ಕಾರವಾರದ ವಾಣಿಜ್ಯ ಬಂದರಿನಲ್ಲಿ 375 ಮೀಟರ್ ಜಟ್ಟಿ(ಬರ್ತ್) ಇದೆ. ಅದನ್ನು ನೇರವಾಗಿ ಮೆರಿಟೈಮ್ ಬೋರ್ಡ್ (ಮೊದಲು ಬಂದರು ಇಲಾಖೆ) ನಿರ್ವಹಿಸುತ್ತಿದೆ. ಆದರೆ, ಬಂದರಿನ ಸಾಮರ್ಥ್ಯದ ಸಂಪೂರ್ಣ ಬಳಕೆಯಾಗುತ್ತಿಲ್ಲ. ವರ್ಷದಿಂದ ವರ್ಷಕ್ಕೆ ಬಂದರಿನ ಆದಾಯ ಇಳಿಕೆಯಾಗುತ್ತಿದೆ. ರಫ್ತು ಪ್ರಕ್ರಿಯೆ ಭಾಗಶಃ ಸ್ಥಗಿತವಾಗಿದೆ. 2022-23 ರಲ್ಲಿ 21 ಕೋಟಿ ರೂ. ಇದ್ದ ಕಾರವಾರ ವಾಣಿಜ್ಯ ಬಂದರಿನ ನೇರ ಆದಾಯ 2023-24 ಕ್ಕೆ 18 ಕೋಟಿಗೆ ಇಳಿಕೆಯಾಗಿತ್ತು. 2024-25 ರಲ್ಲಿ ಅದು 14.29 ಕೋಟಿಗೆ ಇಳಿಕೆಯಾಗಿದೆ. ಬಂದರಿನಲ್ಲಿ ಮತ್ತೆ, ಮತ್ತೆ ತುಂಬುವ ಹೂಳು, ವಾರ್ಫ್ಗಳ ರಿಪೇರಿ ಮುಂತಾದ ಸಾಕಷ್ಟು ಖರ್ಚುಗಳಿವೆ. ಬಂದರಿನ ನವೀಕರಣ , ವಿಸ್ತಣೆ ಮಾಡಬೇಕು ಎಂದರೆ ಸರ್ಕಾರ ಅನುದಾನ ನೀಡಬೇಕಾದ ಪರಿಸ್ಥಿತಿ ಇದೆ. ಈಗಾಗಲೇ ಬಂದರಿನ ವ್ಯಾಪ್ತಿಯ ಸಾಕಷ್ಟು ಜಾಗಗಳನ್ನು ಖಾಸಗಿಗೆ ಹಂಚಿಕೆ ಮಾಡಲಾಗಿದೆ. ಮುಂದೆ ವಾರ್ಫ್ನ ಒಂದು ಭಾಗವನ್ನು ಖಾಸಗಿಗೆ ವಹಿಸಲು ಮೆರಿಟೈಮ್ ಬೋರ್ಡ್ ಚಿಂತಿಸಿದೆ.
