ಚಿಕ್ಲಿಹೊಳೆ ಆಟಕ್ಕುಂಟು ಲೆಕ್ಕಕ್ಕಿಲ್ಲ

ನಮ್ಮ ತಂದೆಯ ತಂದೆಯ ಕಾಲದಿಂದಲೂ ನಾವು ನಮ್ಮ ಗದ್ದೆಯಲ್ಲಿ ಭತ್ತದ ಬೇಸಾಯ ಮಾಡುತ್ತಿದ್ದೇವೆ. ಜೂನ್ ತಿಂಗಳ ಕೊನೆಯಲ್ಲಿ ಅಥವಾ ಜುಲೈ ತಿಂಗಳ ಪ್ರಾರಂಭದಲ್ಲಿ ಚಿಕ್ಲಿಹೊಳೆ ಜಲಾಶಯದಿಂದ ನಮ್ಮ ಗದ್ದೆಗಳಿಗೆ ನೀರು ಹರಿಸುವ ಕಾರ್ಯ ನಡೆಸಲಾಗುತ್ತಿತ್ತು. ಅಲ್ಲದೆ ನಾಳೆಯೊಳಗೆ ಬೆಳೆದಿರುವ ಗಿಡ ಗಂಟಿಗಳನ್ನು ಕಡೆದು ಸ್ವಚ್ಛಗೊಳಿಸಲಾಗುತ್ತಿತ್ತು. ಆದರೆ ಇತ್ತೀಚಿನ ದಿನಗಳಲ್ಲಿ ಇಲಾಖೆಯು ಈ ಭಾಗದ ರೈತರನ್ನು ಕಳೆಗಣಿಸುತ್ತಿದೆ. ನಾವುಗಳು ಕೆರೆ ಹಾಗೂ ಕೊಳವೆ ಬಾವಿಗಳ ನೀರನ್ನು ಬಳಸಿ ಸಸಿ ಮಾಡಿ ತಯಾರಿಸಿ ನೀರಿಗಾಗಿ ಕಾಯುತ್ತಿದ್ದೇವೆ.

— ಕೊಡೆಕಲ್ ಕುಶಾಲಪ್ಪ, ರೈತ, ದೊಡ್ಡಬೆಟ್ಟಗೇರಿ ಗ್ರಾಮ

ಚಿಕ್ಲಿಹೊಳೆ ಜಲಾಶಯ ಭರ್ತಿ ಆಗಿದ್ದರೂ ನಾಲೆಗಳಿಗೆ ತಡವಾಗಿ ನೀರು ಬಿಡಲಾಗಿದೆ. ಅದು ಕೂಡ ನೀರಿನ ಪ್ರಮಾಣ ತುಂಬಾ ಕಡಿಮೆ ಇದೆ. ತಳಭಾಗದ ರಂಗಸಮುದ್ರ ಗ್ರಾಮಕ್ಕೂ ಇದು ಸಾಕಾಗುವುದಿಲ್ಲ. ಬಾಳುಗೋಡು ಭಾಗಕ್ಕೆ ಈ ನೀರು ಬರುವಾಗ ನಮ್ಮ ಗದ್ದೆಗಳಲ್ಲಿ ಕಳೆ ಕೆಲಸ ಶುರುವಾಗಿರುತ್ತದೆ. ಅಣೆಕಟ್ಟೆಯನ್ನು ಸರಿಯಾಗಿ ನಿರ್ವಹಣೆ ಮಾಡಿ ಸಕಾಲದಲ್ಲಿ ರೈತರಿಗೆ ನೀರು ಕೊಟ್ಟರೆ ಈ ವ್ಯಾಪ್ತಿಯಲ್ಲಿ ಉತ್ತಮವಾಗಿ ಭತ್ತದ ವ್ಯವಸಾಯ ಮಾಡಬಹುದಾಗಿದೆ.

