ವಿಜಯವಾಣಿ ಸುದ್ದಿಜಾಲ ಬೆಂಗಳೂರು ಗ್ರಾಮಾಂತರ
ಈ ಬಾರಿ ತೀವ್ರ ಮಳೆ ಕೊರತೆಯಿಂದ ಕುಡಿಯುವ ನೀರಿಗೂ ಹಾಹಾಕಾರ ಎದುರಾಗಿರುವ ನಡುವೆಯೇ ಜಾನುವಾರುಗಳಿಗೆ ಮೇವಿನ ಕೊರತೆ ಕಾಡಬಹುದೆಂಬ ಆತಂಕ ಎದುರಾಗಿದ್ದು, ಸರ್ಕಾರ ಜಿಲ್ಲೆಯಾದ್ಯಂತ ವಿತರಿಸಿದ ಮೇವಿನ ಕಿಟ್ ಕೊರತೆ ನೀಗಿಸಲಿದೆ ಎಂದು ಪಶುಪಾಲನಾ ಇಲಾಖೆ ವಿಶ್ವಾಸ ವ್ಯಕ್ತಪಡಿಸಿದೆ.
ಬೆಂಗಳೂರು ಗ್ರಾಮಾಂತರ ಜಿಲ್ಲೆಯಲ್ಲಿ ಪಶುಪಾಲನ ಇಲಾಖೆಯಿಂದ ಮೇವು ಉತ್ಪಾದನೆ ಪ್ರಮಾಣ ಹೆಚ್ಚಳಕ್ಕೆ ಸಂಬಂಧಿಸಿದಂತೆ ಮೇವಿನ ಮಿನಿ ಕಿಟ್ಗಳನ್ನು ವಿತರಿಸಲಾಗಿದೆ. ಕೊಳೆವೆಬಾವಿ, ಕೃಷಿಹೊಂಡ ಸೇರಿ ಇನ್ನಿತರ ನೀರಿನ ಸೌಲಭ್ಯವಿರುವ ರೈತರಿಗೆ ಈಗಾಗಲೇ 52 ಸಾವಿರ ಮೇವಿನ ಕಿಟ್ ವಿತರಿಸಿದ್ದು, ಜಾನುವಾರುಗಳ ಮೇವಿನ ಕೊರತೆ ನೀಗಿಸುವಲ್ಲಿ ಇದು ಗಣನೀಯ ಪಾತ್ರವಹಿಸಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಇದರ ಜತೆಗೆ ಮತ್ತೆ 10 ಸಾವಿರ ಮೇವಿನ ಕಿಟ್ ವಿತರಿಸಲು ಇಲಾಖೆ ಸಿದ್ದತೆ ನಡೆಸಿದೆ. ಇದರ ನಡುವೆ ಕಳೆದೊಂದು ವಾರದಿಂದ ಜಿಲ್ಲೆಯ ಹಲವೆಡೆ ಮಳೆಯಾಗುತ್ತಿದ್ದು, ಹಸಿರು ಮೇವಿಗೆ ತೀವ್ರ ಕೊರತೆ ಎದುರಾಗುವುದಿಲ್ಲ ಎಂದು ಇಲಾಖೆ ವಿಶ್ವಾಸ ವ್ಯಕ್ತಪಡಿಸಿದೆ.
