ಕಸಬಾಲಿಂಗಸುಗೂರಲ್ಲಿ ಆಕಸ್ಮಿಕ ಬೆಂಕಿಗೆ ಹಣ್ಣಿನ ಗಿಡಗಳು ಆಹುತಿ

ಲಿಂಗಸುಗೂರು: ಕಸಬಾಲಿಂಗಸುಗೂರು ಗ್ರಾಮದ ರೈತರೊಬ್ಬರ ತೋಟದಲ್ಲಿ ಆಕಸ್ಮಿಕ ಬೆಂಕಿಯಿಂದ ತೋಟದಲ್ಲಿ ಬೆಳೆದಿದ್ದ ನಾನಾ ಹಣ್ಣು ಮತ್ತು ಸಾಗವಾನಿ ಗಿಡಗಳು ಗುರುವಾರ ಸಂಜೆ ಬೆಂಕಿಗೆ ಆಹುತಿಯಾಗಿವೆ.

ಗ್ರಾಮದ ಚಂದ್ರಶೇಖರ ಭೋವಿ ಎಂಬುವರ 5 ಎಕರೆ ತೋಟದಲ್ಲಿ ಆಕಸ್ಮಿಕ ಬೆಂಕಿಯಿಂದ ಹೂ ಬಿಡುತ್ತಿದ್ದ 30 ಮಾವಿನ ಗಿಡ, 5 ಸಪೋಟ, ಸಮೃದ್ಧವಾಗಿ ಬೆಳೆದಿದ್ದ 10 ಸಾಗವಾನಿ ಗಿಡಗಳು ಮತ್ತು 40 ಸ್ಪಿಂಕ್ಲರ್ ಪೈಪ್‌ಗಳು ಹಾಗೂ ಇತರೆ ಕೃಷಿ ಸಾಗುವಳಿ ವಸ್ತುಗಳು ಬೆಂಕಿಗೆ ಆಹುತಿಯಾಗಿವೆ. ವರ್ಷಗಳಿಂದ ಕಷ್ಟಪಟ್ಟು ಬೆಳೆಸಿದ್ದ ಗಿಡಗಳಿಗೆ ನೀರುಣಿಸುವ ತುಂತುರು ಹನಿ ನೀರಾವರಿಯ 40 ಪೈಪುಗಳು ಆಕಸ್ಮಿಕ ಬೆಂಕಿಗೆ ಆಹುತಿಯಾಗಿ ರೈತನು ಕಣ್ಣೀರಿನಲ್ಲಿ ಕೈತೊಳೆಯುವಂತಾಗಿದ್ದು, ಕೈಗೆ ಬಂದ ತುತ್ತು ಬಾಯಿಗೆ ಬಾರದಂತಾಗಿದೆ.