ರಾಜ್ಯಕ್ಕೆ ಕೇಂದ್ರದಿಂದ ಬರಬೇಕಾಗಿರುವ ಬಾಕಿ ವಿಚಾರವಾಗಿ ಈಗಾಗಲೇ ಪ್ರಧಾನಿ ಭಾಗವಹಿಸಿದ್ದ ತುಮಕೂರು ಸಭೆ, ಬಜೆಟ್, ಸದನ ಸೇರಿ ಹಲವು ಕಡೆ ಸಿಎಂ ಬಹಿರಂಗವಾಗಿ ಪ್ರಸ್ತಾಪಿಸಿದ್ದಾರೆ. ಇದಲ್ಲದೆ, ಆರ್ಥಿಕ ಸ್ಥಿತಿಗತಿ ವಿಚಾರದಲ್ಲಿ ಪ್ರತಿಪಕ್ಷಗಳ ಟೀಕೆ ನಿಜವೆಂದೂ ಒಪ್ಪಿದ್ದಾರೆ. ಈಗ ಕರೊನಾ ಭೀತಿ ಹೆಚ್ಚುತ್ತಿರುವಂತೆ ತೆರಿಗೆ ಸಂಗ್ರಹಣೆ ಮೇಲೆ ಪರಿಣಾಮ ಉಂಟಾಗಿರುವುದರಿಂದ ಪದೇಪದೆ ಕೇಂದ್ರದ ಮೇಲೆ ಒತ್ತಡ ತರಲಾರಂಭಿಸಿದ್ದಾರೆಂದು ಸರ್ಕಾರದ ಉನ್ನತ ಮೂಲಗಳು ಖಚಿತಪಡಿಸಿವೆ. ಆದರೆ ಕೇಂದ್ರ ಎಷ್ಟರ ಮಟ್ಟಿಗೆ ಸ್ಪಂದಿಸಲಿದೆ ಎಂಬುದನ್ನು ಕಾದು ನೋಡಬೇಕಿದೆ. ತೆರಿಗೆ ಸಂಗ್ರಹ ಪ್ರಮಾಣ ಶೇ.7.64 ರಿಂದ ಶೇ.7ಕ್ಕೆ ಕುಸಿದಿದೆ. ಎಲ್ಲ ವಲಯಗಳಲ್ಲೂ ಪ್ರಗತಿ ಕುಂಠಿತವಾಗಿದೆ. ಇಂತಹ ಸಂದರ್ಭದಲ್ಲಿ ಕೇಂದ್ರ ಹೆಚ್ಚುವರಿ ನೆರವಿನ ಜತೆಗೆ ಬಾಕಿ ಕೂಡ ಕೊಡಬೇಕಾಗಿದೆ. ಕರೊನಾದಿಂದಾಗಿ ಸಾರಿಗೆ, ಐಟಿ, ಪ್ರವಾಸೋದ್ಯಮ, ಹೋಟೆಲ್, ಜವಳಿ, ಸಿನಿಮಾ ಸೇರಿ ಬಹುತೇಕ ಉದ್ಯಮಗಳ ವ್ಯಾಪಾರ ವಹಿವಾಟು ಬಂದ್ ಆಗಿದೆ. 15ನೇ ಹಣಕಾಸು ಆಯೋಗದ ಪ್ರಕಾರ ಮುಂದಿನ ವರ್ಷ ರಾಜ್ಯಕ್ಕೆ 11215 ಕೋಟಿ ರೂ. ಕಡಿತವಾಗುತ್ತಿದೆ. ಆದ್ದರಿಂದ ಆತಂಕಕ್ಕೆ ಒಳಗಾಗಿರುವ ಸರ್ಕಾರ ಬಾಕಿ ಹಣಕ್ಕಾಗಿ ಒತ್ತಡ ಹೆಚ್ಚಿಸಲಾರಂಭಿಸಿದೆ.
