ನಷ್ಟದ ಆಪತ್ತಿಗೆ ಬೆಳೆವಿಮೆ ಅನುಕೂಲ

ಈ ವರ್ಷ ಮಳೆಯ ಕೊರತೆ ಆಗುವ ಎಲ್ಲಾ ಸಾಧ್ಯತೆಗಳಿದ್ದು ಕೃಷಿಕರು ಬೆಳೆ ವಿಮೆ ಮಾಡಿಸಿಕೊಳ್ಳುವಂತೆ ಸಲಹೆಗಳು ಕೇಳಿ ಬರುತ್ತಿದೆ. ಬೆಳೆ ವಿಮೆ ಮಾಡಿಸಿಕೊಳ್ಳಲು ಈ ತಿಂಗಳ ಅಂತ್ಯದ ತನಕ ಕಾಲಾವಕಾಶ ಇದ್ದು ಕೂಡಲೇ ರೈತರು ಈ ಅವಕಾಶದ ಸದುಪಯೋಗ ಮಾಡಿಕೊಳ್ಳಬೇಕಿದೆ. ವಿಮೆ ಮೂಲಕ ಒಂದಿಷ್ಟು ಬೆಳೆ ನಷ್ಟದ ಪರಿಹಾರ ಸಿಗುವಂತಾದರೆ ಅನ್ನದಾತ ಸ್ವಲ್ಪ ಮಟ್ಟಿಗೆ ಸುಧಾರಿಸಿಕೊಳ್ಳಲು ಅನುಕೂಲ ಆಗಬಹುದು ಎನ್ನುವ ಅಭಿಪ್ರಾಯಗಳು ವ್ಯಕ್ತವಾಗುತ್ತಿದೆ.

ಕಳೆದ ವಾರ ಉತ್ತಮವಾಗಿ ಸುರಿದು ನಿರೀಕ್ಷೆ ಮೂಡಿಸಿದ್ದ ಮಳೆ ಈ ವಾರದ ಆರಂಭದಲ್ಲೇ ನಿರಾಸೆಗೆ ಕಾರಣವಾಗಿದೆ. ಕಳೆದ 24 ಗಂಟೆ ಅವಧಿಯಲ್ಲಿ ಜಿಲ್ಲೆಯಲ್ಲಿ ಸರಾಸರಿ ಕೇವಲ 0.16 ಮಿ.ಮೀ. ಮಳೆ ಮಾತ್ರ ದಾಖಲಾಗಿದೆ. ಜನವರಿಯಿಂದ ಇಲ್ಲಿಯವರೆಗೆ 696.17 ಮಿ.ಮೀ. ಮಳೆ ಬಂದಿದ್ದು, ಕಳೆದ ವರ್ಷ ಇದೇ ಅವಧಿಯಲ್ಲಿ 1678.99 ಮಿ.ಮೀ ಮಳೆಯಾಗಿತ್ತು.

ಜುಲೈ 10ರಿಂದ ನಿಧಾನಕ್ಕೆ ಮಳೆ ಕಡಿಮೆ ಆಗುತ್ತಾ ಬಂದಿದ್ದು ಈ ತಿಂಗಳಿನಲ್ಲಿ ಮಳೆ ಕೊರತೆ ಮುಂದುವರಿಯಲಿದೆ ಎನ್ನುವ ಮುನ್ಸೂಚನೆಯನ್ನು ಹವಾಮಾನ ಇಲಾಖೆ ನೀಡಿದೆ. ಫೆಸಿಫಿಕ್ ಮಹಾಸಾಗರದಲ್ಲಿ ಎಲ್‌ನಿನೋ ಇರುವುದರಿಂದ ಈ ವರ್ಷ ಮಳೆಯ ಪ್ರಮಾಣ ತೀರಾ ಕಡಿಮೆಯಾಗುವ ಸಾಧ್ಯತೆ ಇದೆ ಎಂದು ಹವಾಮಾನ ಇಲಾಖೆ ಈಗಾಗಲೇ ತಿಳಿಸಿದೆ. ಇದಕ್ಕೆ ಪೂರಕ ಎಂಬAತೆ ಜೂನ್ ತಿಂಗಳಿನಲ್ಲಿ ರಾಜ್ಯದಲ್ಲಿ ಅತಿ ಹೆಚ್ಚು ಶೇ 63ರಷ್ಟು ಮಳೆ ಕೊರತೆ ಉಂಟಾಗಿದೆ. ಹಾಗಾಗಿ ಈ ವರ್ಷ ರೈತರು ಬೆಳೆ ವಿಮೆ ಮಾಡಿಸುವ ಅನಿವಾರ್ಯತೆ ಕಂಡು ಬರುತ್ತಿದೆ.

