ಕಾಳಜಿ ಕೇಂದ್ರಕ್ಕೆ ಬಾರದ ನದಿ ತೀರದ ಸಂತ್ರಸ್ತರು

ಕಂಪ್ಲಿ ಕೋಟೆ ಪ್ರದೇಶದಲ್ಲೇ ತೆರೆಯಬೇಕೆಂಬ ಒತ್ತಾಯ | ಈವರೆಗೆ ಕಲ್ಪಿಸಿಲ್ಲ ನಿವೇಶನ

ಕಂಪ್ಲಿ ಕೋಟೆಯ ಪಂಪಾಪತಿ ದೇವಸ್ಥಾನದ ರಸ್ತೆ ಜಲಾವೃತಗೊಂಡಿರುವುದು.

ಕಂಪ್ಲಿ: ಇಲ್ಲಿನ ತುಂಗಭದ್ರಾ ನದಿ ಪ್ರವಾಹದ ಸಂತ್ರಸ್ತರು ಮತ್ತು ತಾಲೂಕು ಆಡಳಿತದ ಮಧ್ಯೆ ಕಾಳಜಿ ಕೇಂದ್ರ ಕುರಿತಾಗಿ ಶೀತಲ ಸಮರ ಸಾಗಿದೆ. ಪಟ್ಟಣದ ಎಂಟನೇ ವಾರ್ಡ್ ಸಹಿಪ್ರಾ ಶಾಲೆಯಲ್ಲಿ ಕಾಳಜಿ ಕೇಂದ್ರ ತೆರೆದಿದ್ದರೂ ಸಂತ್ರಸ್ತರು ತೆರಳುತ್ತಿಲ್ಲ. ಕೋಟೆ ಪ್ರದೇಶದಲ್ಲೇ ಕೇಂದ್ರ ತೆರೆಯಬೇಕೆಂಬ ಒತ್ತಾಯ ಅವರದು.

ಕೋಟೆ ಪ್ರದೇಶದ ಒಂದನೇ ವಾರ್ಡ್ ಗಂಗಮ್ಮನ ದಿಡ್ಡಿ ಪ್ರದೇಶದಲ್ಲಿ ನದಿ ತಟದಲ್ಲಿನ ಮನೆಗಳು ಅಪಾಯ ಸ್ಥಿತಿಯಲ್ಲಿವೆ. ನೀರು ಬರುತ್ತದೆ ಎಂದು ಏಕಾಏಕಿ ಮನೆ ಬಿಡಿಸಿದ್ದರಿಂದ ಬೇರೆಮನೆಯಲ್ಲಿ ಸಾಮಾನು ಹಾಕಿದ್ದೇನೆ. ಊಟದ ಚಿಂತೆಯಾಗಿದೆ. ಎಲ್ಲೋ ಕಾಳಜಿ ಕೇಂದ್ರ ತೆರೆದರೆ ನಮ್ಮಂಥ ವೃದ್ಧರ ಗತಿ ಏನು ಎಂದು ಹಾದಿಮನೆ ಹುಲಿಗೆಮ್ಮ ಪ್ರಶಿಸಿದರು. 1992ರಲ್ಲೇ ಇಲ್ಲಿನ ಮನೆಗಳನ್ನು ಬಿಡಿಸಿ ನಿವೇಶನ ಕೊಡುತ್ತೇವೆಂದು ಹೇಳಿದ್ದು, ಈತನಕವೂ ಕಾರ್ಯರೂಪಕ್ಕೆ ಬಂದಿಲ್ಲ ಎಂದು ಓರ‌್ವಾಯಿ ಗಂಗಮ್ಮ ಬೇಸರ ವ್ಯಕ್ತಪಡಿಸಿದರು.

