ಅಧಿಕ ಆದಾಯ ಗಳಿಸುತ್ತಿರುವ ರೈತ ಉದಯಕುಮಾರ್

ಸುಮಾರು 40 ವರ್ಷದಿಂದ ಕೃಷಿಯಲ್ಲಿ ಅನುಭವವನ್ನು ಹೊಂದಿರುವ ಉದಯ್, ಮಿಶ್ರ ಬೆಳೆ ಪದ್ಧತಿಯನ್ನು ಅನುಸರಿಸಿ ಉತ್ತಮ ಇಳುವರಿಯನ್ನು ಪಡೆಯುವಲ್ಲಿ ಸಾಧನೆ ತೋರಿದ್ದಾರೆ. ಗಿಡಗಳ ಪೋಷಣೆಯನ್ನು ಸೂಕ್ತವಾಗಿ ನಿರ್ವಹಿಸಿದರೆ ಉತ್ತಮ ಫಸಲು ಪಡೆಯುವುದರೊಂದಿಗೆ ಲಾಭದಾಯಕವೂ ಆಗುತ್ತದೆ ಎಂಬುದಕ್ಕೆ ನಿದರ್ಶನವಾಗಿದ್ದಾರೆ.

ಇವರ ಜಮೀನಿನಲ್ಲಿ ವಾಣಿಜ್ಯ ಬೆಳೆಯಾಗಿ ರೋಬಸ್ಟಾ, ಅರೆಬಿಕಾ, ಕಾವೇರಿ ತಳಿಯ ಕಾಫಿ ಗಿಡಗಳನ್ನು ಬೆಳೆಸಿದ್ದಾರೆ. ಇದರಲ್ಲಿ ರೋಬಸ್ಟಾ ಕಾಫಿ ಗಿಡಗಳು ಶೇ. 80 ರಷ್ಟು ಇವೆ. ಉಳಿದವು ಶೇ. 20ರಷ್ಟು ಇವೆ. ಇದರೊಂದಿಗೆ ವಿವಿಧ ತಳಿಯ ಕಾಳುಮೆಣಸಿನ ಬಳ್ಳಿಗಳನ್ನು ಬೆಳೆಸಿದ್ದಾರೆ. ತೋಟದಲ್ಲಿರುವ ಹೆಚ್ಚಿನ ಮರಗಳನ್ನು ಸದುಪಯೋಗಪಡಿಸಿಕೊಂಡಿರುವ ಇವರು ಪ್ರತಿ ಮರದಲ್ಲೂ ಕಾಳುಮೆಣಸಿನ ಬಳ್ಳಿಗಳನ್ನು ಹಬ್ಬಿಸಿದ್ದಾರೆ.

ಪ್ರತಿವರ್ಷ ಬಳ್ಳಿಗಳಿಲ್ಲದ ಮರಗಳಿಗೆ ಹೊಸ ಬಳ್ಳಿಗಳನ್ನು ನಾಟಿ ಮಾಡುತ್ತಾರೆ. ಇದರೊಂದಿಗೆ ವಾರ್ಷಿಕವಾಗಿ ಅಡಿಕೆ, ತೆಂಗಿನ ಕೃಷಿಯಿಂದಲು ಉತ್ತಮ ಆದಾಯವನ್ನು ಉದಯ್ ಕುಮಾರ್ ಗಳಿಸಿಕೊಳ್ಳುತ್ತಿದ್ದಾರೆ. ತೋಟದ ಬದುಗಳಲ್ಲಿ ಹಾಗೂ ತೋಟದ ನಡುವಿನ ಮಾರ್ಗದ ಬದಿಯಲ್ಲಿ ಸಪೋಟಾ, ಸೀಬೆ, ಮಾವು , ನೇರಳೆ, ಕೈಹುಳಿ, ಲಿಂಬೆಗಿಡ, ಕಿತ್ತಳೆ, ಬಟರ್ ಫ್ರೂಟ್, ಹಲಸು, ಪಪ್ಪಾಯಿ ಹಾಗೂ ವಿವಿಧ ತಳಿಯ ಬಾಳೆಯ ಗಿಡಗಳನ್ನು ಬೆಳೆಸಿರುವುದು ವಿಶೇಷ. ಇವುಗಳಿಂದಲೂ ಆದಾಯವನ್ನು ಗಳಿಸುತ್ತಾ ಹಲವರಿಗೆ ಮಾದರಿ ಆಗಿದ್ದಾರೆ.

