ಪರಿಹಾರ ನೀಡದ್ದಕ್ಕೆ ಕಲಬುರಗಿ ಡಿಸಿ ಕಾರ್​ ಜಪ್ತಿ

ಪ್ರಧಾನ ಸಿವಿಲ್​ ನ್ಯಾಯಾಲಯದ ಸಿಜೆಎಂ ನ್ಯಾಯಾಧೀಶರ ಆದೇಶದಂತೆ ನ್ಯಾಯಾಂಗ ಇಲಾಖೆ ಸಿಬ್ಬಂದಿಯೂ ಜಿಲ್ಲಾಧಿಕಾರಿ ಕಚೇರಿ ಎದುರು ನಿಲುಗಡೆ ಮಾಡಿದ್ದ ಕಾರ್​ನ್ನು ಜಪ್ತಿ ಮಾಡಿ, ಕೋರ್ಟ್​ಗೆ ಕೊಂಡ್ಯೊಯ್ದರು.

ನಂದಿಕೂರದಲ್ಲಿ ಮಲಶುದ್ಧೀಕರಣ ಟಕ ಸ್ಥಾಪನೆಗಾಗಿ 11 ಜನರಿಂದ ಭೂಸ್ವಾಧಿನ ಪಡೆದುಕೊಂಡಿದ್ದು, ಅದರಲ್ಲಿ ಐವರಿಗೆ ಹೆಚ್ಚುವರಿ ಮೊತ್ತ ಪರಿಹಾರ ನೀಡಬೇಕಿತ್ತು. ಪರಿಹಾರ ನೀಡುವಲ್ಲಿ ವಿಳಂಬ ಮಾಡಿದ್ದಕ್ಕೆ ಪ್ರಕಾಶ ಮಲಕಪ್ಪ ಎಂಬುವವರು ಕೋರ್ಟ್​ ಮೊರೆ ಹೋಗಿದ್ದು, ವಿಚಾರಣೆ ನಡೆಸಿದ ಕೋರ್ಟ್​ ವಿಳಂಬ ಮಾಡಿದ್ದಕ್ಕೆ ಡಿಸಿ ಕಚೇರಿಯ ಸ್ವತ್ತು ಜಪ್ತಿಗೆ ಆದೇಶಿಸಿತ್ತು.

ಕೋರ್ಟ್​ ಆದೇಶದಂತೆ ಗುರುವಾರ ಮಧ್ಯಾಹ್ನ ನ್ಯಾಯಾಂಗ ಸಿಬ್ಬಂದಿಯೂ ಡಿಸಿ ಕಾರ್​ನ್ನು ಟೋಚರ್​ ಮೂಲಕ ತೆಗೆದುಕೊಂಡು ಹೋಗಲು ಮುಂದಾದರು. ಈ ವೇಳೆ ಅಪರ ಜಿಲ್ಲಾಧಿಕಾರಿ ರಾಯಪ್ಪ ಹುಣಸಗಿ, ಸಹಾಯಕ ಆಯುಕ್ತೆ ಸಾಹಿತ್ಯ, ಪಾಲಿಕೆ ಆಯುಕ್ತ ಅವಿನಾಶ ಶಿಂಧೆ ಅವರು ಅರ್ಜಿದಾರರ ಪರ ವಕೀಲರಿಗೆ ಮನವೊಲಿಸಲು ಪ್ರಯತ್ನಿಸಿದರು. ಈ ಮಧ್ಯೆ ಕಾರ್​ ತೆಗೆದುಕೊಂಡು ಕೋರ್ಟ್​ಗೆ ಹೋಗಲಾಯಿತು.

ತಕ್ಷಣ ಕಾರ್ಯಪ್ರವೃತ್ತರಾದ ಅಧಿಕಾರಿಗಳು ಕೋರ್ಟ್​ಗೆ ಹಾಜರಾಗಿ, ನ್ಯಾಯಾಧೀಶರ ಎದುರು ಪರಿಹಾರ ಕೊಡಿಸಲಾಗುವುದು. ಕಾರ್​ ಬಿಡುಗಡೆ ಮಾಡಿ ಎಂದು ವಿನಂತಿ ಮಾಡಿದರು. ಅಲ್ಲದೇ ಪಾಲಿಕೆಯಿಂದ ಐದು ಲಕ್ಷ ರೂ. ಚೆಕ್​ ನೀಡಿದರು. ಒಂದು ತಿಂಗಳಲ್ಲಿ ಪರಿಹಾರ ನೀಡಬೇಕು ಎಂದು ಸೂಚನೆ ನೀಡಿದ ಕೋರ್ಟ್​ ಕಾರ್​ ಬಿಡುಗಡೆ ಮಾಡಿ, ಆದೇಶಿಸಿದ್ದರಿಂದ ಕಾರ್​ ಮರಳಿ ಡಿಸಿ ಕಚೇರಿಗೆ ತರಲಾಯಿತು.