ಅಂಗನವಾಡಿಗಳಿಗೆ ಚಿತ್ತಾಕರ್ಷಕ ಬಣ್ಣಗಳ ಸಿಂಗಾರ

ಅಭಿವೃದ್ಧಿಪಡಿಸಿದ ನಂತರ ಆಕರ್ಷಕ ರೂಪ ಪಡೆದುಕೊಂಡ ಮಾದಾಪಟ್ಟಣ ಗ್ರಾಮದ ಅಂಗನವಾಡಿ

Published on:

07 Aug 2026, 11:41 am

ಮಡಿಕೇರಿ:

ಗುಡ್ಡೆಹೊಸೂರು ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಅಂಗನವಾಡಿಗಳು ಹೊಸ ರೂಪ ಪಡೆದುಕೊಳ್ಳುತ್ತಿವೆ. ಮಕ್ಕಳು ಮತ್ತು ಪೋಷಕರನ್ನು ಆಕರ್ಷಿಸುವ ನಿಟ್ಟಿನಲ್ಲಿ ವಿವಿಧ ಬಣ್ಣಗಳಿಂದ ಸಿಂಗಾರಗೊಳಿಸಲಾಗುತ್ತಿದ್ದು, ಪುಟಾಣಿಗಳಲ್ಲಿ ಸೃಜನಶೀಲತೆ ಜತೆ ಕಲಿಕೆಯ ಬಗ್ಗೆ ಆಸಕ್ತಿ ಹೆಚ್ಚಿಸಲು ಶಿಶುಸ್ನೇಹಿ ಕೇಂದ್ರಗಳನ್ನಾಗಿ ಪರಿವರ್ತಿಸಲಾಗುತ್ತಿದೆ. ಪಂಚಾಯಿತಿಯಲ್ಲಿ ಸಂಗ್ರಹವಾಗುವ ಆರೋಗ್ಯ ಕರವನ್ನು ಇದಕ್ಕಾಗಿ ಬಳಸಿಕೊಳ್ಳುತ್ತಿರುವುದು ವಿಶೇಷ.

ಮಕ್ಕಳಿಗೆ ಮನೆಯೇ ಮೊದಲ ಪಾಠಶಾಲೆಯಾದರೆ ಅಂಗನವಾಡಿ ಮಗುವಿನ ಜೀವನದ ಮೊದಲ ಶಿಕ್ಷಣ ಸಂಸ್ಥೆಯಾಗಿದೆ. ಬಡ ಮತ್ತು ಗ್ರಾಮೀಣ ಭಾಗದ ಮಕ್ಕಳಿಗೆ ಸಮಾನ ಶಿಕ್ಷಣ ಮತ್ತು ಪೌಷ್ಟಿಕಾಂಶ ತಲುಪಿಸುವಲ್ಲಿ ಅಂಗನವಾಡಿಗಳ ಕೊಡುಗೆ ಅಪಾರ. ಮಗುವಿನ ಭವಿಷ್ಯದ ಶೈಕ್ಷಣಿಕ ಸಾಧನೆಗೆ ಗಟ್ಟಿ ಬುನಾದಿ ಹಾಕುವ ಉದ್ಯಾನವನಗಳೇ ಈ ಅಂಗನವಾಡಿಗಳು. ಪ್ರತಿಯೊಂದು ಮಗುವಿನ ಸಮಗ್ರ ವಿಕಾಸಕ್ಕೆ ಅಂಗನವಾಡಿಗಳ ಬಲವರ್ಧನೆ ಅತ್ಯಗತ್ಯ. ಈ ನಿಟ್ಟಿನಲ್ಲಿ ಗ್ರಾಮೀಣ ಭಾಗದ ಮಕ್ಕಳ ಬಾಲ್ಯಕ್ಕೆ ಬಲ ತುಂಬುವ ಹಾಗೂ ಅವರ ಆರಂಭಿಕ ಶಿಕ್ಷಣಕ್ಕೆ ಬಲಿಷ್ಠ ಅಡಿಪಾಯ ಹಾಕುವ ಸಲುವಾಗಿ ಗುಡ್ಡೆಹೊಸೂರು ಗ್ರಾಮ ಪಂಚಾಯತಿ ಮಾದರಿ ಹೆಜ್ಜೆಯನ್ನಿಟ್ಟಿದೆ.

