ಕರ್ನಾಟಕದ ಸಂಸ್ಕೃತಿ ಬಿಂಬಿಸುವ ಶ್ರೇಷ್ಠ ಕಲೆ ಕಾವಿ...

ಉದ್ಯಮಿ ಅರವಿಂದ ಹೆಗಡೆ ಅಭಿಮತ

'ಕಾವ್ಯ ರೇಖಾ' ಪ್ರದರ್ಶನ ಉದ್ಘಾಟನೆ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಕರ್ನಾಟಕದ ಸಂಸ್ಕೃತಿ ಬಿಂಬಿಸುವ ಭಾಗವೇ ಆದ ಕಾವಿ ಕಲೆಯನ್ನು ಉಳಿಸಿ, ಬೆಳೆಸುವಂತಾಗಲು ಇನ್ನಷ್ಟು ಯುವ ಕಲಾವಿದರು ಈ ಕಲೆಯಲ್ಲಿ ತೊಡಗುವಂತಾಗಬೇಕು. ಅಳಿವಿನಂಚಿನಲ್ಲಿದ್ದ ಕರಾವಳಿಯ ಈ ಶ್ರೇಷ್ಠ ಕಲೆಯನ್ನು ಸಂರಕ್ಷಿಸುತ್ತಿರುವ ಹಾಗೂ ಕಲಾಪ್ರದರ್ಶನದ ಮೂಲಕ ಪ್ರಚುರ ಪಡಿಸುತ್ತಿರುವ ಕಲಾವಿದ ಜನಾರ್ದನ್​ ಹಾವಂಜೆ ಅವರ ಶ್ರಮ ಶ್ಲಾಘನೀಯ ಎಂದು ಡನ್​ ಆ್ಯಂಡ್​ ಪಾರ್ಟ್​ನರ್ಸ್​ನ ಸಂಸ್ಥಾಪಕ ಅರವಿಂದ ಹೆಗಡೆ ಸಂತಸ ವ್ಯಕ್ತಪಡಿಸಿದರು.

ಬೆಂಗಳೂರು ಜಯನಗರದ ಯುವಕ ಸಂಘದ ಆರ್ಟ್​ ಗ್ಯಾಲರಿಯಲ್ಲಿ ಕಾವಿ ಆರ್ಟ್​ ಫೌಂಡೇಷನ್​ ಹಾಗೂ ಭಾಸ ಗ್ಯಾಲರಿ ಮತ್ತು ಸ್ಟುಡಿಯೋ ಆಶ್ರಯದಲ್ಲಿ ಇತ್ತೀಚೆಗೆ ಉಡುಪಿಯ ಕಲಾವಿದ ಡಾ.ಜನಾರ್ದನ್​ ರಾವ್​ ಹಾವಂಜೆ ಅವರ ಕಾವ್ಯ ರೇಖಾಕಾವಿ ಕಲೆಯ ಏಕವ್ಯಕ್ತಿ ಕಲಾಪ್ರದರ್ಶನ ಉದ್ಘಾಟಿಸಿ ಮಾತನಾಡಿದರು.

ಚಿತ್ತಾಕರ್ಷಕ ಕಲೆ ಉಳಿಸೋಣ

ನನ್ನ ಬಾಲ್ಯದ ದಿನಗಳಲ್ಲಿ ಶಿರಸಿಯಲ್ಲಿರುವಾಗ ಪುರಾತನ ಕಟ್ಟಡಗಳಲ್ಲಿ, ದೇಗುಲಗಳಲ್ಲಿ, ವಠಾರಗಳಲ್ಲಿ ಈ ಕಾವಿ ಕಲೆಯನ್ನು ನೋಡುತ್ತಿದ್ದೆ. ಅಂದಿನ ನೆನಪು ಇಂದು ಹಸಿರಾಯಿತು. ಅಂದು ಈ ಕಲೆಯ ಮಹತ್ವ ತಿಳಿದಿರಲಿಲ್ಲ. ಆದರೆ, ವರ್ಣಿಸಲು ಅಸಾಧ್ಯವಾದ ಹಾಗೂ ಚಿತ್ತಾಕರ್ಷಕ ಈ ಕಲೆಯ ಉಳಿವು ಆಗಲೇಬೇಕೆಂದು ಆಶಿಸುತ್ತೇನೆ ಎಂದರು.

ಪ್ರದರ್ಶನದಲ್ಲಿ 60ಕ್ಕೂ ಹೆಚ್ಚು ಕಲಾಕೃತಿ

ಯುವಕ ಸಂಘದ ಯೋಜನಾ ನಿರ್ದೇಶಕ ಮಹೇಶ್​, ಕಾವಿ ಆರ್ಟ್​ ಫೌಂಡೇಷನ್​ನ ನಿರ್ದೇಶಕಿ ಬೇಬಿ ಎಂ. ರಾವ್​ ಉಪಸ್ಥಿತರಿದ್ದರು.

ಬೆಂಗಳೂರು ಕಲಾ ಗ್ಯಾಲರಿಯ ಸಂಯೋಜಕ ಶಿವಪ್ರಸಾದ್​ ಕಾರ್ಯಕ್ರಮ ನಿರೂಪಿಸಿದರು.