ನೀರು, ಗೊಬ್ಬರದ ನಿರ್ವಹಣೆ: ತೋಟದ ನಿರ್ವಹಣೆ ಸಮರ್ಪಕ ರೀತಿಯಲ್ಲಿ ಮಾಡಿದ್ದಲ್ಲಿ ಮಾತ್ರ ರೈತರು ಲಾಭವನ್ನು ಗಳಿಸಲು ಸಾಧ್ಯ. ಫಸಲು ನೀಡುವಂತಹ ಗಿಡ ಬಳ್ಳಿಗಳ ಬೆಳವಣಿಗೆಗೆ ಸಮಯಕ್ಕೆ ಸರಿಯಾಗಿ ಅಗತ್ಯ ಪೋಷಕಾಂಶ ಹಾಗೂ ನೀರನ್ನು ಒದಗಿಸದಿದ್ದರೆ ಲಾಭದ ಪ್ರಮಾಣ ಕಡಿಮೆಯಾಗುತ್ತದೆ ಎನ್ನುತ್ತಾರೆ ಉದಯ್‌ಕುಮಾರ್. ಫಸಲು ಕಚ್ಚುವಲ್ಲಿಂದ ನಿರಂತರವಾಗಿ ಫಸಲು ಬೆಳವಣಿಗೆ ಪೂರ್ಣಗೊಳ್ಳವವರೆಗೂ ಬೆಳೆಗಳತ್ತ ಗಮನ ಹರಿಸುವುದು ಬಹಳ ಮುಖ್ಯವಾಗಿದೆ. ಈ ಹಂತದಲ್ಲಿ ನಿರ್ಲಕ್ಷೃ ವಹಿಸಬಾರದು. ಸಮರ್ಪಕವಾಗಿ ಕೆಲಸ ನಿರ್ವಹಿಸಬೇಕು. ಇಲ್ಲದಿದ್ದರೆ ಇಳುವರಿ ಕುಂಠಿತವಾಗುತ್ತದೆ ಎನ್ನುತ್ತಾರೆ ಇವರು.

ಕಾಫಿ ಗಿಡಗಳ ಬೆಳವಣಿಗೆ ಹೆಚ್ಚಿನ ಮಹತ್ವ ನೀಡುವ ಇವರು ಪ್ರತಿ ಎರಡು ವರ್ಷಗಳಿಗೊಮ್ಮೆ ಪ್ರತಿ ಗಿಡಕ್ಕೆ ಒಂದು ಸರಣಿ ಗೊಬ್ಬರವನ್ನು ಪೂರೈಸುವುದರೊಂದಿಗೆ ತೋಟದ ಮಣ್ಣಿನ ಸಾರವನ್ನು ಕಾಪಾಡಲು ಸುಣ್ಣವನ್ನು ಒದಗಿಸುತ್ತಾರೆ. ವಾರ್ಷಿಕವಾಗಿ ಎರಡು ಬಾರಿ ರಾಸಾಯನಿಕ ಗೊಬ್ಬರಗಳಾದ ಡಿಎಪಿ, ಫೊಟ್ಯಾಷ್, ಯೂರಿಯಾ ಹಾಕುತ್ತಾರೆ. ಪ್ರತಿ ವರ್ಷವೂ ಮಣ್ಣಿನ ಪರೀಕ್ಷೆಯನ್ನು ಮಾಡಿ ಸಿ ಅದಕ್ಕೆ ಅನುಗುಣವಾಗಿ ಬೇರಿಗೆ ಬೇಕಾದಂತಹ ಪೋಷಕಾಂಶಗಳನ್ನು ಒದಗಿಸುತ್ತಾರೆ. ಗಿಡಗಳಿಗೆ ಬೇಕಾದ ರೀತಿಯ ಆಮ್ಲೀಯತೆಯನ್ನು ಕಾಪಾಡಿ ಉತ್ತಮ ರೀತಿಯಲ್ಲಿ ಸೂಕ್ಷ್ಮಾಣು ಜೀವಿಗಳು ಮಣ್ಣಿನಲ್ಲಿ ಉತ್ಪಾದನೆಯಾಗಲು ಸೂಕ್ತ ವಾತಾವರಣವನ್ನು ನಿರ್ಮಾಣ ಮಾಡಿಕೊಡುತ್ತಾರೆ. ಬೇಸಿಗೆಯ ಕಾಲದಲ್ಲಿ ಗಿಡಗಳು ಹಾಗೂ ಬಳ್ಳಿಗಳು ಒಣಗದಿರಲು ಹಾಗೂ ಬೆಳವಣಿಗೆ ಆಗಲು ಮೋಟಾರಿನ ಮೂಲಕ ಮೂರು ಬಾರಿ ನೀರನ್ನು ಒದಗಿಸುತ್ತಾರೆ.