ಮಗುವಿನ ಜೀವನದ ಮೊದಲ 6 ವರ್ಷಗಳು ಅದರ ದೈಹಿಕ, ಮಾನಸಿಕ ಮತ್ತು ಭಾವನಾತ್ಮಕ ಬೆಳವಣಿಗೆಯ ದೃಷ್ಟಿಯಿಂದ ಅತ್ಯಂತ ಸೂಕ್ಷ್ಮ ಹಾಗೂ ಪ್ರಮುಖವಾದವು. ಈ ವಯಸ್ಸಿನಲ್ಲಿ ಮಗುವಿನ ಮಿದುಳಿನ ಬೆಳವಣಿಗೆ ಅತ್ಯಂತ ವೇಗವಾಗಿ ನಡೆಯುತ್ತದೆ. ಇಂತಹ ಸುಸಮಯದಲ್ಲಿ ಮಕ್ಕಳ ಅಡಿಪಾಯವನ್ನು ಗಟ್ಟಿಗೊಳಿಸುವಲ್ಲಿ ಅಂಗನವಾಡಿ ಕೇಂದ್ರಗಳು ಅತ್ಯಂತ ಪ್ರಮುಖ ಪಾತ್ರ ವಹಿಸುತ್ತವೆ. ಅಂಗನವಾಡಿಗಳು ಕೇವಲ ಮಕ್ಕಳನ್ನು ನೋಡಿಕೊಳ್ಳುವ ಕೇಂದ್ರಗಳಾಗಿರದೆ, ಅವರ ಶೈಕ್ಷಣಿಕ, ಸಾಮಾಜಿಕ ಮತ್ತು ದೈಹಿಕ ವಿಕಾಸಕ್ಕೆ ನಾಂದಿ ಹಾಡುವ ಪ್ರಮುಖ ಕೇಂದ್ರಗಳಾಗಿವೆ. ಅಂಗನವಾಡಿಗಳು 3 ರಿಂದ 6 ವರ್ಷದ ಮಕ್ಕಳಿಗೆ ಆಟದ ಮೂಲಕ ಕಲಿಕೆ ಎಂಬ ತತ್ವದ ಮೇಲೆ ಶಾಲಾ ಪೂರ್ವ ಶಿಕ್ಷಣವನ್ನು ನೀಡುತ್ತವೆ. ಇದನ್ನು ಗಮನದಲ್ಲಿ ಇಟ್ಟುಕೊಂಡು ಗುಡ್ಡೆಹೊಸೂರು ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಅಂಗನವಾಡಿ ಕೇಂದ್ರಗಳಿಗೆ ಸಂಪೂರ್ಣ ನವೀಕರಣದ ಸ್ಪರ್ಶ ನೀಡಿ, ಅದನ್ನು ಆಧುನಿಕ ಹಾಗೂ ಶಿಶುಸ್ನೇಹಿ ಕೇಂದ್ರವನ್ನಾಗಿ ಪರಿವರ್ತಿಸುವಲ್ಲಿ ಗುಡ್ಡೆಹೊಸೂರು ಪಂಚಾಯತಿ ಕಾರ್ಯೋನ್ಮುಖವಾಗಿದೆ.