ಮೀನುಬೇಟೆ ಇಲ್ಲ, ಇತ್ತ ಕೃಷಿ ಕೂಲಿ ಇಲ್ಲ, ದುಡಿಮೆಯೂ ಇಲ್ಲ. ಊಟಕ್ಕೆ ತತ್ವಾರವಾಗಿದೆ. ಕೋಟೆ ಪ್ರದೇಶದೊಳಗೆ ಕಾಳಜಿ ಕೇಂದ್ರ ತೆರೆಯಬೇಕು. ಅದು ಬಿಟ್ಟು ಎಲ್ಲೋ ತೆರೆದರೆ ವೃದ್ಧರು ಹೋಗಲು ಆಗಲ್ಲ ಎಂದು ಮೀನುಗಾರ ಲಕ್ಷ್ಮೀ ಅಸಮಾಧಾನ ವ್ಯಕ್ತಪಡಿಸುತ್ತಾರೆ. ಇಲ್ಲಿಗೆ ಪಾಕೆಟ್ ಆಹಾರ ಒದಗಿಸಲಿ ಎನ್ನುವುದು ಸೆರೆಗಾರ ಶಾಂತ, ನಾಗೇನಹಳ್ಳಿ ಹನುಮಂತಿ ಅವರ ಒತ್ತಾಯ. ಪೊಲೀಸರು ಮನೆ ಬಿಟ್ಟು ಹೋಗಿ ಅಂತಾರೆ. ಕೋಟೆಯ ಅಗಸಿ ಬಳಿಯ ಗರಡಿ ಕಟ್ಟೆ ಹಿಂದೆ ಕಾಳಜಿ ಕೇಂದ್ರ ತೆರೆಯಲಿ, ಅಲ್ಲಿಗೆ ಹೋಗಿ ಬರಬಹುದು. ನಮ್ಮ ತಿಪ್ಲ ನಮಗೆ ಎಂದು ಮುದ್ದಾಪುರ ಹನುಮಂತಮ್ಮ ಸಂಕಟ ವ್ಯಕ್ತಪಡಿಸಿದ್ದಾರೆ.

ತಗ್ಗು ಪ್ರದೇಶಕ್ಕೆ ನುಗ್ಗಿದ ನೀರು

ತುಂಗಭದ್ರಾ ನದಿಯಲ್ಲಿ ನೀರಿನ ಹರಿವು ಹೆಚ್ಚಿದ್ದು ಕಂಪ್ಲಿ ಸೇತುವೆ ಮುಳುಗಡೆಯಾಗಿದೆ. ನದಿಗೆ 1.50ಲಕ್ಷ ಕ್ಯೂಸೆಕ್ ನೀರು ಹರಿದು ಬಂದಿದ್ದರಿಂದ ನದಿಪಾತ್ರದ ತಗ್ಗು ಪ್ರದೇಶಕ್ಕೆ ನೀರು ನುಗ್ಗಿದೆ. ಸೇತುವೆಯ ರಕ್ಷಣಾ ಕಂಬಿಗಳಿಗೆ ಜಲಸಸ್ಯಗಳು ಅಡರಿ ನಿಂತಿವೆ. ಕೋಟೆ ಮಹಾದ್ವಾರ, ಮೀನುಗಾರ ಕಾಳಮ್ಮ ಗುಡಿಗೆ ನೀರು ನುಗ್ಗಿದೆ. ಸುಂಕ್ಲಮ್ಮ ಗುಡಿ ಪಕ್ಕದ ಬಾಳೆ ತೋಟಕ್ಕೆ, ಸುಂಕ್ಲಮ್ಮನ ಪಾದಗಟ್ಟೆ, ಲಕ್ಷ್ಮೀ ವೆಂಕಟ ರಮಣ, ಹೊಳೆ ಆಂಜನೇಯ ದೇವಸ್ಥಾನ ಜಲಾವೃತ ಗೊಂಡಿವೆ. ನದಿಗೆ ಜನರು ಇಳಿಯದಂತೆ ಪೊಲೀಸರು ಭದ್ರತೆ ಒದಗಿಸಿದ್ದಾರೆ.