ಬೇವಿನ ಹಿಂಡಿ ಬಳಕೆ:

ಕಾಳುಮೆಣಸಿನ ಬಳ್ಳಿ ಕೃಷಿಗೂ ಪ್ರಾಮುಖ್ಯತೆ ನೀಡಿರುವ ಇವರು ಬಳ್ಳಿಗಳಲ್ಲಿ ರೋಗನಿರೋಧಕ ಶಕ್ತಿ ಹೆಚ್ಚಿಸಲು ಬೇವಿನ ಹಿಂಡಿ ಹಾಗೂ ಸುಣ್ಣವನ್ನು ಬಳ್ಳಿಗಳ ಬುಡಕ್ಕೆ ಒದಗಿಸುತ್ತಾರೆ. ಮಳೆಗಾಲದ ಸಂದರ್ಭದಲ್ಲಿ ಕಾಳು ಮೆಣಸಿನ ಬಳ್ಳಿಗಳು ರೋಗಕ್ಕೆ ತುತ್ತಾಗದಿರುವಂತೆ ಕಾಪರ್ ಸಲ್ಫೇಟ್ ಮತ್ತು ಸುಣ್ಣವನ್ನು ಎರಡು ಬಾರಿ ಸಿಂಪಡಿಸುತ್ತಾರೆ. ಜನವರಿ ಹಾಗೂ ಫೆಬ್ರವರಿ ತಿಂಗಳಿನಲ್ಲಿ ಕಾಳುಮೆಣಸಿನ ಬಳ್ಳಿಗಳಿಗೆ ವಾರಕ್ಕೆ 30 ಲೀಟರ್ ನೀರನ್ನು ಒದಗಿಸುವುದು ಮಾದರಿಯಾಗಿದೆ.

