ಚೌಟರ ಅರಮನೆ ಎದುರಿರುವ ಸಾರ್ವಜನಿಕ ರಸ್ತೆಯಲ್ಲಿ ಇತ್ತೀಚೆಗೆ ತ್ಯಾಜ್ಯಗಳು ತುಂಬಿಹೋಗಿದ್ದು, ಚೌಟರ ಮನೆತನದವರ ಮುತುವರ್ಜಿಯಲ್ಲಿ ಅದನ್ನು ಶುಚಿಗೊಳಿಸಲಾಗಿತ್ತು. ಆದರೆ ಎರಡು ಮೂರು ದಿನಗಳಲ್ಲಿ ಅದರ ಪಕ್ಕದಲ್ಲಿ ಮತ್ತೆ ಕಸಕಡ್ಡಿಗಳು ಕಂಡುಬಂದಿವೆ. ರಾತ್ರಿ ವೇಳೆ ಈ ಪರಿಸರದಲ್ಲಿ ವಾಹನ, ಜನ ಸಂಚಾರ ವಿರಳವಾಗಿದೆ. ಸೂಕ್ತ ವಿದ್ಯುತ್ ದೀಪದ ವ್ಯವಸ್ಥೆ ಇಲ್ಲದಿರುವುದರಿಂದ ಕುಡುಕರು, ಕಸ ಬಿಸಾಡುವವರಿಂದ ಪರಿಸರ ಹಾಳಾಗುತ್ತಿದೆ. ಪುರಸಭೆ ಈ ಬಗ್ಗೆ ಗಮನಹರಿಸಿ ಗುಣಮಟ್ಟದ ಬೀದಿದೀಪ ಅಳವಡಿಸಬೇಕು. ಕಸ ಬಿಸಾಡುವವರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಬೇಕು ಎನ್ನುವುದು ಚೌಟ ಮನೆತನದವರು, ಸ್ಥಳೀಯರ ಬೇಡಿಕೆ. ಆನೆ ಬಾಗಿಲು ದ್ವಾರ ಪಕ್ಕದಲ್ಲಿ ಒಂದೇ ರಸ್ತೆ ಇದ್ದು, ಬಹಳಷ್ಟು ಇಕ್ಕಟ್ಟಾಗಿದೆ. ಇದೇ ಕಾರಣದಿಂದಾಗಿ ಲಾರಿಯು ಚಾಲಕನ ನಿಯಂತ್ರಣ ತಪ್ಪಿ ಗೋಡೆಗೆ ಹಾನಿಯಾಗಿತ್ತು. ದ್ವಾರದ ಒಂದು ಕಡೆಯಿಂದ ಇನ್ನೊಂದು ಕಡೆಗೆ ವಾಹನಗಳು ಬರುವುದು ಕಾಣಿಸದ್ದರಿಂದ ಅಪಘಾತಕ್ಕೆ ಕಾರಣವಾಗುತ್ತಿದೆ. ಇದಕ್ಕೆ ಪರಿಹಾರವಾಗಿ ಆನೆಬಾಗಿಲು ಎರಡು ಬದಿ ರಸ್ತೆ ನಿರ್ಮಿಸಿ, ಮಧ್ಯೆವೃತ್ತದ ಮಾದರಿಯಲ್ಲಿ ಆನೆಗೋಡೆ ಇದ್ದರೆ, ಸಂಚಾರಕ್ಕೆ ಸಹಕಾರಿ ಮಾತ್ರವಲ್ಲ ಸ್ಮಾರಕವೂ ಸುಂದರವಾಗಿ ಕಾಣಿಸುತ್ತದೆ. ಇದಕ್ಕೆ ಜಾಗದ ಅವಶ್ಯಕತೆ ಇದಲ್ಲಿ ಪಕ್ಕದಲ್ಲಿ ಜಾಗವನ್ನು ಬಿಟ್ಟು ಕೊಡುವುದಾಗಿ ಚೌಟರ ಅರಮನೆಯ ಕುಲದೀಪ ಎಂ. ತಿಳಿಸಿದ್ದಾರೆ.
