ರೈತರಿಗೆ ಪರಿಹಾರ, ಸರ್ವರ ಅಭಿವೃದ್ಧಿ ಸಾಕಾರ

ಕಂದಾಯ ಇಲಾಖೆ, ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣ ಇಲಾಖೆ ಮತ್ತು ಕಲ್ಯಾಣ ಕರ್ನಾಟಕ ಪ್ರದೇಶ ಅಭಿವೃದ್ಧಿ ಮಂಡಳಿಯಿಂದ ಏರ್ಪಡಿಸಿದ್ದ 17 ಪ್ರಜಾಸೌಧಗಳಿಗೆ, 300 ಕೆಪಿಎಸ್​ ಶಾಲೆಗಳಿಗೆ ಅಡಿಗಲ್ಲು, ಫಲಾನುಭವಿಗಳಿಗೆ ಸೌಲಭ್ಯಗಳ ವಿತರಣೆ ಕಾರ್ಯಕ್ರಮದಲ್ಲಿ ಮಾತನಾಡಿ, ರೈತರ ಖಾತೆಗಳಿಗೆ ಅನುದಾನ ತಲುಪಿಸಲಾಗಿದೆ. ಕಬ್ಬಿಗೆ ಸರ್ಕಾರದಿಂದ 50, ಕಾರ್ಖಾನೆಯಿಂದ 50 ರೂ. ನಿಗದಿ ಮಾಡಿ, 300 ಕೋಟಿ ರೂ. ಸರ್ಕಾರದಿಂದ ಕಬ್ಬು ಬೆಳೆಗಾರರಿಗೆ ನೀಡಲಾಗುತ್ತಿದೆ ಎಂದು ಹೇಳಿದರು.

ಎಐಸಿಸಿ ಅಧ್ಯಕ್ಷ ಡಾ.ಮಲ್ಲಿಕಾರ್ಜುನ ರ್ಖಗೆ ಮಾತನಾಡಿ, ದೇಶದಲ್ಲೇ 40 ವರ್ಷದಲ್ಲೇ 371 ಜೆ ಮಾದರಿ ಕಾನೂನು ಆಗಿದ್ದು, ಕಲ್ಯಾಣ ಕರ್ನಾಟಕದಲ್ಲಿ ಮಾತ್ರ. ಇದಕ್ಕೆ ಕಾಂಗ್ರೆಸ್​ ಪಕ್ಷದ ಸರ್ಕಾರ ಕಾರಣ. ನಮ್ಮ ಭಾಗದಲ್ಲಿ ಶಾಲೆಗಳು, ಕಟ್ಟಡಗಳಿದ್ದು, ಶಿಕ್ಷಕರನ್ನು ನೀಡದೇ ಅಭಿವೃದ್ಧಿ ಅಸಾಧ್ಯ. ವಿಜ್ಞಾನ, ಇಂಗ್ಲಿಷ್​, ಗಣಿತ ಶಿಕ್ಷಕರು ಇಲ್ಲ. ಆದ್ದರಿಂದ ಕಟ್ಟಡಕ್ಕಿಂತ ಮೊದಲು ಶಿಕ್ಷಕರನ್ನು ನೇಮಿಸಿ, ಬೇಕಿದ್ರೆ ಗಿಡದ ಕೆಳಗೆ ಕುಳಿತು ಓದಿಸಿ ಎಂದು ಸಲಹೆ ನೀಡಿದರು.

ಉಪಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್​ ಮಾತನಾಡಿ, ಕಾಂಗ್ರೆಸ್​ಗೆ ಈ ಭಾಗದ ಜನ ಶಕ್ತಿ ನೀಡಿದ್ದು, ಪ್ರಗತಿಗೆ ರಾಜ್ಯ ಸರ್ಕಾರ ಸಾಥ್​ ನೀಡುತ್ತಿದೆ. ಜೇವರ್ಗಿ ಕ್ಷೇತ್ರಕ್ಕೆ ಸಾವಿರ ಕೋಟಿ ರೂ. ನೀಡಲಾಗಿದೆ. ಡಾ.ಅಜಯಸಿಂಗ್​ ಸಾವಿರಾರು ಕೋಟಿ ರೂ. ತಂದು ಜನರ ಬದುಕು ಸುಧಾರಣೆಗೆ ಶ್ರಮಿಸುತ್ತಿದ್ದಾರೆ. ಮಲ್ಲಾಬಾದ್​ ಏತ ನೀರಾವರಿ ಯೋಜನೆಗೆ 360 ಕೋಟಿ ರೂ. ಘೋಷಿಸಿದ್ದು, ಪ್ರಕ್ರಿಯೆ ಶುರುವಾಗಿದೆ ಎಂದರು.

ಅಪರ ಜಿಲ್ಲಾಧಿಕಾರಿ ರಾಯಪ್ಪ ಹುಣಸಗಿ ಸ್ವಾಗತಿಸಿದರೆ, ಕೃಷಿ ಜಂಟಿ ನಿರ್ದೇಶಕ ಸಮದ್​ ಪಟೇಲ್​ ವಂದಿಸಿದರು.