ತುಂಬಿಹರಿಯುತ್ತಿದೆ ಆನಂದಗಲ್ ಹಳ್ಳ, ಸೇತುವೆ ದಾಟಲು ಗ್ರಾಮಸ್ಥರ ಪರದಾಟ

ಕವಿತಾಳ: ಆನಂದಗಲ್ ಗ್ರಾಮದ ಹಳ್ಳ ತುಂಬಿಹರಿಯುತ್ತಿರುವುದರಿಂದ ಅದನ್ನು ದಾಟಲು ಜನ ಮಂಗಳವಾರ ಪರದಾಡುವಂತಾಯಿತು. ಸೋಮವಾರ ರಾತ್ರಿಯಿಂದ ಮಂಗಳವಾರ ಬೆಳಗಿನ ವರೆಗೆ ಸತತ ಮಳೆ ಸುರಿದ ಪರಿಣಾಮ ಹಳ್ಳ ತುಂಬಿ ಹರಿಯುತ್ತಿದೆ. ಸೇತುವೆ ನಿರ್ಮಿಸುವ ಸಲುವಾಗಿ ಹಳ್ಳದ ಮಾರ್ಗ ಬದಲಿಸಿರುವುದರಿಂದ ಈ ಸಮಸ್ಯೆ ಎದುರಾಗಿದೆ. ಇದು ಮುಖ್ಯ ರಸ್ತೆಯಾಗಿದ್ದು, ಪಾಮನಕಲ್ಲೂರು, ಆನಂದಗಲ್, ಗುಡಿಹಾಳ, ಚಿಲ್ಕರಾಗಿ, ಹಾಲಪುರ, ಮಸ್ಕಿಗೆ ಸಂಪರ್ಕ ಕಲ್ಪಿಸುತ್ತದೆ. ಪ್ರಾರಂಭದಲ್ಲೇ ಗುತ್ತಿಗೆದಾರರು, ಅಧಿಕಾರಿಗಳು ಸರಿಯಾಗಿ ಕಾಮಗಾರಿ ಮಾಡಬೇಕಿತ್ತು ಎಂದು ಗ್ರಾಮಸ್ಥರಾದ ಸುಂಡೆಪ್ಪ ಹರಿಜನ, ಮಲ್ಲಪ್ಪ, ಭೀಮೇಶ ಇತರರು ಹೇಳಿದ್ದಾರೆ.