ಪಟ್ಟಣದ ಮಧ್ಯಭಾಗದಿಂದ ಹಾದುಹೋಗುವ ತುಂಗಭದ್ರಾ ಎಡದಂಡೆ ಕಾಲುವೆಯ 31ನೇ ಉಪನಾಲೆಯಲ್ಲಿ ಯಥೇಚ್ಛವಾಗಿ ನೀರು ಹರಿದ ಪರಿಣಾಮ ಪಕ್ಕದ 16ನೇ ವಾರ್ಡ್ ಬಹುತೇಕ ಜಲಾವೃತವಾಗಿತ್ತು. ನಾಲೆಯ ಮೇಲಿನ ಜಾಗದಲ್ಲಿ ಹಲವು ವರ್ಷಗಳಿಂದ ಬಡವರು ಹಾಕಿಕೊಂಡಿದ್ದ ಗುಡಿಸಲು, ಶೆಡ್ಗಳಿಗೆ ನೀರು ನುಗ್ಗಿದ ಪರಿಣಾಮ ಜೀವ ಕೈಯಲ್ಲಿ ಜಾಗರಣೆ ಮಾಡಿದರು. ಎಡದಂಡೆ ಕಾಲುವೆಯಿಂದ ಉಪನಾಲೆಗೆ ನೀರು ಪೂರೈಕೆ ಪ್ರಮಾಣ ಕಡಿಮೆ ಮಾಡಿದ್ದರೆ ಈ ಅನಾಹುತ ತಪ್ಪಿಸಬಹುದಿತ್ತು. ಪುರಸಭೆ ಸದಸ್ಯರಾದ ಎಚ್.ಈಶಪ್ಪ, ದೊಡ್ಡಬಸವ ಬೂದಿ, ನೀರು ಹರಿವು ತಗ್ಗಿಸುವಂತೆ ನೀರಾವರಿ ಇಲಾಖೆ ಅಧಿಕಾರಿಗಳಿಗೆ ದೂರವಾಣಿ ಕರೆ ಮಾಡಿ ಮಾಹಿತಿ ನೀಡಿದರೂ ಯಾವುದೇ ಪ್ರಯೋಜನವಾಗಲಿಲ್ಲ. ಇದರಿಂದ ಸಾರ್ವಜನಿಕರು ಮಧ್ಯಾಹ್ನದವರೆಗೆ ಪರದಾಡಬೇಕಾಯಿತು.
