2014ರಲ್ಲಿ ಹಾಸನ ಜಿಲ್ಲೆಯ ಆಲೂರಿನಲ್ಲಿ ನಡೆದ ಆನೆ ಸೆರೆ ಕಾರ್ಯಾಚರಣೆಯಲ್ಲಿ ಕಂಜನ್ ಆನೆಯನ್ನು ಸೆರೆ ಹಿಡಿಯಲಾಯಿತು. ಪುಂಡಾಟಿಕೆ ಮಾಡುತ್ತಿದ್ದ ಕಾರಣ ದುಬಾರೆ ಆನೆ ಶಿಬಿರಕ್ಕೆ ತಂದು ಪಳಗಿಸಲಾಯಿತು. ಸೆರೆ ಸಿಕ್ಕ ಎರಡು, ಮೂರು ತಿಂಗಳಿನಲ್ಲೇ ಕಂಜನ್ ಶಿಬಿರದ ನೆಚ್ಚಿನ ಆನೆಯಾದ. ಇವನದು ಶಾಂತ ಸ್ವಭಾವ, ಧೈರ್ಯಶಾಲಿ. ಹುಲಿ, ಆನೆ ಕಾರ್ಯಾಚರಣೆಯಲ್ಲಿ ಭಾಗವಹಿಸಿದ ಹೆಗ್ಗಳಿಕೆ ಇದೆ. ಕೊಡಗಿನಲ್ಲಿ ನಡೆದ ಹುಲಿ ಹಿಡಿಯುವ ಕಾರ್ಯಾಚರಣೆಯಲ್ಲೂ ಭಾಗವಹಿಸಿತ್ತು. ಮಂಗಳೂರಿನ ಕಡಬಾದಲ್ಲಿ ನಡೆದ ಆನೆ ಸೆರೆ ಕಾರ್ಯಾಚರಣೆಯಲ್ಲೂ ಭಾಗವಹಿಸಿದ್ದಾನೆ.
ಕಂಜನ್ ಆನೆಯನ್ನು ಮೊದಲು ಮಾವುತ ಗೋಪಾಲ ಆರೈಕೆ ಮಾಡುತ್ತಿದ್ದರು. ಆದರೆ, ಅವರಿಗೆ ಅನಾರೋಗ್ಯದ ಹಿನ್ನೆಲೆಯಲ್ಲಿ ಇದೀಗ ಮಾವುತರಾಗಿ ವಿಜಯ್, ಕಾವಾಡಿಯಾಗಿ ಮಣಿಕಂಠ ಕಂಜನ್ ಪೋಷಣೆ ಮಾಡುತ್ತಿದ್ದಾರೆ.