— ಶಿವಕುಮಾರ್, ರೈತ, ದೊಡ್ಡಬೆಟ್ಟಗೇರಿ ಗ್ರಾಮ

ಚಿಕ್ಲಿಹೊಳೆ ಜಲಾಶಯದ ಬಲದಂಡೆಯ ಹೊಸ ನಾಲೆ ಕುಶಾಲನಗರದ ಸುಂದರನಗರ ಗ್ರಾಮಕ್ಕೆ ಕೊನೆಯ ಹಂತದಲ್ಲಿ ತಲುಪಲಿದೆ. ಆದರೆ ಒಟ್ಟು 15ನೇ ಕಿಲೋಮೀಟರ್ ತನಕ ಭತ್ತ ಬೆಳೆಯುವ ವ್ಯಾಪ್ತಿ ಇದ್ದು ಉಳಿದ ಭಾಗದಲ್ಲಿ ಈ ಜಲಾಶಯದ ನೀರಿನ ಅವಶ್ಯಕತೆ ಇಲ್ಲ. ಆ ಭಾಗದ ರೈತರು ತಮ್ಮ ಜಾಗವನ್ನು ವಾಪಸ್ ನೀಡುವಂತೆ ಒತ್ತಾಯಿಸುತ್ತಿದ್ದಾರೆ. ಆದರೆ ಒಳ್ಳೆಯ ಉದ್ದೇಶದಿಂದ ನಿರ್ಮಾಣವಾದ ಈ ಜಲಾಶಯ ಈಗ ವಿವಾದಕ್ಕೆ ಕಾರಣವಾಗಿದೆ. ಈ ನಾಲೆಯ ವ್ಯಾಪ್ತಿಯ ಜಾಗ ಕಳೆದುಕೊಂಡ ರೈತರಿಗೆ ಸರಿಯಾದ ಪರಿಹಾರವನ್ನು ಇದುವರೆಗೆ ಸರ್ಕಾರ ನೀಡಲಿಲ್ಲ.

— ಎಂ.ಡಿ. ಕೃಷ್ಣಪ್ಪ, ಯೋಜನೆಗಾಗಿ ಜಮೀನು ಕಳೆದುಕೊಂಡ ರೈತ

ರೈತರಿಗಾಗಿ ಈಗ ಕಾಲುವೆಗಳಲ್ಲಿ ನೀರು ಬಿಡಲಾಗಿದೆ. ಆರಂಭದಲ್ಲಿ ಸ್ವಲ್ಪ ಪ್ರಮಾಣದಲ್ಲಿ ನೀರು ಹರಿಸಲಾಗುತ್ತದೆ. ಒಮ್ಮೆಲೇ ಬಿಟ್ಟರೆ ಸೋರಿಗೆ ಆಗುವ ಸಾಧ್ಯತೆ ಇರುತ್ತದೆ. ಕ್ರಮೇಣ ನೀರಿನ ಪ್ರಮಾಣ ಹೆಚ್ಚು ಮಾಡಲಾಗುವುದು. ಅಗತ್ಯ ಇರುವ ಕಡೆಗಳಲ್ಲಿ ನಾಲೆಗಳನ್ನು ಸ್ವಚ್ಛ ಮಾಡಲಾಗಿದೆ. ಸಂಪೂರ್ಣ ದುರಸ್ತಿಗೆ ದೊಡ್ಡ ಮೊತ್ತದ ಹಣ ಬೇಕಾಗುತ್ತದೆ. ಆದರೆ ನಮಗೆ ಬರುತ್ತಿರುವ ಅನುದಾನ ತುಂಬಾ ಕಡಿಮೆ ಇರುವುದರಿಂದ ತುರ್ತು ಅಗತ್ಯಗಳಿಗಷ್ಟೇ ವಿನಿಯೋಗಿಸಲಾಗುತ್ತದೆ. ಸಮಸ್ಯೆಗಳನ್ನು ರೈತರು ಇಲಾಖೆ ಗಮನಕ್ಕೆ ತಂದರೆ ಆದ್ಯತೆ ಮೇಲೆ ಪರಿಹರಿಸಲಾಗುತ್ತದೆ.

— ಕಾವೇರಿ ನೀರಾವರಿ ನಿಗಮದ ಹೆಸರು ಹೇಳಲಿಚ್ಛಿಸದ ಅಧಿಕಾರಿ