35 ವಾರ ತೊಂದರೆ ಇಲ್ಲ: ಜಿಲ್ಲಾ ಪಶುಪಾಲನ ಇಲಾಖೆ ಸಮೀಕ್ಷೆಯಂತೆ ಜಿಲ್ಲೆಯಲ್ಲಿ ಮೇವಿಗೆ ತೀವ್ರ ತೊಂದರೆ ಎದುರಾಗಿಲ್ಲ.ಮುಂದಿನ 35 ವಾರಗಳಿಗಾಗುಷ್ಟು ಮೇವಿನ ದಾಸ್ತಾನು ಇದೆ ಎಂದು ಇಲಾಖೆ ವರದಿ ನೀಡಿದೆ. ಇದಲ್ಲದೆ ಈ ಬಾರಿ ರಾಗಿ ಸಲು ನಷ್ಟವಾಗಿದ್ದರೂ ರಾಗಿ ಹುಲ್ಲಿನ ದಾಸ್ತಾನಿಗೆ ತೊಂದರೆಯಾಗಿಲ್ಲ. ಈ ಹಿನ್ನೆಲೆಯಲ್ಲಿ ತೀವ್ರ ಕೊರತೆ ಎದುರಾಗುವುದಿಲ್ಲ ಎಂದು ಅಧಿಕಾರಿಗಳು ಅಂದಾಜಿಸಿದ್ದಾರೆ.
ಮೇವಿಗೆ ಟೆಂಡರ್: ಜಿಲ್ಲೆಯ ನಾಲ್ಕೂ ತಾಲೂಕುಗಳಲ್ಲಿ ಮಳೆ ಕೊರತೆ ಹಿನ್ನೆಲೆಯಲ್ಲಿ ಈ ಬಾರಿ ಜಿಲ್ಲೆಯನ್ನು ಬರಪೀಡಿತ ಜಿಲ್ಲೆಗಳ ಪಟ್ಟಿಗೆ ಸೇರಿಸಲಾಗಿದೆ. ಮುಂದಿನ ದಿನಗಳಲ್ಲಿ ಮೇವಿನ ತೊಂದರೆ ಎದುರಾದರೆ ಮುಂಜಾಗ್ರತಾ ಕ್ರಮವಾಗಿ ಹೊರ ಜಿಲ್ಲೆಗಳಿಂದ ಮೇವು ಖರೀದಿಸುವ ಬಗ್ಗೆ ಇಲಾಖೆ ಚಿಂತನೆ ನಡೆಸಿದ್ದು ಟೆಂಡರ್ ಕರೆಯುವ ಪ್ರಕ್ರಿಯೆ ಆರಂಭಿಸಿದೆ ಎನ್ನಲಾಗಿದೆ. ಆದರೆ ಕೆಲವು ದಿನಗಳಿಂದ ಮಳೆಯಾಗುತ್ತಿದ್ದು ಮುಂದಿನ ದಿನಗಳಲ್ಲೂ ಉತ್ತಮ ಮಳೆಯಾಗುವ ನಿರೀಕ್ಷೆ ಹಿನ್ನೆಲೆಯಲ್ಲಿ ಕಾದು ನೋಡಲಾಗುತ್ತಿದೆ ಎಂದು ಮೂಲಗಳು ತಿಳಿಸಿವೆ.
ಒಣ ಮೇವಿನ ಲಭ್ಯತೆ: ಕೃಷಿ ಇಲಾಖೆ ಮಾಹಿತಿಯಂತೆ ಗ್ರಾಮಾಂತರ ಜಿಲ್ಲೆಯಲ್ಲಿ ಕಳೆದ ಸಾಲಿನಲ್ಲಿ 56513 ಹೆಕ್ಟೇರ್ ರಾಗಿ, 6756 ಹೆಕ್ಟೇರ್ ಮುಸುಕಿನ ಜೋಳ ಹಾಗೂ 61 ಹೆಕ್ಟೇರ್ ಭತ್ತ ಬಿತ್ತನೆಯಾಗಿದ್ದು ರಾಗಿ ಬೆಳೆಯಿಂದಲೇ 190274 ಟನ್ ಒಣ ಮೇವು ಲಭ್ಯವಿದೆ ಎನ್ನಲಾಗಿದ್ದು ಜೂನ್ ಅಂತ್ಯದವರೆಗೆ ಒಣಮೇವಿನ ಕೊರತೆ ಎದುರಾಗುವುದರಿಲ್ಲ ಎಂಬ ಭರವಸೆ ಇಲಾಖೆಯದ್ದಾಗಿದೆ.
