ಜ್ಞಾನ ಮಂಡಲೋತ್ಸವದ ಸಭೆಯಲ್ಲಿ ಹಿಂದು ಧಾರ್ಮಿಕ ಶ್ರದ್ಧಾ ಕೇಂದ್ರ-ರಾಜಕೀಯ ಹಸ್ತಕ್ಷೇಪ ಕುರಿತು ಸುವರ್ಣ ವಾಹಿನಿಯ ಸಂಪಾದಕ ಅಜಿತ್ ಹನುಮಕ್ಕನವರ್ ಉಪನ್ಯಾಸ ನೀಡಿದರು. ಚಾಮುಂಡಿ ಬೆಟ್ಟ ಹಿಂದುಗಳದ್ದಲ್ಲ ಎಂಬ ಫರ್ಮಾನು ಹೊರಡಿಸಲಾಗಿದೆ. ನಿನ್ನೆ ಇಲ್ಲಿಗೆ ಡಿಸಿಎಂ ಡಿ.ಕೆ. ಶಿವಕುಮಾರ ಬಂದಿದ್ದರು. ಅವರ ಬಳಿ ಉಡುಪಿ ಮಠ ಯಾರಿಗೆ ಸೇರಿದ್ದು ಎಂದು ಪ್ರಶ್ನಿಸಬೇಕಿತ್ತು. ಕಳೆದುಕೊಂಡಿದ್ದ ಅಯೋಧ್ಯೆಯನ್ನು ಮರಳಿ ಪಡೆಯಲು 497 ವರ್ಷ ಹೋರಾಡಬೇಕಾಯಿತು. ಆದರೆ, ಈಗಿರುವ ನಮ್ಮ ಸ್ವತ್ತು, ಸಂಸ್ಕೃತಿ ಉಳಿಸಿಕೊಳ್ಳುವುದು ಹೇಗೆ? ಅದಕ್ಕೆ ನಾವೇನು ಮಾಡಬೇಕು ಎಂಬ ಚಿಂತನೆ ಬೇಕಿದೆ. ನಮ್ಮ ಮನಸ್ಸಿನೊಳಗಿರುವ ಮೂರ್ತಿ ಒಡೆಯುವ ಪ್ರಯತ್ನ ಈಗ ನಡೆದಿದೆ. ಅದಕ್ಕೆ ಧರ್ಮಸ್ಥಳ ಪ್ರಕರಣ ಸಾಕ್ಷಿ. ಜನರ ಮನಸ್ಸೊಡೆಯುವ ಕಾರ್ಯಕ್ಕೆ 13 ವರ್ಷ ಬೇಕಾಯಿತು. ಎಡಪಂಥೀಯರಿಗೆ ನಿರ್ದಿಷ್ಟ ಗುರಿ ಇದೆ. ಧರ್ಮ ಅಂದರೆ ಅಫೀಮು ಎಂಬ ಸ್ಪಷ್ಟತೆ ಅವರಿಗಿದೆ. ಆದರೆ, ನಮ್ಮ ಗುರಿ ಏನು? ಗಾಳಿ ಬೀಸಿದೆಡೆ ಸಾಗುವುದು ನಮ್ಮ ಜೀವನದ ಗುರಿಯೇ? ಯಾವನೋ ಒಬ್ಬ ಬಂದು ಎಐ ವಿಡಿಯೋ ಮಾಡಿ, ತರ್ಕಕ್ಕೆ ನಿಲುಕದ ವಿಷಯ ಹೇಳಿದಾಗ ಎಲ್ಲರೂ ಸತ್ಯ ಎಂದು ನಂಬಿದೆವಲ್ಲ? ಆತ ಹೇಳಿದ್ದು ಹಸಿ ಸುಳ್ಳು ಎಂಬ ಆಲೋಚನಾ ಶಕ್ತಿ ಸಮಾಜಕ್ಕೆ ಇಲ್ಲದಾಯಿತಲ್ಲ? ಚಿಕಿತ್ಸಕ ಬುದ್ಧಿ ಕಳೆದುಕೊಂಡ ಸಮಾಜ ದುಷ್ಪ್ರಚಾರಕ್ಕೆ ಬಲಿಯಾಯಿತಲ್ಲ? ಹೀಗಾಗಿ ನಮ್ಮ ಶಕ್ತಿ ಏನೆಂದು ತಿಳಿಸಲು ರಾಮಾಯಣದಲ್ಲಿ ಸೀತಾನ್ವೇಷಣೆಗಾಗಿ ಸಮುದ್ರ ಹಾರಲು ಆಗದೆ ಚಿಂತಾಕ್ರಾಂತನಾಗಿ ಕುಳಿತಿದ್ದ ಹನುಮಿಗೆ ಆತನ ಶಕ್ತಿ ಕುರಿತು ಜಾಗೃತಿ ಮೂಡಿಸಿದ ಜಾಂಬವಂತನ ರೀತಿಯವರು ಬರಬೇಕು ಎಂದು ಹನುಮಕ್ಕನವರ್ ವಿವರಿಸಿದರು.
