ನದಿ ದಂಡೆ ಅತಿಕ್ರಮಣ, ಮಾಲಿನ್ಯಯುಕ್ತ ನೀರು ಸೇರ್ಪಡೆ, ಅವೈಜ್ಞಾನಿಕ ನೀರಾವರಿ, ಪ್ರವಾಸೋದ್ಯಮದ ಒತ್ತಡ ಮತ್ತಿತರ ಕಾರಣಗಳಿಂದ ಜೀವನದಿ ಕಾವೇರಿ ಅಪಾಯದಲ್ಲಿದೆ. ಬೇಸಿಗೆ ಅವಧಿಯಲ್ಲಿ ನೀರಿನ ಗುಣಮಟ್ಟ ಸಿ (ಮೀನುಗಾರಿಕೆ ಮತ್ತು ಇತರ ಚಟುವಟಿಕೆಗಳಿಗೆ ಸೂಕ್ತ) ವರ್ಗಕ್ಕೆ ತಲುಪಿರುತ್ತದೆ. ಮಳೆಗಾಲದಲ್ಲಿ ಬಿ (ಸಂಸ್ಕರಿಸಿದ ನಂತರವಷ್ಟೇ ಗೃಹಬಳಕೆಗೆ ಯೋಗ್ಯ) ವರ್ಗದಲ್ಲಿ ಇರುತ್ತದೆ. ತಲಕಾವೇರಿಯಿಂದ ಕೊಡಗಿನ ಗಡಿಭಾಗ ಶಿರಂಗಾಲದ ತನಕ ಒಟ್ಟು 23 ಗ್ರಾಮ ಪಂಚಾಯಿತಿಗಳು ಮತ್ತು ಒಂದು ಪುರಸಭೆ ಕಾವೇರಿ ನದಿ ದಂಡೆಯಲ್ಲಿದೆ. ಇಷ್ಟೂ ಜನವಸತಿ ಪ್ರದೇಶಗಳಲ್ಲಿ ಉತ್ಪಾದನೆಯಾಗುವ ತ್ಯಾಜ್ಯ ನೀರು ಯಾವುದೇ ಸಂಸ್ಕರಣೆ ಇಲ್ಲದೆ ನೇರವಾಗಿ ನದಿ ಸೇರುತ್ತಿದೆ.