ಅಂಗನವಾಡಿಗಳಲ್ಲಿ ವರ್ಣಮಾಲೆಗಳು, ಸಂಖ್ಯೆಗಳು, ಬಣ್ಣಗಳು, ಆಕಾರಗಳು ಮತ್ತು ಪ್ರಾಣಿ-ಪಕ್ಷಿಗಳ ಪರಿಚಯವನ್ನು ಚಿತ್ರಗಳು ಮತ್ತು ಆಟಿಕೆಗಳ ಮೂಲಕ ಮಾಡಿಕೊಡಲಾಗುತ್ತದೆ. ಮಗು ಮನೆಯ ವಾತಾವರಣದಿಂದ ಹೊರಬಂದು, ಔಪಚಾರಿಕ ಶಾಲೆಗೆ ಹೋಗಲು ಮಾನಸಿಕವಾಗಿ ಸಿದ್ಧವಾಗಲು ಅಂಗನವಾಡಿ ಸಹಾಯ ಮಾಡುತ್ತದೆ. ಮಗು ಇತರ ಮಕ್ಕಳೊಂದಿಗೆ ಬೆರೆಯುವುದು, ಹಂಚಿಕೊAಡು ತಿನ್ನುವುದು, ಸರದಿಯಲ್ಲಿ ಕಾಯುವುದು ಮತ್ತು ಸಹಕಾರದಿಂದ ಇರುವುದನ್ನು ಕಲಿಯುತ್ತದೆ. ಬಣ್ಣ ತುಂಬುವುದು, ಮಣ್ಣಿನ ಆಟಿಕೆ ಮಾಡುವುದು, ಕಾಗದ ಮಡಚುವುದು ಮತ್ತು ಹೊರಾಂಗಣ ಆಟಗಳಿಂದ ಮಕ್ಕಳ ಸ್ನಾಯುಗಳ ಬೆಳವಣಿಗೆ ಮತ್ತು ಕೈ-ಕಣ್ಣುಗಳ ಸಮನ್ವಯತೆ ಹೆಚ್ಚುತ್ತದೆ ಇದಕ್ಕೆ ಪೂರಕವಾಗಿ ಪಂಚಾಯಿತಿ ವ್ಯಾಪ್ತಿಯ ಅಂಗನವಾಡಿಗಳಲ್ಲಿ ನಿರಂತರ ಶ್ರಮ ಮತ್ತು ಕಾಳಜಿಯಿಂದಾಗಿ ಸುಸಜ್ಜಿತ ಹಾಗೂ ಆಕರ್ಷಕ ವಾತಾವರಣ ರೂಪಿಸಲಾಗುತ್ತಿದೆ.

ಮಕ್ಕಳ ಕಲಿಕೆ ಮತ್ತು ಆಟದ ವಾತಾವರಣವನ್ನು ಆಹ್ಲಾದಕರಗೊಳಿಸುವ ಉದ್ದೇಶದಿಂದ ಹಲವು ನೂತನ ಸೌಕರ್ಯಗಳನ್ನು ಇಲ್ಲಿ ಕಲ್ಪಿಸಲಾಗಿದೆ.

ಅಂಗನವಾಡಿಯ ಗೋಡೆಗಳಿಗೆ ಚಿತ್ತಾರಗಳಿಂದ ಕೂಡಿದ ಮನಮೋಹಕ ವರ್ಣಗಳನ್ನು ಬಳಿಯಲಾಗಿದ್ದು, ಮಕ್ಕಳನ್ನು ಆಕರ್ಷಿಸುವಂತೆ ವಿನ್ಯಾಸಗೊಳಿಸಲಾಗಿದೆ. ಅಂಗನವಾಡಿಗಳಲ್ಲಿ ಶುಚಿತ್ವಕ್ಕೆ ಆದ್ಯತೆ ನೀಡಲಾಗಿದ್ದು, ಸುಂದರವಾದ ಫ್ರೆಂಚ್ ಶೈಲಿಯ ಫ್ಲೋರಿಂಗ್ ಮಾಡಿಸಲಾಗಿದೆ. ಮಕ್ಕಳು ಆಟವಾಡುವಾಗ ಗಾಯಗೊಳ್ಳದಂತೆ ತಡೆಯಲು ಉತ್ತಮ ಗುಣಮಟ್ಟದ ಫ್ಲೋರ್ ಮ್ಯಾಟ್‌ಗಳನ್ನು ಅಳವಡಿಸಲಾಗಿದೆ.

