ಶವಸಂಸ್ಕಾರ ಸಂದರ್ಭದಲ್ಲಿ ನಾಲ್ವರು ಮಸಣ ಕಾರ್ಮಿಕರು ಕಾರ್ಯನಿರ್ವಹಿಸಿ ತಲಾ ಐದಾರು ನೂರು ರೂ. ಕೂಲಿ ಪಡೆದುಕೊಳ್ಳುತ್ತಾರೆ. ಕೆಲವೊಮ್ಮೆ ಬಡವರ ಶವಸಂಸ್ಕಾರದಲ್ಲಿ ಕೂಲಿಗೂ ತತ್ವಾರ ಆಗುವುದುಂಟು. ಮಸಣ ವೃತ್ತಿ ಇಲ್ಲದಿದ್ದಾಗ ಕೃಷಿ ಕೂಲಿ, ಕಟ್ಟಡ ನಿರ್ಮಾಣ ಮೊದಲಾದ ಕೆಲಸಗಳನ್ನು ಹುಡುಕಿಕೊಂಡು ಹೋಗಬೇಕಿದೆ. ಇದಲ್ಲದೆ ಶವಸಂಸ್ಕಾರ ವೃತ್ತಿ ಸಂಬಂಧಿತ ತೊಂದರೆ, ರೋಗ ರುಜಿನಗಳನ್ನು ಸಹಿಸಿಕೊಳ್ಳಬೇಕಿದೆ.
ಪ್ರತಿ ರುದ್ರಭೂಮಿಗೂ ಸ್ಥಳೀಯ ಸಂಸ್ಥೆಗಳು ಮಸಣ ನಿರ್ವಾಹಕರೆಂದು ನೇಮಕ ಮಾಡಿಕೊಳ್ಳಬೇಕು. ಮಸಣ ಕಾರ್ಮಿಕರ ಗಣತಿ ಮಾಡಬೇಕು. ಶವ ಸಂಸ್ಕಾರದ ಕುಣಿ ತೆಗೆಯುವ ಉದ್ಯೋಗವನ್ನು ನರೇಗಾ ಕೆಲಸವೆಂದು ಪರಿಗಣಿಸಿ ಪ್ರತಿ ಕುಣಿಗೂ ಕನಿಷ್ಠ 3000 ರೂ. ಕೂಲಿ ಪಾವತಿಸಬೇಕು. ಮಸಣ ಕಾರ್ಮಿಕರಿಗೆ ಅಗತ್ಯ ಸುರಕ್ಷಾ ಪರಿಕರಗಳನ್ನು ಒದಗಿಸಬೇಕು. ಭವಿಷ್ಯ ನಿಧಿ ಜಾರಿಗೊಳಿಸಬೇಕು. ಜೀವನ ನಿರ್ವಹಣೆಗೆ ಮಸಣ ಕಾರ್ಮಿಕ ಕುಟುಂಬಕ್ಕೆ ಐದು ಎಕರೆ ಜಮೀನು, ನಿವೇಶನದೊಂದಿಗೆ ವಸತಿ ಸೌಲಭ್ಯ, ಮಾಸಿಕ ಪಿಂಚಣಿ ಒದಗಿಸಬೇಕು. ಹೈನುಗಾರಿಕೆ ಇತರ ಸ್ವಉದ್ಯೋಗ ಕೈಗೊಳ್ಳಲು ಶೇ.75 ಸಹಾಯಧನ ಸೌಲಭ್ಯ ಒದಗಿಸಬೇಕಿದೆ. ಕಿರಾಣಿ, ಪಡಿತರ, ಮಕ್ಕಳಿಗೆ ಉಚಿತ ಉನ್ನತ ಶಿಕ್ಷಣ ಒದಗಿಸುವಲ್ಲಿ ಸರ್ಕಾರ ಮುಂದಾಗಬೇಕೆಂದು ಮಸಣ ಕಾರ್ಮಿಕರಾದ ಹುಲುಗಪ್ಪ ತಳವಾರ, ಪಿ.ರಾಮಲಿ, ಆದಿಮನಿ ವೀರೇಶ್, ಕುಚ್ಗಿಡಿ ವಿರುಪಣ್ಣ, ಸಿ.ರಮೇಶ್ ಆಗ್ರಹಿಸಿದ್ದಾರೆ.
