ಕನ್ನಡದ ಮನಸ್ಸುಗಳು ಒಂದಾಗಿವೆ, ಕೋಟಿ ಕಂಠ ಗಾಯನ ಎಲ್ಲರನ್ನೂ ಒಂದುಗೂಡಿಸಿದೆ: ಸಿಎಂ ಬೊಮ್ಮಾಯಿ

ಬೆಂಗಳೂರು: ಕನ್ನಡದ ಮನಸ್ಸುಗಳು ಒಂದಾಗಿದೆ. ಕೋಟಿ ಕಂಠ ಗಾಯನ ಎಲ್ಲರನ್ನೂ ಒಂದುಗೂಡಿಸಿದೆ. ಒಂದು ಕೋಟಿಗೂ ಅಧಿಕ ಜನರು ಕನ್ನಡದ ಗೀತೆಗಳನ್ನು ಹಾಡುವ ಮೂಲಕ ಕನ್ನಡದ ಮನಸ್ಸುಗಳು ಒಂದಾಗಬೇಕು ಹಂಬಲ ಈಡೇರಿದೆ ಎಂದು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಹೇಳಿದರು.

ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ 67ನೇ ಕರ್ನಾಟಕ ರಾಜ್ಯೋತ್ಸವದ ಅಂಗವಾಗಿ ಕಂಠೀರವ ಕ್ರೀಡಾಂಗಣದಲ್ಲಿ ಆಯೋಜಿಸಿದ್ದ ಕೋಟಿಕಂಠ ಗಾಯನ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಕೋಟಿ ಕಂಠ ಗಾಯನ ಇಂದು ದಾಖಲೆಯನ್ನು ಸೃಷ್ಟಿಸಿದೆ. ಪ್ರತಿಯೊಂದು ಹಳ್ಳಿ-ಹಳ್ಳಿಯಲ್ಲೂ ಶಾಲೆ-ಶಾಲೆಗಳಲ್ಲೂ ಗಾಯನದ ಮೂಲಕ ಕನ್ನಡ ರಿಂಗಣಿಸಿದೆ. ಕನ್ನಡ ನಾಡು ಕನ್ನಡಮಯವಾಗಿದೆ. ಕನ್ನಡ ತಾಯಿ ಭುವನೇಶ್ವರಿಗೆ ನಾವು ನಮ್ಮ ನಮನಗಳನ್ನು ಅರ್ಪಿಸಿದ್ದೇವೆ. ಇದುವೇ ನಮ್ಮ ಶಕ್ತಿ. ಕರ್ನಾಟಕದ ಭವ್ಯ ಭವಿಷ್ಯವನ್ನು ಬರೆಯುವಂತಹ ಸಂಕಲ್ಪ ಮಾಡೋಣ. ನನ್ನ ಎದೆ ತುಂಬಿ ಬಂದಿದೆ. ಕನ್ನಡ ನಾಡು- ನುಡಿಯ ಉತ್ತಮ ಭವಿಷ್ಯಕ್ಕೆ ನವ ಕರ್ನಾಟಕ ನಿರ್ಮಾಣ ಮಾಡೋಣ, ಇದರಿಂದ ಭಾರತ ನಿರ್ಮಾಣ ಸಾಧ್ಯ ಎಂದರು.

ಮಾಜಿ ಸಿಎಂ ಬಿ.ಎಸ್​.ಯಡಿಯೂರಪ್ಪ, ಸಚಿವರಾದ ಸುನಿಲ್​ ಕುಮಾರ್​, ಆರ್​.ಅಶೋಕ್​, ಸಂಸದರಾದ ಡಿ.ವಿ.ಸದಾನಂದಗೌಡ, ತೇಜಸ್ವಿ ಸೂರ್ಯ, ರಾಜ್ಯಸಭೆ ಸದಸ್ಯ ಜಗ್ಗೇಶ್​, ಕಸಾಪ ಅಧ್ಯಕ್ಷ ಮಹೇಶ್​ ಜೋಶಿ ಸೇರಿದಂತೆ ಹಲವರು ಉಪಸ್ಥಿತರಿದ್ದರು. 35 ಸಾವಿರಕ್ಕೂ ಅಧಿಕ ಮಂದಿ ಕೋಟಿ ಗಾಯನದಲ್ಲಿ ಭಾಗವಹಿಸಿದ್ದರು.

https://www.vijayavani.net/koti-kanta-gayana-kannada-rajyotsava/

https://www.vijayavani.net/basavanna-vachana-competition-on-nov-20-cash-prize-for-winners/

https://www.vijayavani.net/gopooja-cow-gold-chain/