ಸಣ್ಣ ಮಕ್ಕಳಿಗೆ ಕುಳಿತುಕೊಳ್ಳಲು ಅನುಕೂಲವಾಗುವಂತೆ ವರ್ಣರಂಜಿತ ಕುರ್ಚಿ-ಮೇಜುಗಳ ವ್ಯವಸ್ಥೆ ಮಾಡಲಾಗಿದೆ. ಜತೆಗೆ, ಮಕ್ಕಳ ಸೃಜನಶೀಲತೆ ಹೆಚ್ಚಿಸಲು ಆಧುನಿಕ ಆಟಿಕೆಗಳು ಹಾಗೂ ಗುಣಮಟ್ಟದ ಕಲಿಕಾ ಸಾಮಗ್ರಿಗಳನ್ನು ಒದಗಿಸಲಾಗಿದೆ. ಬದಲಾಗುತ್ತಿರುವ ಕಾಲಕ್ಕೆ ತಕ್ಕಂತೆ ಗ್ರಾಮೀಣ ಮಕ್ಕಳಿಗೂ ಡಿಜಿಟಲ್ ಶಿಕ್ಷಣ ಸಿಗಬೇಕೆಂಬ ಉದ್ದೇಶದಿಂದ ಅಂಗನವಾಡಿಯಲ್ಲಿ ಸ್ಮಾರ್ಟ್ ಟಿವಿ ಹಾಗೂ ಇಂಟರ್ನೆಟ್ ಸೌಲಭ್ಯ ಕಲ್ಪಿಸಲಾಗಿದೆ. ದೃಶ್ಯ-ಶ್ರವಣ ಮಾಧ್ಯಮದ ಮೂಲಕ ಮಕ್ಕಳಿಗೆ ಕಥೆಗಳು, ಹಾಡುಗಳು ಹಾಗೂ ಮೂಲಭೂತ ಕಲಿಕಾ ವಿಷಯಗಳನ್ನು ಅತ್ಯಂತ ಸುಲಭವಾಗಿ ಮತ್ತು ಆಸಕ್ತಿದಾಯಕವಾಗಿ ಕಲಿಸಲು ಇದು ಪೂರಕವಾಗಿದೆ.

ಮಕ್ಕಳ ಆರೋಗ್ಯ ಮತ್ತು ನೈರ್ಮಲ್ಯಕ್ಕೆ ಪಂಚಾಯತಿ ಹೆಚ್ಚಿನ ಆದ್ಯತೆ ನೀಡಿದೆ. ಬೇಸಿಗೆಯಲ್ಲಿ ತಂಪಾದ ವಾತಾವರಣಕ್ಕಾಗಿ ಫ್ಯಾನ್ ಹಾಗೂ ಸೂಕ್ತ ಬೆಳಕಿನ ಸೌಲಭ್ಯ ಮಾಡಿಕೊಡಲಾಗಿದೆ. ಮಕ್ಕಳ ಆರೋಗ್ಯ ರಕ್ಷಣೆಗೆ ಶುದ್ಧ ಕುಡಿಯುವ ನೀರಿನ ಘಟಕದ ವ್ಯವಸ್ಥೆöಇದೆ. ಸಣ್ಣ ಮಕ್ಕಳು ಸುಲಭವಾಗಿ ಬಳಸಬಹುದಾದ ನೈರ್ಮಲ್ಯ ಪೂರ್ಣ ಶೌಚಾಲಯ, ಮಕ್ಕಳಿಗೆ ನೀಡುವ ಪೌಷ್ಟಿಕ ಆಹಾರವನ್ನು ಸ್ವಚ್ಛತೆಗೆ ಆದ್ಯತೆ ಕೊಟ್ಟು ತಯಾರಿಸಲು ಸುಸಜ್ಜಿತ ಅಡುಗೆ ಮನೆ ನಿರ್ಮಿಸಿಕೊಡಲಾಗಿದೆ.

