ಐಟಿ ವಲಯದಲ್ಲಿ ಕನ್ನಡ ಹೆಚ್ಚು ಬಳಕೆಯಾಗಲಿ:ನಿರ್ದೇಶಕ ಯೋಗರಾಜ್​ ಭಟ್​ ಹೇಳಿಕೆ

ಬೆಂಗಳೂರು: ನಾವೆಲ್ಲರೂ ಪರಿಣಾಮಕಾರಿಯಾಗಿ ಬಳಸಿದರಷ್ಟೇ ಕನ್ನಡ ಉಳಿಯಲು ಸಾಧ್ಯ. ಇದಕ್ಕಾಗಿ ಐಟಿ ವಲಯದಲ್ಲಿ ಹೆಚ್ಚು ಕನ್ನಡ ಬಳಕೆಯಾಗಬೇಕೆಂದು ನಿರ್ದೇಶಕ ಯೋಗರಾಜ್​ ಭಟ್​ ಹೇಳಿದ್ದಾರೆ.

"ನಮ್ಮ ಸಂಸತಿಯನ್ನು ಸಂಭ್ರಮಿಸೋಣ, ನಮ್ಮ ಕನ್ನಡಕ್ಕಾಗಿ ನಡೆಯೋಣ' ಧ್ಯೇಯ ವಾಕ್ಯದೊಂದಿಗೆ ಕಾರ್ಪೋರೇಟ್​​ ಕನ್ನಡಿಗರು ಸಂಸ್ಥೆ, ಜಯನಗರದ 2ನೇ ಬ್ಲಾಕ್​ನಲ್ಲಿ ಭಾನುವಾರ ಆಯೋಜಿಸಲಾಗಿದ್ದ "ಕನ್ನಡಕ್ಕಾಗಿ ನಡಿಗೆ' ವಾಕಥಾನ್​ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಬೆಂಗಳೂರು ನಗರ ದೇಶದ ಐಟಿ ರಾಜಧಾನಿಯಾಗಲು ಇಲ್ಲಿನ ಕಾರ್ಪೊರೇಟ್​ ಕನ್ನಡಿಗರ ಕೊಡುಗೆ ಬಹಳಷ್ಟಿದೆ. ವಿಶ್ವದಾದ್ಯಂತ ಕನ್ನಡ ಪಸರಿಸಲು ಸಿಲಿಕಾನ್​ ಸಿಟಿಯ ವ್ಯವಸಾಯಿಗಳು ಹಾಗೂ ತಂತ್ರಜ್ಷಾನ ಕ್ಷೇತ್ರ ಕನ್ನಡ ಉದ್ಯೋಗಿಗಳು ಸಾಕಷ್ಟು ಶ್ರಮಿಸಿದ್ದಾರೆ. ಕನ್ನಡದ ಅಸ್ಮಿತೆ ಉಳಿಸುವಲ್ಲಿ ಕಾರ್ಪೊರೇಟ್​ ಕನ್ನಡಿಗರು ಕೊಡುಗೆಯೂ ಹೆಚ್ಚಿದೆ ಎಂದರು.

ವಾಕಥಾನ್​ನಲ್ಲಿ ಸಾವಿರಕ್ಕೂ ಅಧಿಕ ಐಟಿ&ಬಿಟಿ ಸೇರಿ ಇತರ ವಲಯದ ಕಾರ್ಪೊರೇಟ್​ ಕನ್ನಡಿಗರು ಪಾಲ್ಗೊಂಡಿದ್ದರು. ವಿಜೃಂಭಣೆಯಿಂದ ವಿವಿಧ ಸಾಂಸತಿಕ ಕಾರ್ಯಕ್ರಮಗಳು ನಡೆದವು. ಶಾಸಕ ಉದಯ್​ ಬಿ.ಗರುಡಾಚಾರ್​, ದಕ್ಷಿಣ ಸಂಚಾರ ವಿಭಾಗ ಉಪ ಪೊಲೀಸ್​ ಆಯುಕ್ತ ಶಿವಪ್ರಕಾಶ್​ ದೇವರಾಜು, ನಟರಾದ ರಾಕೇಶ್​ ಮಯ್ಯ, ಸಂಜನ್​ ಕಜೆ, ಕಾರ್ಪೊರೇಟ್​ ಕನ್ನಡಿಗರ ವೇದಿಕೆಯ ನಿತೇಶ್​ ಮೂರ್ತಿ, ಎಸ್​. ಜಯರಾಮ್​, ಗೋವಿಂದಯ್ಯ,ಅಚ್ಚುತ್​ಗೌಡ ಮತ್ತಿತರರಿದ್ದರು.

https://www.vijayavani.net/hd-kumaraswamy-reaction-on-nikhil-kumaraswamy-defeat-in-channapatna-by-poll