ಆರ್.ಕೃಷ್ಣ ಮೈಸೂರು
ಸೋರುತ್ತಿರುವ ಇಂದಿರಾ ಕ್ಯಾಂಟೀನ್ ಕಟ್ಟಡಗಳ ಕಾಯಕಲ್ಪಕ್ಕೆ ಮೈಸೂರು ನಗರಪಾಲಿಕೆ ಮುಂದಾಗಿದೆ. ಕ್ಯಾಂಟೀನ್ಗಳು ಆರಂಭಗೊಂಡು 8 ವರ್ಷಗಳು ಕಳೆಯುತ್ತಿರುವುದರಿಂದ ಹಲವು ಕಡೆ ಶಿಥಿಲಗೊಂಡಿವೆ. ಈಗ ಸತತವಾಗಿ ಸುರಿಯುತ್ತಿರುವ ಮಳೆಯಿಂದಾಗಿ ಹಲವು ಕ್ಯಾಂಟೀನ್ ಕಟ್ಟಡಗಳು ಸೋರಲಾಂಭಿಸಿವೆ. ಇದರಿಂದ ಜನರು, ಕೆಲಸಗಾರರು ಒಳಗೆ ಕುಳಿತು ಊಟ, ತಿಂಡಿ ಮಾಡಲು ಮೀನಾಮೇಷ ಎಣಿಸುತ್ತಿದ್ದಾರೆ. ಕೆಲವು ಕಡೆ ಪಾಚಿ ಕಟ್ಟಿಕೊಂಡಿದ್ದು, ಊಟ ಮಾಡಲು ಜನರು ಕಸಿವಿಸಿ ಅನುಭವಿಸುತ್ತಿದ್ದಾರೆ.
ದುಸ್ಥಿತಿ ತಲುಪಿರುವ ಕ್ಯಾಂಟೀನ್ ಕಟ್ಟಡಗಳ ದುರಸ್ಥಿಗಾಗಿ ಸರ್ಕಾರ ತಲಾ 5 ಲಕ್ಷ ರೂ. ಮಂಜೂರು ಮಾಡಿದೆ. ನಗರದಲ್ಲಿ ಒಟ್ಟು 12 ಇಂದಿರಾ ಕ್ಯಾಂಟೀನ್ ಕಟ್ಟಡಗಳಿದ್ದು, ಅಜೀಜ್ಸೇಠ್ ರಸ್ತೆಯಲ್ಲಿರುವ ಕ್ಯಾಂಟಿನ್ ಸಂಪೂರ್ಣವಾಗಿ ಶಿಥಿಲಾವಸ್ಥೆಗೆ ತಲುಪಿದೆ. ಹೀಗಾಗಿ ಈ ಕ್ಯಾಂಟೀನ್ ಅನ್ನು ಕಟ್ಟಡ ದುರಸ್ಥಿಗೊಳ್ಳುವವರೆಗೆ ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗಿದೆ.
ಉಳಿದ 11 ಕ್ಯಾಂಟೀನ್ಗಳಲ್ಲಿಯೂ ಸಣ್ಣಪುಟ್ಟ ದುರಸ್ಥಿ ಕಾರ್ಯ ನಡೆಯಬೇಕಿದೆ. ಕೆಲವು ಕಡೆ ಮಳೆ ನೀರು ಒಳಗೆ ಇಳಿಯುತ್ತಿದ್ದು, ದಿನದಿಂದ ದಿನಕ್ಕೆ ಕಟ್ಟಡಗಳು ದುರ್ಬಲಗೊಳ್ಳುತ್ತಿವೆ. ಈ ಕುರಿತು ವರದಿ ಪಡೆದ ಸರ್ಕಾರ, ತಲಾ 5 ಲಕ್ಷ ರೂ. ವೆಚ್ಚದಲ್ಲಿ ನಗರಪಾಲಿಕೆ ಮೂಲಕ ಇಂದಿರಾ ಕ್ಯಾಂಟಿನ್ಗಳ ದುರಸ್ತಿಗೊಳಿಸಲು ಮುಂದಾಗಿವೆ. ಇದಕ್ಕಾಗಿ ಅಂದಾಜು ಪಟ್ಟಿಯನ್ನು ಸಿದ್ಧಪಡಿಸಲಾಗಿದ್ದು, ಮಳೆ ನಿಂತ ತಕ್ಷಣವೇ ಕಟ್ಟಡಗಳ ದುರಸ್ತಿ ಕಾರ್ಯ ಆರಂಭಗೊಳ್ಳಲಿವೆ.
ಹೊಸ ಕ್ಯಾಂಟಿನ್ಗೆ ಸ್ಥಳ ನಿಗದಿ:
ನಗರದಲ್ಲಿ ಇಂದಿರಾ ಕ್ಯಾಂಟೀನ್ಗಳ ಸಂಖ್ಯೆ ಹೆಚ್ಚಿಸಲು ಸರ್ಕಾರ ನಿರ್ಧರಿಸಿದೆ. ಈಗ ನಗರದಲ್ಲಿರುವ 12 ಕ್ಯಾಂಟೀನ್ಗಳ ಜತೆಗೆ ಸದ್ಯದಲ್ಲಿಯೇ ಎರಡು ಹೊಸ ಕ್ಯಾಂಟೀನ್ಗಳು ತಲೆ ಎತ್ತಲಿವೆ.
ಸಿದ್ದಾರ್ಥ ನಗರದ ನೂತನ ಜಿಲ್ಲಾಧಿಕಾರಿ ಕಚೇರಿ ಆವರಣ ಹಾಗೂ ಪಡುವಾರಹಳ್ಳಿಯಲ್ಲಿರುವ ಮಹಾರಾಣಿ ವಾಣಿಜ್ಯ ಕಾಲೇಜು ಆವರಣದಲ್ಲಿ ತಲಾ ಒಂದೊಂದು ಇಂದಿರಾ ಕ್ಯಾಂಟೀನ್ ಆರಂಭಿಸಲು ಜಾಗ ನಿಗದಿ ಪಡಿಸಲಾಗಿದೆ. ಮಳೆ ಬಿಡುವು ಕೊಡುತ್ತಿರುವಂತೆಯೇ ಕಟ್ಟಡಗಳು ತಲೆ ಎತ್ತಲಿವೆ. ಇದರಿಂದ ಗ್ರಾಮೀಣ ಪ್ರದೇಶದಿಂದ ಬರುವ ವಿದ್ಯಾರ್ಥಿನಿಯರು, ಸಾರ್ವಜನಿಕರಿಗೆ ಅನುಕೂಲವಾಗಲಿದೆ.
2016ರಲ್ಲಿ ಆರಂಭಗೊಂಡ ಇಂದಿರಾ ಕ್ಯಾಂಟೀನ್ಗಳ ಪೈಕಿ ನಗರದಲ್ಲಿ 12 ಇದ್ದರೆ ಜಿಲ್ಲೆಯಲ್ಲಿ ಒಟ್ಟು 17 ಕ್ಯಾಂಟೀನ್ಗಳಿವೆ. ಇದೀಗ ಹೆಚ್ಚುವರಿಯಾಗಿ ನಗರದಲ್ಲಿ ಎರಡು ಸೇರಿ ಇನ್ನು 9 ಕ್ಯಾಂಟೀನ್ಗಳನ್ನು ಆರಂಭಿಸಲು ಸಿದ್ಧತೆ ನಡೆಸಲಾಗಿದೆ.