ಬಿಸಿಲು, ನೆರಳಿನ ವ್ಯವಸ್ಥೆ

ಕಾಫಿ ಫಸಲಿನ ಕೊಯ್ಲು ಪೂರ್ಣಗೊಂಡ ತಕ್ಷಣವೇ ಕಾಫಿ ಗಿಡಗಳ ಅನಗತ್ಯಕೊಂಬೆಗಳನ್ನು, ಚಿಗುರುಗಳನ್ನು ಇವರು ಕತ್ತರಿಸುತ್ತಾರೆ. ನಂತರ ಗಿಡಗಳಿಗೆ ನೀರನ್ನು ಹರಿಸುತ್ತಾರೆ. ಇದರಿಂದ ಗಿಡವು ಉತ್ತಮ ರೀತಿಯಲ್ಲಿ ಚಿಗುರಲು ಸಾಧ್ಯವಾಗುತ್ತದೆ .ಇದರೊಂದಿಗೆ ತೋಟದಲ್ಲಿ ಶೇ.70 ಬಿಸಿಲು, ಶೇ.30 ನೆರಳು ಇರುವಂತೆ ವ್ಯವಸ್ಥೆ ಮಾಡಿಕೊಂಡಿದ್ದಾರೆ. ತೋಟದೊಳಗಿನ ಮರಗಳ ರೆಂಬೆ, ಕೊಂಬೆಗಳನ್ನು ಸೂಕ್ತ ಸಮಯದಲ್ಲಿ ಕಟಾವು ಮಾಡಬೇಕು. ಇದು ಬೇಸಿಗೆ ಕಾಲದಲ್ಲಿ ಗಿಡದ ಬೆಳವಣಿಗೆಗೆ ಸಹಕಾರಿಯಾಗಲಿದೆ. ಮಳೆಗಾಲದಲ್ಲಿ ಫಸಲು ಕೊಳೆಯದಂತೆ ಅನುವು ಮಾಡಿಕೊಡುತ್ತದೆ ಎನ್ನುತ್ತಾರೆ ಉದಯ್. ತೋಟದ ಬೇಲಿಯ ಬದಿಯಲ್ಲಿ 15 ಅಡಿ ದೂರಕ್ಕೆ ಒಂದರಂತೆ ಸಿಲ್ವರ್ ಮರಗಳನ್ನು ಬೆಳೆಸಿದ್ದು, ಅದರ ಮೂಲಕವೂ ವಾರ್ಷಿಕ ಆದಾಯವನ್ನು ಪಡೆಯುತ್ತಿರುವ ಉದಯ್ ಮಾದರಿ ಕೃಷಿಕರಾಗಿರುವುದು ಬಹಳ ವಿಶೇಷವಾಗಿದೆ.

ಇತ್ತೀಚಿನ ವರ್ಷಗಳಲ್ಲಿ ವಾಣಿಜ್ಯ ಬೆಳೆಗಳು ಕೃಷಿಕರಿಗೆ ಉತ್ತಮ ಆದಾಯವನ್ನು ತಂದುಕೊಡುತ್ತಿವೆ.

ತೋಟದ ನಿರ್ವಹಣೆ ನಿಟ್ಟಿನಲ್ಲಿ ಗಿಡ, ಬಳ್ಳಿಗಳಿಗೆ ಸಮಯಕ್ಕೆ ಸರಿಯಾಗಿ ಒದಗಿಸಬೇಕಾದ

ಪೋಷಕಾಂಶ, ಗೊಬ್ಬರ, ನೀರಿನ ನಿರ್ವಹಣೆ ಮಾಡಬೇಕು. ಆಗ ಉತ್ತಮ ಫಸಲು ಮತ್ತು ಆದಾಯ ದೊರಕುತ್ತದೆ. ಕೃಷಿಕರು ಕೇವಲ ಒಂದೇ ಬೆಳೆಗೆ ಸೀಮಿತರಾಗಬಾರದು. ಇತರ ಉಪ ಬೆಳೆಗಳನ್ನೂ ಬೆಳೆಯುವುದರ ಮೂಲಕ ತೋಟದ ಖರ್ಚನ್ನು ನಿಭಾಯಿಸಬಹುದು. ಆಗ ಕಾಫಿಯ ಮೂಲಕ ಬರುವ ಆದಾಯ ಸಂಪೂರ್ಣ ನಮ್ಮದಾಗುತ್ತದೆ. ಆಸಕ್ತಿ ಹಾಗೂ ಶ್ರದ್ಧೆಗಳು ನಿರಂತರವಾಗಿ ಇದ್ದರೆ ಮಾತ್ರ ಕೃಷಿ ನಮ್ಮನ್ನು ಕೈ ಹಿಡಿಯುತ್ತದೆ.

ಎನ್.ಡಿ.ಉದಯ್‌ಕುಮಾರ್

ರೈತರು, ಹೂಕಾಡ್, ಬೇಟೋಳಿ