ರಸ್ತೆಗೆ ಮಾರಕವಾದ ಕೇಜ್‌ವ್ಹೀಲ್ ಬಳಕೆ

ಕಂಪ್ಲಿ: ತಾಲೂಕಿನ ಬಹುತೇಕ ರಸ್ತೆಗಳಲ್ಲಿ ಉದ್ದನೆಯ ಗೆರೆಗಳು ಮೂಡಿದ್ದು, ಬೈಕ್‌ಗಳನ್ನು ಅಲ್ಲಾಡಿಸುವಷ್ಟು ದಟ್ಟವಾಗಿವೆ. ಟ್ರ್ಯಾಕ್ಟರ್‌ಗೆ ಕೇಜ್‌ವ್ಹೀಲ್ ಅಳವಡಿಸಿಕೊಂಡು ಒಯ್ಯುತ್ತಿರುವುದರಿಂದ ಮೂಡಿದ್ದು, ರಸ್ತೆಗಳು ಹಾಳಾಗುತ್ತಿವೆ. ಅಲ್ಲದೆ ಸಂಚಾರವೂ ಕಷ್ಟವಾಗಿದೆ.

ಉತ್ತಮ ಮಳೆ, ಕಾಲುವೆಗಳಲ್ಲಿ ನೀರು ಹರಿಯುತ್ತಿರು ವುದರಿಂದ ಅಚ್ಚುಕಟ್ಟು ಪ್ರದೇಶದಲ್ಲಿ ಕೃಷಿ ಚಟುವಟಿಕೆಗಳು ಆರಂಭವಾಗಿವೆ. ರೈತರು ಭೂಮಿ ಸಿದ್ಧತೆಗೆ ಟ್ರ್ಯಾಕ್ಟರ್ ಬಳಸುವುದು ಸಾಮಾನ್ಯ. ಕಬ್ಬಿಣದ ಕೇಜ್‌ವ್ಹೀಲ್‌ಗಳನ್ನು ಟ್ರ್ಯಾಕ್ಟರ್‌ಗೆ ಜೋಡಿಸಿ ಗದ್ದೆಗೆ ಒಯ್ಯುವುದು ರೂಢಿ. ರಸ್ತೆ ಮೂಲಕ ಒಯ್ಯುವುದರಿಂದ ರಸ್ತೆಗಳು ಬಿದ್ದು, ಬಹುಬೇಗ ಹಾಳಾಗಲು ಕಾರಣವಾಗುತ್ತಿದೆ. ಕೇಜ್‌ವ್ಹೀಲ್ ಅನ್ನು ಟ್ರ್ಯಾಕ್ಟರ್‌ಗೆ ಅಳವಡಿಸಿ, ಮೇಲೆತ್ತಿಕೊಂಡು ಹೋಗಬೇಕು. ಯಾವುದೇ ಕಾರಣಕ್ಕೂ ಕೇಜ್‌ವ್ಹೀಲ್ ರಸ್ತೆಗೆ ತಾಕಬಾರದು. ರೈತರು ಈ ಕುರಿತು ಮುಂಜಾಗ್ರತೆವಹಿಸಬೇಕು ಎಂಬ ಒತ್ತಾಯ ಕೇಳಿಬಂದಿದೆ.