ಸರ್ವಶಕ್ತಿ ಸಂಪನ್ನೆ ಭದ್ರಕಾಳೇಶ್ವರಿ

ಮಕ್ಕಳಾಗದವರಿಗೆ ಸಂತಾನ ಭಾಗ್ಯ, ಉತ್ತಮ ಬೆಳೆ ಪಡೆಯಲು, ಪ್ರಕೃತಿ ವಿಕೋಪ ತಡೆಯುವುದು, ಕೃಷಿಕರ ಬೇಡಿಕೆ.. ಹೀಗೆ ಹಲವು ಬೇಡಿಕೆಗಳನ್ನು ದೇವಿ ಈಡೇರಿಸಿರುವ ಹಲವು ಉದಾಹರಣೆಗಳಿದ್ದು, ಇಂದಿಗೂ ಭಕ್ತರು ವಿವಿಧೆಡೆಯಿಂದ ಆಗಮಿಸಿ ಭಕ್ತಿಯಿಂದ ಬೇಡುವ ವಾಡಿಕೆ ಚಾಲ್ತಿಯಲ್ಲಿದೆ.

ಈ ಹಿಂದೆ ಪೂರ್ವಿಕರು ಬೇಟೆಯಾಡಿ ಬಂದ ಸಂದರ್ಭದಲ್ಲಿ ದೇವಿಗೆ ಪೂಜೆ ಸಲ್ಲಿಸಿ ಬಲಿ ಕೊಡುವುದು ವಾಡಿಕೆ. ಗ್ರಾಮದ ಒಳಿತಿಗೆ ನಂಬಿ ಬರುವ ಭಕ್ತರ ಬೇಡಿಕೆಗಳನ್ನು ದೇವಿ ಈಡೇರಿಸುತ್ತಾಳೆ ಎನ್ನುವುದಕ್ಕೆ 2018 ರಲ್ಲಿ ಸಂಭವಿಸಿದ ಭೀಕರ ಜಲಪ್ರಳಯವೇ ಸಾಕ್ಷಿ. ಭೀಕರ ಜಲಪ್ರಳಯ ಸಂಭವಿಸಿದಾಗ ದೇವಸ್ಥಾನದ ಆಸುಪಾಸು ಸಂಪೂರ್ಣ ಹಾನಿಗೀಡಾಗಿದ್ದರೂ ದೇವಸ್ಥಾನ ಒಂದು ಇಂಚು ಭೂಮಿಗೆ ಯಾವುದೇ ರೀತಿಯ ಹಾನಿ ಆಗಿರಲಿಲ್ಲ. ಇದು ಪವಾಡ ಸದೃಶ್ಯವೇ ಸರಿ ಎನ್ನುತ್ತಾರೆ ಗ್ರಾಮಸ್ಥರು.

ಮಾರ್ಚ್ ಹಾಗೂ ಏಪ್ರಿಲ್‌ನಲ್ಲಿ 2 ವರ್ಷಕ್ಕೋಮ್ಮೆ ವಾರ್ಷಿಕ ಹಬ್ಬ ಅದ್ದೂರಿಯಾಗಿ ನಡೆಯುತ್ತಿದೆ. ಈ ಸಂದರ್ಭ ಹಾಲೇರಿ, ಕೊಪ್ಪತ್ತೂರು, ಕಾಂಡನಕೊಲ್ಲಿ, ಎಮ್ಮತ್ತಾಳು ಹಾಗೂ ಕಡಂದಾಳು ಗ್ರಾಮಗಳ ಜನತೆ ಸಾವಿರಾರು ಸಂಖ್ಯೆಯಲ್ಲಿ ಆಗಮಿಸುತ್ತಾರೆ. ಸಾಕಷ್ಟು ಜನರು ತಮ್ಮ ಹರಕೆಗಳನ್ನು ಈ ಸಂದರ್ಭ ಸಲ್ಲಿಸುವುದು ವಾಡಿಕೆ. ಅಲ್ಲದೆ ವರ್ಷದಿಂದ ವರ್ಷಕ್ಕೆ ಭಕ್ತರ ಸಂಖ್ಯೆ ಏರಿಕೆಯಾಗುತ್ತಿದೆ. ಗ್ರಾಮದಲ್ಲಿ ನೆಲೆಸಿರುವವರು ಗ್ರಾಮದ ವಾರ್ಷಿಕೋತ್ಸವದಲ್ಲಿ ಪಾಲ್ಗೊಂಡು ತಮ್ಮ ಹರಕೆಯನ್ನು ಸಮರ್ಪಿಸುತ್ತಾರೆ. ದೇವಿಯಲ್ಲಿ ನಂಬಿಕೆ ಇರಿಸಿ ಬರುವವರಿಗೆ ದೇವಿ ನಂಬಿಕೆಗೆ ಕಿಂಚಿತ್ತೂ ಕುತ್ತು ಬಾರದಂತೆ ನೋಡಿಕೊಳ್ಳುತ್ತಾಳೆ.