ಬೇರೆ ಜಿಲ್ಲೆಗಳಿಗೆ ಹೋಲಿಸಿದರೆ ಕೊಡಗು ಜಿಲ್ಲೆಯಲ್ಲಿ ಬೆಳೆ ವಿಮೆ ಮಾಡಿಸುವವರ ಸಂಖ್ಯೆ ಕಡಿಮೆ. ಕಳೆದ ವರ್ಷ ಕೇವಲ 337 ರೈತರಷ್ಟೇ ಬೆಳೆ ವಿಮೆ ಮಾಡಿಸಿದ್ದರು. ಆ ಪೈಕಿ 231 ಮಂದಿಗೆ ವಿಮಾ ಪರಿಹಾರ ಮೊತ್ತ ಬಂದಿದೆ. ಹಿಂದಿನ ವರ್ಷ ಮಳೆ ಉತ್ತಮವಾಗಿ ಬಂದ ಕಾರಣ ಬೆಳೆ ನಷ್ಟವಾಗುವ ಸಾಧ್ಯತೆಗಳು ಕಡಿಮೆ ಇದ್ದವು. ಹಾಗಾಗಿ, ಹೆಚ್ಚಿನ ರೈತರು ಬೆಳೆ ವಿಮೆಯಿಂದ ದೂರವೇ ಉಳಿದಿದ್ದರು.

ಆದರೆ, ಈ ವರ್ಷ ಪರಿಸ್ಥಿತಿ ಕೊಡಗಿನಲ್ಲಿ ಭಿನ್ನವಾಗಿದೆ. ಈ ವರ್ಷದ ಮೊದಲ ಅರ್ಧ ಭಾಗ ಸ್ವಲ್ಪವೂ ಮಳೆಯಾಗಲಿಲ್ಲ. ಜುಲೈ ಮೊದಲ ವಾರದಲ್ಲಿ ಬಿರುಸಿನ ಮಳೆ ಕಂಡುಬAದರೂ 2ನೇ ವಾರಕ್ಕೆ ರಭಸ ಕಳೆದುಕೊಂಡು ಬಿಸಿಲಿನ ವಾತಾವರಣ ನಿರ್ಮಾಣ ಆಗಿದೆ. ದೀರ್ಘಾವಧಿ ಭತ್ತದ ಬೆಳೆಯುವುದು ಬೇಡ, ಅಲ್ಪಾವಧಿ ಮತ್ತು ಮಧ್ಯಮಾವಧಿ ಭತ್ತದ ತಳಿಗಳನ್ನೇ ಬೆಳೆಯಿರಿ ಎಂದು ಕೃಷಿ ಇಲಾಖೆ ಅಧಿಕಾರಿಗಳು ಈಗಾಗಲೇ ರೈತರಿಗೆ ಸಲಹೆ ಕೊಡುತ್ತಿದ್ದಾರೆ. ಈ ವರ್ಷದ ವಾತಾವರಣ, ಹವಾಮಾನ ಇಲಾಖೆಯ ದೀರ್ಘಕಾಲೀನ ಮುನ್ಸೂಚನೆ ಹಾಗೂ ಕೃಷಿ ಇಲಾಖೆ ಅಧಿಕಾರಿಗಳ ಸಲಹೆ ಗಮನಿಸಿದರೆ ಬೆಳೆ ವಿಮೆ ಮಾಡಿಸುವುದು ತೀರಾ ಅಗತ್ಯವಾಗಿದೆ ಎನ್ನುವುದು ಪ್ರಗತಿಪರ ರೈತರ ಅಭಿಪ್ರಾಯವಾಗಿದೆ.

