ಆನ್ಲೈನ್ ಮೂಲಕ ಅರ್ಜಿ ಸಲ್ಲಿಸಿದ 15 ದಿನಗಳಲ್ಲಿ ತಹಸೀಲ್ದಾರ್, ನಗರಾಭಿವೃದ್ಧಿ ಪ್ರಾಧಿಕಾರ ಹಾಗೂ ಉಪವಿಭಾಗಾಧಿಕಾರಿಗಳಿಂದ ವರದಿ ಪಡೆದು, ಒಟ್ಟು 30 ದಿನಗಳ ಕಾಲಮಿತಿಯೊಳಗೆ ಜಿಲ್ಲಾಧಿಕಾರಿ ನಿರ್ಧಾರ ಕೈಗೊಳ್ಳಬೇಕು. ಇಲ್ಲದಿದ್ದರೆ ತಗಾದೆ ನೋಟಿಸ್ ಜಾರಿಯಾಗಿ ಶುಲ್ಕ ಪಾವತಿಸಿದ ತಕ್ಷಣ ಡಿಜಿಟಲ್ ಸಹಿಯುಕ್ತ ಸ್ವಯಂಚಾಲಿತ ಭೂ ಪರಿವರ್ತನಾ ಆದೇಶ ಸೃಜನೆಯಾಗುತ್ತದೆ. ಬಗರ್ ಹುಕುಂ, ಸಕ್ರಮ ಅಥವಾ ಇತರ ಮಂಜೂರಾತಿ ನಿಯಮಗಳಡಿ ಖಾತೆ, ಪೋಡಿ ದುರಸ್ತಿಯಾಗಿ, ಸರ್ಕಾರದ ಪರಭಾರ ನಿರ್ಬಂಧ ಅವಧಿ ಮುಗಿದ ಜಮೀನುಗಳಿಗೆ ಮಾತ್ರ ಭೂ ಪರಿವರ್ತನೆಗೆ ಅವಕಾಶವಿದೆ. 2 ಎಕರೆವರೆಗೆ ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳ ಸ್ಥಾಪನೆ ಹಾಗೂ ನವೀಕರಿಸಬಹುದಾದ ಇಂಧನ ಯೋಜನೆಗಳಿಗೆ ಭೂ ಪರಿವರ್ತನೆ ಪ್ರಕ್ರಿಯೆಯಿಂದ ವಿನಾಯಿತಿ ನೀಡಲಾಗಿದೆ.
