ಪುನರ್ವಸತಿ ಕೇಂದ್ರದಿಂದ ಪರಾರಿಯಾಗಿದ್ದ ಬಾಲಕಿಯರ ರಕ್ಷಣೆ

ಉಡುಪಿ : ಕೇರಳದ ಕಣ್ಣೂರು ಬಳಿಯ ಪುನರ್ವಸತಿ ಕೇಂದ್ರದಿಂದ ಮಹಿಳಾ ಭದ್ರತಾ ಸಿಬ್ಬಂದಿಯೊಂದಿಗೆ ತಪ್ಪಿಸಿಕೊಂಡು ಬಂದಿದ್ದ ನಾಲ್ವರು ಪೋಕ್ಸೋ ಸಂತ್ರಸ್ತ ಬಾಲಕಿಯರನ್ನು ಇಂದ್ರಾಳಿ ರೈಲು ನಿಲ್ದಾಣದಲ್ಲಿ ರೈಲ್ವೇ ರಕ್ಷಣಾ ಪಡೆ (ಆರ್​ಪಿಎಫ್​) ಸಿಬ್ಬಂದಿ ಪತ್ತೆ ಮಾಡಿ, ಕಣ್ಣೂರು ಪೊಲೀಸರಿಗೆ ಒಪ್ಪಿಸಿದ್ದಾರೆ.

ಕಣ್ಣೂರು ಸಮೀಪದ ಶಿವಪುರದಲ್ಲಿರುವ ಪೋಕ್ಸೋ ಸಂತ್ರಸ್ತರ ಪುನರ್ವಸತಿ ಕೇಂದ್ರದ ನಾಲ್ವರು 16, 17, 18 ಮತ್ತು 19 ವರ್ಷದ ಬಾಲಕಿಯರು ಸೆಪ್ಟೆಂಬರ್​ 4 ರಂದು ತಪ್ಪಿಸಿಕೊಂಡು ಬಂದಿದ್ದು, ತಿರುವನಂತಪುರಂ ಸೆಂಟ್ರಲ್​- ಮತ್ತು ವೆರಾವಲ್​ ವೀಕ್ಲಿ ಎಕ್ಸ್​ಪ್ರೆಸ್​ ರೈಲು ಹತ್ತಿದ್ದು, ಮುಂಬೈಗೆ ಟಿಕೇಟ್​ ಮಾಡಿದ್ದರು. ಆದರೆ ಮೊಬೈಲ್​ ಟ್ರೇಸ್​ ಅಗುವುದನ್ನು ತಪ್ಪಿಸುವ ನಿಟ್ಟಿನಲ್ಲಿ ಮೊಬೈಲ್​ ರೈಲಿನಲ್ಲೇ ಬಿಟ್ಟು ಉಡುಪಿಯಲ್ಲಿ ಮಂಗಳವಾರ ಬೆಳಗ್ಗೆ ಇಳಿದ 5 ಮಂದಿ ನಂತರ ಕೃಷ್ಣ ಮಠಕ್ಕೆ ಭೇಟಿ ನೀಡಿದ್ದರು.

ಈ ಬಗ್ಗೆ ಉಡುಪಿ ರೈಲು ನಿಲ್ದಾಣದಲ್ಲಿ ಆಟೋರಿಕ್ಷಾ ಚಾಲಕರಿಂದ ಮಾಹಿತಿ ಪಡೆದ ಆರ್​ಪಿಎಫ್​ ಅಧಿಕಾರಿಗಳು, ಸಿಸಿಟಿವಿ ಕ್ಯಾಮೆರಾ ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ ಬೆಳಗ್ಗೆ 5.50ಕ್ಕೆ ರೈಲಿನಿಂದ ಇಳಿದ ಬಾಲಕಿಯರು ಮತ್ತು ಮಹಿಳೆ ಆಟೋರಿಕ್ಷಾ ನಿಲ್ದಾಣಕ್ಕೆ ತೆರಳಿದ್ದನ್ನು ಗಮನಿಸಿದ್ದಾರೆ.

ಈ ತಂಡ ಮುಂಬೈ ಅಥವಾ ಚೆನ್ನೆಗೆ ಹೋಗುವ ನಿಟ್ಟಿನಲ್ಲಿ ಮಧ್ಯಾಹ್ನ 1 ಗಂಟೆಗೆ ಉಡುಪಿ ರೈಲು ನಿಲ್ದಾಣಕ್ಕೆ ಮರಳಿತ್ತು. ಈ ಸಂದರ್ಭದಲ್ಲಿ 5 ಮಂದಿಯನ್ನೂ ವಶಕ್ಕೆ ಪಡೆದ ಆರ್​ಪಿಎಫ್​ ಅಧಿಕಾರಿಗಳು ವಿಚಾರಣೆ ನಡೆಸಿ, ಕೇರಳ ಪೊಲೀಸರಿಗೆ ಮಾಹಿತಿ ನೀಡಿದ್ದರು.