ಈ ಮಧ್ಯೆ ಈಗಾಗಲೇ ಹಲವು ರೈತರು ಜೂನ್ ತಿಂಗಳಿನಲ್ಲೇ ದೀರ್ಘಕಾಲಿಕ ಭತ್ತದ ಬೀಜವನ್ನು ಖರೀದಿಸಿಟ್ಟುಕೊಂಡಿದ್ದಾರೆ. ಕಳೆದ ವಾರದ ಮಳೆಯ ಪ್ರಮಾಣ ಗಮನಿಸಿ ಮುಂದೆಯೂ ಇದೇ ರೀತಿ ಉತ್ತಮ ಮಳೆ ಬರಬಹುದು ಎಂಬ ನಿರೀಕ್ಷೆಯಲ್ಲಿ ದೀರ್ಘಕಾಲೀನ ಭತ್ತ ಬಿತ್ತಿದರೆ ಅಂತಹ ಬೆಳೆಗೆ ಮುಂದೆ ಕಾಯಿಲೆಗಳು ಕಾಡುವ ಎಲ್ಲ ಸಾಧ್ಯತೆಗಳೂ ಅಧಿಕವಾಗಿದ್ದು, ರೈತ ನಷ್ಟ ಅನುಭವಿಸಬೇಕಾಗುತ್ತದೆ.

ಮತ್ತೊಂದು ಕಡೆ ಹವಾಮಾನ ವೈಪರೀತ್ಯ ಈ ವರ್ಷ ಹೆಚ್ಚಾಗಿರುವುದರಿಂದ ಈಗಾಗಲೇ ಮುಸುಕಿನ ಜೋಳಕ್ಕೆ ಹಲವೆಡೆ ರೋಗಬಾಧೆ ಕಾಡುತ್ತಿದೆ. ಹೀಗಾಗಿ, ಕಳೆದೆಲ್ಲ ವರ್ಷಗಳಿಗಿಂತ ಹೆಚ್ಚು ಅನಿಶ್ಚಿತತೆ ಈ ವರ್ಷ ಇರುವುದರಿಂದ ರೈತರು ಬೆಳೆ ವಿಮೆ ಮಾಡಿಸುವುದು ಸೂಕ್ತ ಎನ್ನುತ್ತಾರೆ ಕೃಷಿ ಇಲಾಖೆ ಅಧಿಕಾರಿಗಳು.