ಈ ಬದಲಾವಣೆ ಹಿಂದೆ ಗ್ರಾಮ ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿ ಎಂ.ಆರ್. ಸುಮೇಶ್ ಅವರ ಶ್ರಮ ಮತ್ತು ಉತ್ಸಾಹ ಎದ್ದು ಕಾಣುತ್ತಿದೆ. ಪಂಚಾಯಿತಿಯಲ್ಲಿ ಸಂಗ್ರಹವಾಗುವ ಆರೋಗ್ಯ ಕರವನ್ನು ಬಳಸಿಕೊಳ್ಳಲು ಇರುವ ಅವಕಾಶವನ್ನೇ ಸದುಪಯೋಗಪಡಿಸಿಕೊಂಡು ಅಂಗನವಾಡಿಗಳನ್ನು ಅಭಿವೃದ್ಧಿಗೊಳಿಸುತ್ತಿದ್ದಾರೆ. ಈಗಾಗಲೇ ಗುಡ್ಡೆಹೊಸೂರು ಮತ್ತು ಮಾದಾಪಟ್ಟಣ ಗ್ರಾಮದ ಅಂಗನವಾಡಿಗಳು ರೂಪಾಂತರ ಪಡೆದುಕೊಂಡಿವೆ. ಮುಂದೆ ಚಿಕ್ಕಬೆಟಗೇರಿ ಗ್ರಾಮದ ಅಂಗನವಾಡಿಯನ್ನೂ ಅಭಿವೃದ್ಧಿಪಡಿಸಲು ಯೋಜಿಸಲಾಗಿದೆ. ಇದಕ್ಕಾಗಿ ತಲಾ 5 ಲಕ್ಷ ರೂ. ವೆಚ್ಚ ಮಾಡಲಾಗುತ್ತಿದೆ.

ಗುಡ್ಡೆಹೊಸೂರು ಪಂಚಾಯಿತಿ ವ್ಯಾಪ್ತಿಯ ಬಸವನಹಳ್ಳಿ 1, ಬಸವನಹಳ್ಳಿ 2 ಹಾಗೂ ಅತ್ತೂರು ಗ್ರಾಮದಲ್ಲಿರುವ ಅಂಗನವಾಡಿಗಳನ್ನೂ ಈಗಾಗಲೇ ತಾಲೂಕು ಪಂಚಾಯಿತಿ ಅನುದಾನದಲ್ಲಿ ಅಭಿವೃದ್ಧಿಪಡಿಸಲಾಗಿದೆ. ಈ ಮೂರು ಅಂಗನವಾಡಿಗಳಿಗಳಿಗೂ ಕಲಿಕೋಪಕರಣಗಳನ್ನು ಪೂರೈಸಲು ತಲಾ 1 ಲಕ್ಷ ರೂ. ಮೀಸಲಿಡಲಾಗಿದೆ.

ಅಂಗನವಾಡಿಗಳ ಈ ಅಭೂತಪೂರ್ವ ಬದಲಾವಣೆಯಿಂದಾಗಿ ಗ್ರಾಮದ ಮಕ್ಕಳು ಮತ್ತು ಪೋಷಕರು ಖುಷಿಯಾಗಿದ್ದಾರೆ. ಮಕ್ಕಳ ಬೌದ್ಧಿಕ ಹಾಗೂ ಶಾರೀರಿಕ ಬೆಳವಣಿಗೆಗೆ ಪ್ರೇರಕವಾಗಿರುವ ಇಂತಹ ಅತ್ಯುತ್ತಮ ವಾತಾವರಣ ನಿರ್ಮಿಸಿದ ಗುಡ್ಡೆಹೊಸೂರು ಗ್ರಾಮ ಪಂಚಾಯತಿಯ ಶ್ರಮಕ್ಕೆ ಸ್ಥಳೀಯರಿಂದ ಮತ್ತು ಸಾರ್ವಜನಿಕರಿಂದ ವ್ಯಾಪಕ ಶ್ಲಾಘನೆ ವ್ಯಕ್ತವಾಗುತ್ತಿದೆ. ಇತರ ಗ್ರಾಮ ಪಂಚಾಯತಿಗಳಿಗೂ ಮಾದರಿಯಾಗಿರುವ ಈ ಅಂಗನವಾಡಿ, ಇಂದಿನ ಗ್ರಾಮೀಣ ಸರ್ಕಾರಿ ಶಾಲೆ-ಅಂಗನವಾಡಿಗಳು ಹೈಟೆಕ್ ರೂಪ ತಳೆಯಬಹುದು ಎಂಬುದಕ್ಕೆ ಉದಾಹರಣೆ ಆಗಿದೆ.

