ಕಲಬುರಗಿ: ನಗರದ ಗಂಗೋತ್ರಿ ವೇದ ಪಾಠ ಶಾಲೆಯಲ್ಲಿ ಭಾನುವಾರ ನಡೆದ ರುದ್ರ ಅಧ್ಯಯನದ ಮೊದಲ ವರ್ಗದ ಸಮಾರೋಪ ಸಮಾರಂಭದಲ್ಲಿ ಲುನ್ಯಾಸ ಪೂರ್ವಕ ಏಕಾದಶವರ್ತನ ರುದ್ರಾಭಿಷೇಕ ಜರುಗಿತು. ಕಲಿತ ಪಾಠವನ್ನು ಗುರುಗಳಿಗೆ ಸಮರ್ಪಿಸುವುದರ ಅಂಗವಾಗಿ ಈ ರುದ್ರಪಠಣ ವಿದ್ಯಾರ್ಥಿಗಳಿಂದ ಮಂತ್ರೋಚ್ಚಾರಣೆ ಮೂಲಕ ನಡೆಯಿತು. ಪಾಠಶಾಲೆಯ ಸಂಸ್ಥಾಪಕ ವೇ.ಮೂ. ಶ್ರೀಮೋಹನಭಟ್ ಜೋಶಿ, ಡಾ.ಯೋಗೇಶ ಭಟ್ ಜೋಶಿ ಮತ್ತು ಲೋಕೇಶ ಭಟ್ ಜೋಶಿ ಇದ್ದರು. ಮೋಹನ ಭಟ್ ಜೋಶಿ ಅವರು ಆಶೀರ್ವಚನದಲ್ಲಿ ರುದ್ರಪಠಣವನ್ನು ಎಲ್ಲರೂ ನಿತ್ಯ ಆಚರಣೆಯನ್ನಾಗಿಸಿಕೊಳ್ಳಬೇಕು ಎಂದು ಕಿವಿಮಾತು ಹೇಳಿದರು. ಡಾ.ಯೋಗೇಶ ಭಟ್ ಅವರು ರುದ್ರ ಮಹಿಮೆ ತಿಳಿಸಿ, ರುದ್ರ ಪಠಣವು ವೇದಾಧ್ಯಯನಕ್ಕೆ ಸಮಾನ. ಈ ರುದ್ರಪಾಠದ ವ್ಯವಸ್ಥೆ ಮುಂದುವರಿಸಲಾಗುವುದು. ಆಸಕ್ತರು ರುದ್ರಾಭ್ಯಾಸಕ್ಕಾಗಿ ಗಂಗೋತ್ರಿ ವೇದ ಪಾಠಶಾಲೆ ಸಂಪರ್ಕಿಸಬಹುದು ಎಂದು ಹೇಳಿದರು. ಲೋಕೇಶ ಭಟ್ ಪೂಜಾ ಕೈಂಕರ್ಯ ನೆರವೇರಿಸಿದರು. ಮಹೇಶ ಚಿಲ್ಲಾಪೂರ ಕಾರ್ಯಕ್ರಮದ ವಿವರಣೆ ನೀಡಿದರು. ದೇವತಾ ಕಾರ್ಯದ ನಂತರ ಭಕ್ತರಿಗೆ ಮಹಾಪ್ರಸಾದ ವಿತರಣೆ ಏರ್ಪಡಿಸಲಾಗಿತ್ತು.
