ಚಲಿಸುತ್ತಿದ್ದ ಪೊಲೀಸ್ ಜೀಪು ಹಾರಿ ಪರಾರಿಯಾದ ಲೈಂಗಿಕ ಕಿರುಕುಳ ಆರೋಪಿ

ಸಿದ್ದಾಪುರ: ಚಾಲಕನೋರ್ವ ಶಾಲಾ ಬಾಲಕಿಗೆ ಲೈಂಗಿಕ ಕಿರುಕುಳ ನೀಡಿರುವ ಘಟನೆಗೆ ಸಂಬಂಧಿಸಿದಂತೆ ಸಿದ್ದಾಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಸಿದ್ದಾಪುರದ ಖಾಸಗಿ ಶಾಲೆಯ ವಿದ್ಯಾರ್ಥಿಗಳನ್ನು ಶಾಲೆಗೆ ಹಾಗೂ ಮನೆಗೆ ಕರೆತರುವ ಜೀಪ್ ಚಾಲಕನೋರ್ವ ೧೨ ವರ್ಷದ ಬಾಲಕಿಗೆ ಲೈಂಗಿಕ ಕಿರುಕುಳ ನೀಡಿರುವ ಘಟನೆ ಕುಶಾಲನಗರ ತಾಲೂಕಿನ ನೆಲ್ಯಹುದಿಕೇರಿಯಲ್ಲಿ ನಡೆದಿದೆ. ಆರೋಪಿ ನೆಲ್ಯಹುದಿಕೇರಿ ಬೆಟ್ಟದಕಾಡು ನಿವಾಸಿ ರಹೀಂ ಎಂಬಾತನ ವಿರುದ್ಧ ಪ್ರಕರಣ ದಾಖಲಾಗಿದೆ.

ಆರೋಪಿಯನ್ನು ತನ್ನ ಜೀಪಿನಲ್ಲೇ ಪೊಲೀಸರು ಠಾಣೆಗೆ ಕರೆ ತರುವಾಗ ಚಲಿಸುತ್ತಿದ್ದ ಜೀಪಿನಿಂದ ರಸ್ತೆಗೆ ಹಾರಿ, ಪರಾರಿಯಾಗಿದ್ದಾನೆಂದು ಪೊಲೀಸರು ಮಾಹಿತಿ ನೀಡಿದರು.