ಕಲಬುರಗಿಯಲ್ಲಿ ಮನೆ ಹೊಕ್ಕ ಕಳ್ಳರು: 20 ಲಕ್ಷದ ಚಿನ್ನಾಭರಣ ಕದ್ದು ಪರಾರಿ

ನಿವೃತ್ತ ಸರ್ಕಾರಿ ನೌಕರ ಈರಣ್ಣ ಮನೆಯಲ್ಲಿ ಪತ್ನಿ ಸಮೇತ ವಾಸವಾಗಿದ್ದು, ಪುತ್ರರು ಬೇರೆ ಊರಲ್ಲಿ ವಾಸವಾಗಿದ್ದಾರೆ. ನ.20ರಂದು ಬಾಗಲಕೋಟೆಗೆ ಹೋಗಿ, ನ.22ರಂದು ವಾಪಸ್​ ಬಂದಿದ್ದಾರೆ. ಈ ಮಧ್ಯೆ ದ್ವಾರಬಾಗಿಲ ಕೀಲಿ ಮುರಿದಿದ್ದು, ಒಳಗಿದ್ದ ಅಲಮಾರಿಯೂ ತೆರೆದಿದ್ದು ಕಂಡು ಬಂದಿದೆ.

ಒಳಗಡೆ ಇದ್ದ ಬಂಗಾರದ ಎರಡು ಎಳೆ ತಾಳಿ, ಜೋಡಿ ತಾಳಿ, ಬಂಗಾರದ ನಾನ್​, ಎರಡು ಲ ಹಾರ, ಬಿಲ್ವಾರಗಳು, ಬಂಗಾರದ ತೊಲೆ, ಎರಡು ಲಾಕಿಟ್​, ಎರಡು ಸುತ್ತುಂಗರ, ನೆಕ್ಲೇಸ್​ಗಳು, ಝುಮಕಿಗಳು, 4 ಜೊತೆ ಬೆಂಡೋಲೆಗಳು, ಬೆಳ್ಳಿಯ ಆರತಿ ಪಂಚಪಾಳ, ಜೋಡಿ ಸಮೆ, 60 ಸಾವಿರ ರೂ. ನಗದು ಸೇರಿ ಒಟ್ಟು 20.62 ಲಕ್ಷ ರೂ. ಮೌಲ್ಯದ ಕಳ್ಳತನ ನಡೆದಿದೆ ಎಂದು ಸ್ಟೇಷನ್​ ಬಜಾರ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಹಾಡಹಗಲೇ ಮನೆಗಳ್ಳತನ: ನಗರದ ಬಿದ್ದಾಪುರ ಕಾಲನಿ ರೈಲ್ವೆ ಕೆಳಸೇತುವೆ ಬಳಿ ಮನೆಯಲ್ಲಿ ಹಾಡಹಗಲಲ್ಲೇ 4.40 ಲಕ್ಷ ರೂ. ಮೌಲ್ಯದ ಚಿನ್ನಾಭರಣ ಕಳ್ಳತನ ಮಾಡಿದ ಟನೆ ನಡೆದಿದೆ. ಕಿರಾಣಿ ಅಂಗಡಿ ವ್ಯಾಪಾರಿ ಕಾಳಪ್ಪ ಮಾಳಗಿ ಅವರ ಮನೆಯಲ್ಲಿ ಕಳ್ಳತನ ನಡೆದಿದೆ. ಮಧ್ಯಾಹ್ನ 2ಗಂಟೆ ಸುಮಾರಿಗೆ ಮನೆಯಲ್ಲಿ ಚಿಕ್ಕ ಮಗಳು ಮಲಗಿದ್ದರಿಂದ ಬಾಗಿಲು ಮುಂದೆ ಮಾಡಿ, ಪತ್ನಿ ಜತೆಗೆ ಹೊರ ಹೋಗಿದ್ದಾರೆ. 4ಗಂಟೆ ಸುಮಾರಿಗೆ ವಾಪಸ್​ ಬಂದಾಗ ಮನೆಯಲ್ಲಿ ಮಗಳು ಮಲಗಿದ್ದ ಕೋಣೆಯ ಕೊಂಡಿ ಹಾಕಿದ್ದು, ಇನ್ನೊಂದು ಕೋಣೆಯ ಅಲಮಾರದಲ್ಲಿದ್ದ ಚಿನ್ನಾಭರಣ ಕಳ್ಳತನವಾಗಿದ್ದು, ತಿಳಿದಿದೆ. ಅಲಮಾರದಲ್ಲಿದ್ದ 1.90 ಲಕ್ಷ ರೂ. ನಗದು, 40 ಗ್ರಾಂ ಮಂಗಳಸೂತ್ರ, 3 ಗ್ರಾಂ ಬಂಗಾರದ ಉಂಗುರ ಸೇರಿ 4.40 ಲಕ್ಷ ರೂ. ಮೌಲ್ಯದ ಕಳ್ಳತನ ನಡೆದಿದೆ ಎಂದು ಅಶೋಕ ನಗರ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.