ದೇವರಹಿಪ್ಪರಗಿ: ಮಹಾಮಾರಿ ಕರೊನಾ ಮಧ್ಯೆಯೂ ಗ್ರಾಮೀಣ ಭಾಗದ ಜನತೆ ಪ್ರತಿ ವರ್ಷದಂತೆ ನಾಗಪಂಚಮಿ ಹಬ್ಬವನ್ನು ಸಡಗರ-ಸಂಭ್ರಮದಿಂದ ಆಚರಿಸಿದರು.
ಸುಮಂಗಲಿಯರು, ಮಕ್ಕಳು ನಾನಾ ತರಹದ ಸಿಹಿ ತಿಂಡಿಯನ್ನು ಮಾಡಿಕೊಂಡು ನಾಗರಕಟ್ಟೆಗೆ ತೆರಳಿ ನಾಗಪ್ಪನ ಮೂರ್ತಿಗೆ ನೂಲಿನ ದಾರ ಹಾಕಿ ಹಾಲೆರೆದು ನೈವೇದ್ಯ ನೀಡಿ ಭಕ್ತಿ ಸಮರ್ಪಿಸುವುದು ಕಂಡುಬಂತು. ವಿವಿಧ ಭಾಗಗಳಲ್ಲಿ ಮರದ ಕೊಂಬೆಗೆ, ಮನೆಯ ಜಂತಿಗಳಿಗೆ ಜೋಕಾಲಿ ಕಟ್ಟಿ ಉಯ್ಯಲೆ ಆಡುತ್ತಾ ಸಂಭ್ರಮಿಸಿದರು.
ಗಂಡು ಮಕ್ಕಳ ಶಕ್ತಿ ಪ್ರದರ್ಶನ ಗಮನ ಸೆಳೆಯಿತು. ಅದರಲ್ಲೂ ಭಾರ ಎತ್ತಿಕೊಂಡು ದೂರ ನಡೆದುಕೊಂಡು ಹೋಗುವುದು, ನಿಂಬೆ ಹಣ್ಣು ಎಸೆಯುವುದು, ಆ ಓಣಿಯಿಂದ ಈ ಓಣಿಯವರಿಗೆ ಕಣ್ಣಿಗೆ ಬಟ್ಟೆ ಕಟ್ಟಿ ಬುದ್ಧಿವಂತಿಕೆಯಿಂದ ಹೇಳಿದ ಸ್ಥಳ ಮುಟ್ಟಿ ಷರತ್ತು ಗೆಲ್ಲುವುದು, ಗೆದ್ದ ವ್ಯಕ್ತಿಯನ್ನು ಹಾಡಿ-ಹೊಗಳುವುದು ಕಂಡು ಬಂದಿತು.
