ಹಾಕಿಯಲ್ಲಿ ಕೊಡಗು ವಿದ್ಯಾಲಯ ಮಕ್ಕಳ ಸಾಧನೆ

ಮಹಾರಾಷ್ಟ್ರದ ಕೊಲ್ಹಾಪುರದ ಸಂಜೀವನ್ ಶಾಲೆಯಲ್ಲಿ ಇತ್ತೀಚೆಗೆ ಆಯೋಜಿಸಲಾಗಿದ್ದ ದಕ್ಷಿಣ ವಲಯ ಮಟ್ಟದ ಹಾಕಿ ಪಂದ್ಯಾವಳಿಯಲ್ಲಿ ಇಲ್ಲಿನ ಕೊಡಗು ವಿದ್ಯಾಲಯದ ಬಾಲಕಿಯರು ಹಾಗೂ ಬಾಲಕರ ಹಾಕಿ ತಂಡಗಳು ಅತ್ಯುತ್ತಮ ಪ್ರದರ್ಶನ ನೀಡಿ ಗಮನಾರ್ಹ ಸಾಧನೆ ಮಾಡಿವೆ. ಅಮೋಘ ಆಟ ಪ್ರದರ್ಶಿಸಿದ ಬಾಲಕಿಯರ ತಂಡ ಪ್ರಥಮ ಸ್ಥಾನ ಗಳಿಸುವ ಮೂಲಕ ಇದೇ ತಿಂಗಳು ಪಂಜಾಬ್‌ನ ಅಮೃತಸರದಲ್ಲಿ ನಡೆಯಲಿರುವ ರಾಷ್ಟ್ರೀಯ ಮಟ್ಟದ ಹಾಕಿ ಪಂದ್ಯಾವಳಿಗೆ ಆಯ್ಕೆಯಾಗಿದೆ.

ಲೀಗ್ ಹಂತದಲ್ಲಿ ಡಿಫೆನ್ಸ್ ಕೆರಿಯರ್ ಅಕಾಡೆಮಿ ವಿರುದ್ಧ ೧೮-೦ ಹಾಗೂ ಡೆಲ್ಲಿ ಪಬ್ಲಿಕ್ ಸ್ಕೂಲ್ ಮೈಸೂರು ವಿರುದ್ಧ ೬-೦ ಗೋಲುಗಳ ಅಂತರದ ಭರ್ಜರಿ ಜಯ ಸಾಧಿಸಿದ ಬಾಲಕಿಯರ ತಂಡ, ಸೆಮಿಫೈನಲ್‌ನಲ್ಲಿ ಬೆಂಗಳೂರಿನ ಜನನ ಸ್ವೀಕರ್ ತಂಡವನ್ನು ೬-೦ ಗೋಲುಗಳಿಂದ ಮಣಿಸಿ ಫೈನಲ್ ತಲುಪಿತು. ಫೈನಲ್‌ನಲ್ಲಿ ಆತಿಥೇಯ ಕೊಲ್ಹಾಪುರದ ಸಂಜೀವನ್ ಶಾಲೆ ತಂಡವನ್ನು ೪-೩ ಗೋಲುಗಳ ರೋಚಕ ಅಂತರದಿAದ ಸೋಲಿಸಿ ಚಾಂಪಿಯನ್ ಪಟ್ಟಕ್ಕೇರಿತು. ಬಾಲಕಿಯರ ತಂಡವನ್ನು ಲಕ್ಷ್ಯ ಪೊನ್ನಕ್ಕ ನಾಯಕಿಯಾಗಿ ಮುನ್ನಡೆಸಿದರು.

ಬಾಲಕರ ತಂಡವೂ ಪ್ರಶಂಸನೀಯ ಪ್ರದರ್ಶನ ನೀಡಿ ದ್ವಿತೀಯ ಸ್ಥಾನ ಪಡೆದುಕೊಂಡಿತು. ಲೀಗ್ ಪಂದ್ಯಗಳಲ್ಲಿ ಡೆಲ್ಲಿ ಪಬ್ಲಿಕ್ ಸ್ಕೂಲ್ ಎಲೆಕ್ಟ್ರಾನಿಕ್ ಸಿಟಿ (೬-೦) ಹಾಗೂ ಪುಣೆಯ ಎಸ್.ಬಿ. ಪಾಟೀಲ್ ಶಾಲೆ (೨-೦) ವಿರುದ್ಧ ಜಯಗಳಿಸಿ, ಸೆಮಿಫೈನಲ್‌ನಲ್ಲಿ ಸಂಜಯ್ ಘೋಡಾವತ್ ತಂಡವನ್ನು ೩-೦ ಅಂತರದಿAದ ಮಣಿಸಿ ಫೈನಲ್ ಪ್ರವೇಶಿಸಿತು. ಅಂತಿಮ ಸೆಣಸಾಟದಲ್ಲಿ ಸಂಜೀವನ್ ಶಾಲೆ ವಿರುದ್ಧ ೨-೦ ಗೋಲುಗಳ ಅಂತರದಿAದ ಸೋಲನ್ನನುಭವಿಸಿ ದ್ವಿತೀಯ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿತು. ಬಾಲಕರ ತಂಡವನ್ನು ತನಿಷ್ ಎನ್.ಜಿ. ಮುನ್ನಡೆಸಿದ್ದರು.

ಹಾಕಿ ಕೋಚ್‌ಗಳಾದ ಎಚ್.ಡಿ. ದೀನಾ ಮತ್ತು ಕೆ.ಎ. ಪಾರ್ವತಿ ಕಠಿಣ ತರಬೇತಿ ಮತ್ತು ಮಾರ್ಗದರ್ಶನ ಮೂಲಕ ವಿದ್ಯಾರ್ಥಿಗಳು ಈ ಸಾಧನೆ ಮಾಡಿದ್ದಾರೆ ಎಂದು ಪ್ರಾಂಶುಪಾಲರಾದ ಕೆ.ಎಸ್. ಸುಮಿತ್ರಾ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.