ಜಯದೇವ ಫ್ಲೈಓವರ್ ತೆರವು ನಾಳೆ ಆರಂಭ

ಬೆಂಗಳೂರು: ಮೆಟ್ರೋ ಇಂಟರ್​ಚೇಂಜ್ ನಿಲ್ದಾಣಕ್ಕಾಗಿ ಅರ್ಧಕ್ಕೆ ಸ್ಥಗಿತಗೊಂಡಿದ್ದ ಜಯದೇವ ಮೇಲ್ಸೇತುವೆಯ ಲೂಪ್ ತೆರವು ಕಾಮಗಾರಿ ಗುರುವಾರ ಆರಂಭವಾಗುತ್ತಿದೆ.

ಮೆಟ್ರೋ 2ನೇ ಹಂತದ ಯೋಜನೆಯಲ್ಲಿ ಆರ್.ವಿ. ರಸ್ತೆ- ಬೊಮ್ಮಸಂದ್ರ ಹಾಗೂ ಗೊಟ್ಟಿಗೆರೆ- ನಾಗವಾರ ಮಾರ್ಗಗಳ ಇಂಟರ್ಚೇಂಜ್ ನಿಲ್ದಾಣ ಜಯದೇವ ಆಸ್ಪತ್ರೆ ಬಳಿ ನಿರ್ಮಾಣ ವಾಗಲಿದೆ. ಅದಕ್ಕಾಗಿ ಜಯದೇವ ಆಸ್ಪತ್ರೆ ಎದುರಿನ ಮೇಲ್ಸೇತುವೆ ತೆರವು ಮಾಡಲಾಗುತ್ತಿದೆ. ಎರಡು ಹಂತದಲ್ಲಿ ತೆರವು ಕಾಮಗಾರಿ ಕೈಗೆತ್ತಿಕೊಳ್ಳಲಾಗಿದೆ. ಮೊದಲಿಗೆ ಮೇಲ್ಸೇತುವೆಯ ಒಂದು ಭಾಗವಾದ 150 ಮೀ¬ಟರ್ ಉದ್ದದ ಲೂಪ್ ತೆರವು ಕಾಮಗಾರಿ ಕೈಗೊಳ್ಳಲಾಗಿತ್ತು. ಇದೀಗ ಉಳಿದ ಮೇಲ್ಸೇತುವೆ ಭಾಗ ವನ್ನು ಗುರುವಾರದಿಂದ ತೆರವು ಮಾಡಲಾಗುತ್ತದೆ.

ರಾತ್ರಿಯಲ್ಲಿ ಕಾರ್ಯಾಚರಣೆ: ಮೂರು ತಿಂಗಳವರೆಗೆ ರಾತ್ರಿ 10ರಿಂದ ಬೆಳಗ್ಗೆ 6ರವರೆಗೆ ನಡೆಸಲಾಗುತ್ತದೆ. ಉಳಿದ ಸಮಯದಲ್ಲಿ ವಾಹನ ಸಂಚಾರವಿರಲಿದೆ.

ಸಂಚಾರದಟ್ಟಣೆ ಹೆಚ್ಚಳ: ಬನಶಂಕರಿಯಿಂದ ಸಿಲ್ಕ್ ಬೋರ್ಡ್ ಕಡೆಗೆ ತೆರಳುವ ವಾಹನಗಳು ಪರ್ಯಾಯ ಮಾರ್ಗ ಹುಡುಕಿಕೊಳ್ಳಬೇಕಿದೆ. ಹೀಗಾಗಿ ಆ ಮಾರ್ಗದಲ್ಲಿ ಸಂಚಾರ ದಟ್ಟಣೆ ಮತ್ತಷ್ಟು ಹೆಚ್ಚಲಿದೆ.

ಮಾರ್ಗ ಬದಲು: ಮೇಲ್ಸೇತುವೆ ತೆರವಿನಿಂದಾಗಿ ವಾಹನ ಸಂಚಾರಕ್ಕೆ ಬದಲಿ ಮಾರ್ಗ ನಿಗದಿ ಮಾಡಲಾಗುತ್ತಿದೆ. ಸಿಲ್ಕ್​ಬೋರ್ಡ್ ಕಡೆಗೆ ತೆರಳುವ ವಾಹನಗಳು ರಾಘವೇಂದ್ರ ಮಠದ ಬಳಿ ಎಡ ತಿರುವು ಪಡೆಯಬೇಕಿದೆ. ಸಿಲ್ಕ್​ಬೋರ್ಡ್ ಕಡೆಯಿಂದ ಜಯನಗರ, ಬನಶಂಕರಿ ಕಡೆಗೆ ತೆರಳುವ ವಾಹನಗಳು ಅಕ್ಸಾ ಸಿಗ್ನಲ್ (ಮಡಿವಾಳ ಕೆರೆ ಬಳಿ)ನಲ್ಲಿ ಬಲ ತಿರುವು ಪಡೆದು ಸಾಗಬೇಕಿದೆ.

ಒಂದರ ಮೇಲೊಂದು ಮಾರ್ಗ

ಜಯದೇವ ಆಸ್ಪತ್ರೆಯ ಜಂಕ್ಷನ್​ನಲ್ಲಿ 70 ಅಡಿ ಎತ್ತರದಲ್ಲಿ ಗೊಟ್ಟಿಗೆರೆ-ನಾಗವಾರ ಮಾರ್ಗದ ನಿಲ್ದಾಣ ಬರಲಿದೆ. ಕೆಳಗೆ ಆರ್.ವಿ. ರಸ್ತೆ- ಬೊಮ್ಮಸಂದ್ರ ನಿಲ್ದಾಣ ಹಾಗೂ ಅದರ ಕೆಳಗೆ ಹೊಸ ಮೇಲ್ಸೇತುವೆ ನಿರ್ವಣವಾಗಲಿದೆ.