ನಮ್ಮ ಯಜಮಾನರು ಕೋಣವನ್ನು ಚೆನ್ನಾಗಿ ಸಾಕಿದ್ದರಿಂದ ವೇಗವಾಗಿ ಓಡಲು ಸಾಧ್ಯವಾಯಿತು ಎಂದವರು ಯಾರು?

ಬೆಂಗಳೂರು: ನಾನು ಇಷ್ಟೊಂದು ವೇಗವಾಗಿ ಓಡುತ್ತೇನೆ ಎಂದು ನನಗೆ ತಿಳಿದಿರಲಿಲ್ಲ ಎಂದು ಕಂಬಳ ಓಟದ ಶ್ರೀನಿವಾಸಗೌಡ ತಮ್ಮ ಸಾಧನೆ ಬಗ್ಗೆ ಅಚ್ಚರಿ ವ್ಯಕ್ತಪಡಿಸಿದರು.

ಮಾಧ್ಯಮದವರು ಹಾಗೂ ಜನರು ಈಗ ನನ್ನನ್ನು ಕಂಬಳದ ಉಸೇನ್​ ಬೋಲ್ಟ್​ ಎಂದೆ ಕರೆಯುತ್ತಿದ್ದಾರೆ. ಬೋಲ್ಟ್​ ಹೆಸರು ಕೇಳಿದ್ದೇನೆ. ಆದರೆ ಅವರ ಬಗ್ಗೆ ಮಾಹಿತಿ ಇಲ್ಲ. ನಮ್ಮ ಯಜಮಾನರು ಕೋಣವನ್ನು ಚೆನ್ನಾಗಿ ಸಾಕಿದ್ದರಿಂದ ನಾನು ವೇಗವಾಗಿ ಓಡಲು ಸಾಧ್ಯವಾಯಿತು ಎಂದು ತಮ್ಮ ಓಟದ ರಹಸ್ಯವನ್ನು ಅವರು ತಿಳಿಸಿದರು.

ನನ್ನ ಸಾಧನೆ ನೋಡಿ ಸರ್ಕಾರ ಗುರುತಿಸಿರುವುದು ಹಾಗೂ ಕರಾವಳಿ ಸಂಸ್ಕೃತಿಯನ್ನು ಇಡೀ ದೇಶ ಕೊಂಡಾಡುವಂತೆ ಮಾಡಿರುವುದು ನನಗೆ ಹೆಮ್ಮೆ ಎನಿಸಿದೆ. ಮಾರ್ಚ್ 10ರವರೆಗೆ ಕಂಬಳ ಓಟ ಇದೆ. ನಂತರ ನಾನು ಒಲಂಪಿಕ್​ ಕ್ರೀಡಾಕೂಟದಲ್ಲಿ ಸ್ಪರ್ಧಿಸಲು ತರಬೇತಿ ಪಡೆಯುತ್ತೇನೆ. 12 ಕಂಬಳ ಓಟದಲ್ಲಿ ಇದುವರೆಗೆ 35 ಪದಕ ಗೆದಿದ್ದೇನೆ ಎಂದರು.

ಶ್ರೀನಿವಾಸಗೌಡರಿಗೆ ತರಬೇತಿ ಅವಶ್ಯಕ: ಕಂಬಳ ಓಟಗಾರ ಶ್ರೀನಿವಾಸಗೌಡ ಅವರ ಸಾಧನೆ ಗಮನಿಸಿದ್ದೇನೆ. ಅವರು ಒಲಂಪಿಕ್ಸ್​ನಲ್ಲಿ ಸ್ಪರ್ಧಿಸಬೇಕಾದರೆ ತರಬೇತಿ ಅಗತ್ಯ. ತರಬೇತಿ ನೀಡಲು ಕೇಂದ್ರ ಸರ್ಕಾರ ಸಿದ್ಧ ಇದೆ ಎಂದು ಭಾರತೀಯ ಕ್ರೀಡಾ ಪ್ರಾಧಿಕಾರದ ನಿರ್ದೇಶಕ ಅಜಯ್​ ಕುಮಾರ್​ ಬೆಹಲ್​ ಹೇಳಿದರು. (ದಿಗ್ವಿಜಯ ನ್ಯೂಸ್​)