ಆದರೆ ಇಂತಹ ಪ್ರಕೃತಿ ಸೌಂದರ್ಯವನ್ನು ಹೊಂದಿರುವ ಜಿಲ್ಲೆಯಲ್ಲಿ ಹುಟ್ಟಿದ ಪವಿತ್ರ ಕಾವೇರಿ ನದಿ ಸಂಕಷ್ಟಕ್ಕೆ ಸಿಲುಕಿ ಲಕ್ಷಾಂತರ ಜನರ ಆತಂಕಕ್ಕೆ ಕಾರಣವಾಗಿದೆ. ನದಿ ತನ್ನೊಡಲನ್ನು ಖಾಲಿ ಮಾಡಿಕೊಂಡು ತಿಂಗಳೇ ಕಳೆದಿದೆ. ಈ ದುಸ್ಥಿತಿಗೆ ಕಾರಣ ಹುಡುಕುತ್ತಾ ಹೋದರೆ ಸಿಗುವ ಉತ್ತರ, ಪ್ರಕೃತಿ ಮೇಲಿನ ಮಾನವನ ದೌರ್ಜನ್ಯ, ಮರಗಳ ಹನನ. ನದಿಯ ಪಾವಿತ್ರ್ಯಕ್ಕೆ ಧಕ್ಕೆಯಾಗುವ ರೀತಿಯಲ್ಲಿ ತ್ಯಾಜ್ಯ ನೀರು ಬಿಡುತ್ತಿರುವುದು, ನದಿ ಪಾತ್ರದ ಕಾಫಿ ತೋಟಗಳಿಗೆ ಮತ್ತು ವಾಣಿಜ್ಯ ಬೆಳೆಗಳಿಗೆ ಯಥೇಚ್ಛವಾಗಿ ನೀರು ಹಾಯಿಸುತ್ತಿರುವುದೇ ಕಾರಣ ಎಂದು ವಿಚಾರವಂತರು ಹೇಳುತ್ತಾರೆ.
ಜಿಲ್ಲೆಗೆ ಭೇಟಿ ನೀಡುವ ಪ್ರವಾಸಿಗರಿಗೆ ಇಲ್ಲಿಯ ಪಕೃತಿ ಸೌಂದರ್ಯ, ಪರಂಪರೆ ಸಾರುವ ಮಾಹಿತಿ ಕೊರತೆಯಿಂದ ಮತ್ತು ಸ್ಥಳೀಯರ ಅಸಡ್ಡೆಯಿಂದ ಎಲ್ಲೆಂದರಲ್ಲಿ ಕಸ ಎಸೆಯುವುದು, ಮದ್ಯ ಸೇವನೆ ಮಾಡಿ ಅದರ ತ್ಯಾಜ್ಯದಿಂದ ಹಸಿರು ಸಂಪತ್ತು ಹಾಳಾಗುತ್ತಿದೆ.