ಜಿಲ್ಲೆಯ ಪ್ರಮುಖ ಬೆಳೆಯಾದ ಮಳೆಯಾಶ್ರಿತ ಭತ್ತ ಬೆಳೆಯನ್ನು ಗ್ರಾಮ ಪಂಚಾಯಿತಿ ಮಟ್ಟದಲ್ಲಿ ಅಧಿಸೂಚಿಸಲಾಗಿದ್ದು, ಹೋಬಳಿ ಮಟ್ಟದಲ್ಲಿ ಭತ್ತ ನೀರಾವರಿ ಮತ್ತು ಮುಸುಕಿನ ಜೋಳ ಮಳೆಯಾಶ್ರಿತ ಎಂದು ಅಧಿಸೂಚಿಸಲಾಗಿದೆ. ಅಲ್ಲದೆ ಕೊಡಗು ಜಿಲ್ಲೆಗೆ ಇಂಡಸ್ ಇಂಡ್ ಜನರಲ್ ಇನ್‌ಶೂರೆನ್ಸ್ ಕಂಪನಿಯನ್ನು 2026-27ನೇ ಸಾಲಿಗೆ ಅನುಷ್ಠಾನ ಸಂಸ್ಥೆಯನ್ನಾಗಿ ಆಯ್ಕೆ ಮಾಡಲಾಗಿದೆ ಎಂದು ಕೃಷಿ ಇಲಾಖೆಯ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ತೋಟಗಾರಿಕಾ ಬೆಳೆಗಳಾದ ಕಾಳುಮೆಣಸು ಮತ್ತು ಅಡಿಕೆ ಬೆಳೆಗೆ ಮರು ವಿನ್ಯಾಸಗೊಳಿಸಿದ ಹವಾಮಾನ ಆಧಾರಿತ ಬೆಳೆ ವಿಮಾ ಯೋಜನೆಯ ಅನುಷ್ಠಾನಗೊಳಿಸಲು ಕೊಡಗು ಜಿಲ್ಲೆಗೆ ಯುನೈಟೆಡ್ ಇಂಡಿಯಾನ್ ಇನ್‌ಶೂರೆನ್ಸ್ ಕಂಪನಿಗೆ ವಿಮಾ ಜವಾಬ್ದಾರಿ ಹಂಚಿಕೆಯಾಗಿದೆ. ಬೆಳೆ ಸಾಲ ಪಡೆದ ಹಾಗೂ ಪಡೆಯದ ವಿಮಾ ಪಡೆಯಲು ಬಯಸುವ ರೈತತರು ರಾಷ್ಟ್ರೀಕೃತ ಬ್ಯಾಂಕ್, ಗ್ರಾಮ ಒನ್ ಅಥವಾ ಸಾಮಾನ್ಯ ಸೇವಾ ಕೇಂದ್ರಗಳಲ್ಲಿ ಅರ್ಜಿ ಸಲ್ಲಿಸಬಹುದು. ಸಾಲ ಪಡೆಯದ ರೈತರು ಪಹಣಿ, ಬ್ಯಾಂಕ್ ಪಾಸ್ ಪುಸ್ತಕ ಮತ್ತು ಆಧಾರ್ ಕಾರ್ಡ್ ಸಲ್ಲಿಸುವುದು ಕಡ್ಡಾಯವಾಗಿದೆ.

"

ಮಳೆಯ ಪರಿಸ್ಥಿತಿ ಹಿನ್ನೆಲೆಯಲ್ಲಿ ರೈತರು ಈ ವರ್ಷ ಧೀರ್ಘಾವಧಿ ಭತ್ತ ಬೆಳೆಯುವುದು ಸೂಕ್ತ ಅಲ್ಲ. ಅಲ್ಪಾವಧಿ ಅಥವಾ ಮಧ್ಯಮಾವಧಿ ಭತ್ತ ಬೆಳೆಯಬಹುದಾಗಿದೆ. ರೈತರು ಬೆಳೆ ವಿಮೆ ಮಾಡಿಸುವುದು ಸೂಕ್ತ. ನಿಗದಿತ ದಿನಾಂಕದ ಒಳಗೆ ವಿಮಾ ಕಂತು ಪಾವತಿಸಿ ನೋಂದಣಿ ಮಾಡಿಕೊಳ್ಳಬೇಕು. ನಷ್ಟ ಸಂಭವಿಸಿದಾಗ ನಿಯಮಾನುಸಾರ ಗಮನಕ್ಕೆ ತರಬೇಕು. ಹಾನಿ ಸಂಭವಿಸಿದ 2 ದಿನಗಳ ಒಳಗೆ ದೂರು ದಾಖಲಿಸಿದರೆ ಪರಿಶೀಲನೆಯ ನಂತರ ಪರಿಹಾರ ಪ್ರಕ್ರಿಯೆ ಆರಂಭವಾಗುತ್ತದೆ

— ಚಂದ್ರಶೇಖರ್, ಜಂಟಿ ನಿರ್ದೇಶಕ, ಕೃಷಿ ಇಲಾಖೆ, ಕೊಡಗು