ಗುರುವಾರ ಗ್ರಾಪಂ ಕಚೇರಿಗೆ ಆಗಮಿಸಿದ ಮೆಂದಾರೆ ಗ್ರಾಮದ 12 ಜನರಿಗೆ ಅಗತ್ಯ ದಾಖಲೆ ಹಾಗೂ ಕುಟುಂಬಸ್ಥರ ವಿವರವನ್ನು ಪಡೆದು ಜಾಬ್ ಕಾರ್ಡ್ ನವೀಕರಣ ಮಾಡಿಕೊಡಲಾಯಿತು. ಜತೆಗೆ ಇಬ್ಬರಿಗೆ ಹೊಸ ಜಾಬ್ ಕಾರ್ಡ್ ನೀಡಲಾಯಿತು. ಕೂಲಿ ಕೆಲಸಕ್ಕೆ ಆಗಮಿಸುವಂತೆ ಸಲಹೆ ನೀಡಲಾಯಿತು.
ಗಿರಿಜನ ಹಿರಿಯ ಮುಖಂಡ ಮಾದಯ್ಯ ಮಾತನಾಡಿ, ಇಂಡಿಗನತ್ತ ಘಟನೆಯ ಬಳಿಕ ಜಮೀನುಗಳಿಗೆ ಕೂಲಿ ಕೆಲಸಕ್ಕಾಗಿ ಹೋಗುತ್ತಿರಲಿಲ್ಲ. ಇದರಿಂದ ಜೀವನ ನಡೆಸಲು ತುಂಬಾ ತೊಂದರೆಯಾಗಿತ್ತು. ಇದೀಗ ಗ್ರಾಪಂ ವತಿಯಿಂದ ನರೇಗಾ ಯೋಜನೆಯಡಿ ಕೆರೆ-ಕಟ್ಟೆಗಳಲ್ಲಿ ಕೂಲಿ ಮಾಡುವ ಕೆಲಸ ನೀಡಲು ಭರವಸೆ ನೀಡಿದ್ದು, ಜಾಬ್ ಕಾರ್ಡ್ಗಳನ್ನು ನವೀಕರಣ ಮಾಡಿಕೊಟ್ಟಿದ್ದಾರೆ. ಹೀಗಾಗಿ ಪಂಚಾಯಿತಿ ವತಿಯಿಂದ ನೀಡುವ ಕೂಲಿ ಕೆಲಸಕ್ಕೆ ಗ್ರಾಮಸ್ಥರು ಹೋಗಲು ನಿರ್ಧರಿಸಿದ್ದೇವೆ ಎಂದು ತಿಳಿಸಿದರು.
