿನ ತಡಿಯಂಡಮೋಳು ಬೆಟ್ಟ ವ್ಯಾಪ್ತಿಯಲ್ಲಿ ಮಾತ್ರ ಕಾಡಿನಲ್ಲಿ ಬೆಳೆಯುತ್ತಿದೆ. ಆದರೆ ಇಂಥದ್ದೊAದು ಕರಿಮೆಣಸಿನ ತಳಿ ಇರುವ ಬಗ್ಗೆ ಸ್ಥಳೀಯರಿಗೆ ಗೊತ್ತೇ ಇಲ್ಲ. ಇವರ ತೋಟದಲ್ಲಿ ಈ ಬಳ್ಳಿ ಇದ್ದ ಬಗ್ಗೆ ಪೂಣಚ್ಚ ಅವರ 80 ವರ್ಷದ ತಂದೆಗೂ ಮಾಹಿತಿ ಇರಲಿಲ್ಲ.

15 ವರ್ಷಗಳ ಕಾಲ ಶ್ರಮವಹಿಸಿ ಅಭಿವೃದ್ಧಿಪಡಿಸಿದ ಬಳ್ಳಿಗಳಲ್ಲಿ ಈಗ ಫಸಲು ಬಂದಿದೆ. ಗುರುವಾರವಷ್ಟೇ (ಡಿ.26) ಈ ವಿಶೇಷ ತಳಿಯ ಕಾಳುಮೆಣಸನ್ನು ಅಧಿಕೃತವಾಗಿ ಕೊಯ್ಲು ಮಾಡಿದ್ದಾರೆ. ಇದರ ವಿಶೇಷ ಗುಣಗಳಿಂದಾಗಿ ಮಾರುಕಟ್ಟೆಯಲ್ಲಿ ಸಾಮಾನ್ಯ ಕಾಳುಮೆಣಸಿಗಿಂತ ಹೆಚ್ಚಿನ ಬೇಡಿಕೆ ಉಂಟಾಗಬಹುದು ಎನ್ನುವ ನಿರೀಕ್ಷೆಯನ್ನು ಇಟ್ಟುಕೊಂಡಿರುವ ಪೂಣಚ್ಚ ವಾಣಿಜ್ಯಿಕವಾಗಿ ಬೆಳೆಯಲು ಶುರುಮಾಡಿದ್ದಾರೆ. ಈ ವಿಶಿಷ್ಟ ಕಾಳುಮೆಣಸನ್ನು ತಮ್ಮ ಹೆಸರಿನಲ್ಲಿ ನೋಂದಣಿ ಮಾಡಿಕೊಳ್ಳಲು ನ್ಯಾಷನಲ್ ಇನ್ನೋವೇಷನ್ ಫೌಂಡೇಷನ್ ಅನ್ನು ಸಂಪರ್ಕಿಸಿದ್ದು, ಅಲ್ಲಿಯ ತಜ್ಞರು ಈಗಾಗಲೇ ಇವರ ತೋಟಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಶಿವಮೊಗ್ಗದ ತೋಟಗಾರಿಕೆ ವಿವಿಯ ತಜ್ಞರು ಕೂಡ ಈ ತಳಿ ಬಗ್ಗೆ ಆಸಕ್ತಿ ತೋರಿಸಿದ್ದಾರೆ.

"