ಅಂಗನವಾಡಿಗೆ ಬರುವ ಪುಟ್ಟಮಕ್ಕಳಿಗೆ ಉತ್ತಮ ಕಲಿಕಾ ವಾತಾವರಣ ಇರಬೇಕು. ಈ ನಿಟ್ಟಿನಲ್ಲಿ ನಮ್ಮ ಪಂಚಾಯಿತಿ ಅನುದಾನ ಉಪಯೋಗಿಸಿ ಅಂಗನವಾಡಿಗಳನ್ನು ಆಕರ್ಷಕವಾಗಿ ರೂಪಿಸಲಾಗುತ್ತಿದೆ. ಪಂಚಾಯಿತಿಯಲ್ಲಿ ಸಂಗ್ರಹ ಆಗುವ ಆರೋಗ್ಯ ಕರದಲ್ಲಿನ ಅನುದಾನ ಬಳಸಿಕೊಂಡು ಅಂಗನವಾಡಿಗಳನ್ನು ಚೆಂದಗೊಳಿಸಲಾಗುತ್ತಿದೆ. ನಮ್ಮ ಪಂಚಾಯಿತಿ ವ್ಯಾಪ್ತಿಯಲ್ಲಿ ಎಲ್ಲಾ ಅಂಗನವಾಡಿ ಕೇಂದ್ರಗಳಲ್ಲೂ ಹಿರಿಯ ಅಧಿಕಾರಿಗಳ ಮಾರ್ಗದರ್ಶನ ಮತ್ತು ಸಹಕಾರದಿಂದ ಇಂಥ ವ್ಯವಸ್ಥೆ ಮಾಡಿಕೊಡಲಾಗುತ್ತದೆ.

— ಎಂ.ಆರ್. ಸುಮೇಶ್, ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿ, ಗುಡ್ಡೆಹೊಸೂರು

ನಮ್ಮ ಊರಿನ ಅಂಗನವಾಡಿ ಈಗ ಅತ್ಯಂತ ಸುಂದರ ಮತ್ತು ಸುರಕ್ಷಿತವಾಗಿ ಬದಲಾಗಿದೆ. ಮಕ್ಕಳನ್ನು ಕಳುಹಿಸಲು ಪೋಷಕರಾಗಿ ನಮಗೆ ಹೆಮ್ಮೆಯೆನಿಸುತ್ತಿದೆ. ಗ್ರಾಮ ಪಂಚಾಯಿತಿಯು ಮೂಲಸೌಕರ್ಯದ ಜತೆಗೆ ಶೈಕ್ಷಣಿಕ ಗುಣಮಟ್ಟ ಕಾಪಾಡಲು ತೋರುತ್ತಿರುವ ಕಾಳಜಿ ಮಾದರಿಯಾಗಿದೆ. ಮಕ್ಕಳಲ್ಲಿ ಕಲಿಕೆಯ ಆಸಕ್ತಿ ಹೆಚ್ಚಿಸಿ, ಗ್ರಾಮೀಣ ಶಿಕ್ಷಣಕ್ಕೆ ಹೊಸ ಮೆರುಗು ನೀಡಿದ ಗ್ರಾಮ ಪಂಚಾಯಿತಿ ಮತ್ತು ಅಂಗನವಾಡಿ ಸಿಬ್ಬಂದಿಗೆ ಶ್ರಮ ಶ್ಲಾಘನೀಯ.

— ಕುಸುಮಾವತಿ, ಪೋಷಕರು, ಗುಡ್ಡೆಹೊಸೂರು

Anganavadi