ಕಳೆಗಟ್ಟಿದ ಶಂಭುಲಿಂಗೇಶ್ವರ ಸ್ವಾಮಿ ದನಗಳ ಜಾತ್ರೆ ; ಹಳ್ಳಿಕಾರು ರಾಸುಗಳ ಆಕರ್ಷಣೆ

ತುರುವೇಕೆರೆ : ಕಳೆದರೆಡು ವರ್ಷಗಳಿಂದ ಕರೊನಾ ಹೊಡೆತದಿಂದ ಕಳೆಗುಂದಿದ್ದ ಪುರ ಗ್ರಾಮದ ಶ್ರೀ ಶಂಭುಲಿಂಗೇಶ್ವರ ಸ್ವಾಮಿ ದನಗಳ ಜಾತ್ರೆ ಈ ಬಾರಿ ಆಕರ್ಷಕ ಹಳ್ಳಿಕಾರು ರಾಸುಗಳಿಂದ ಕಳೆಗಟ್ಟಿದೆ. ಗ್ರಾಮೀಣ ಸೊಗಡು ಬಿಂಬಿಸುವ ಈ ಜಾತ್ರೆ ಜ.5ರಂದು ಶುರುವಾಗಿದ್ದು, ಸಂಕ್ರಾಂತಿ ಹಬ್ಬದ ದಿನದಂದು ಶಂಭುಲಿಂಗೇಶ್ವರ ಸ್ವಾಮಿ ರಥೋತ್ಸವದೊಂದಿಗೆ ಸಂಪನ್ನಗೊಳ್ಳಲಿದೆ, ಜನಗಳಿಲ್ಲದೆ ಇರುವುದರಿಂದ ಜಾತ್ರೆ ಈ ಬಾರಿ ಸಪ್ಪೆ ಎನಿಸಲಿದೆ.

ಶನಿವಾರ, ಭಾನುವಾರ ವೀಕೆಂಡ್ ಕರ್ಪೂ ಹಿನ್ನೆಲೆಯಲ್ಲಿ ಜಾತ್ರೆ ನಡೆಯುವ ಸಾಧ್ಯತೆ ಕಡಿಮೆ ಎಂದು ರೈತರು ಆತಂಕದಲ್ಲಿದ್ದರು. ಆದರೆ ಜಾತ್ರೆ ಕಮಿಟಿ ಮುಂಜಾಗ್ರಾತ ಕ್ರಮದೊಂದಿಗೆ ಕರೊನಾ ನಿಯಮ ಪಾಲಿಸಿ ಜಾತ್ರೆ ನಡೆಸಲು ಅನುವು ಮಾಡಿಕೊಟ್ಟಿದೆ. ಕರೊನಾ ಮಾರ್ಗಸೂಚಿಯಂತೆ ಶಂಭುಲಿಂಗೇಶ್ವರ ಸ್ವಾಮಿಗೆ ಬೆಳಗ್ಗೆ, ಸಂಜೆ ಪೂಜೆ ನಡೆಯುತ್ತಿದ್ದು, ನಂತರ ದೇವಸ್ಥಾನಕ್ಕೆ ಬೀಗ ಹಾಕಲಾಗುತ್ತದೆ, ದೇವರ ದರ್ಶನ ಹಾಗೂ ಪೂಜೆ ಅವಕಾಶ ಇರುವುದಿಲ್ಲ. ಈ ವರ್ಷ ದೇವಸ್ಥಾನದ ಆವರಣದಲ್ಲಿ ಬೃಹತ್ ಶಿವನಮೂರ್ತಿ ನಿರ್ಮಿಸಲಾಗಿದ್ದು, ಆಕರ್ಷಣೆಯಾಗಿದೆ.

ತುಮಕೂರು, ಮಂಡ್ಯ, ದೊಡ್ಡಬಳ್ಳಾಪುರ, ಕೋಲಾರ, ಚಿತ್ರದುರ್ಗ, ಹಾವೇರಿ, ದಾವಣಗೆರೆ ಸೇರಿ ಅನೇಕ ಜಿಲ್ಲೆಗಳಿಂದ ರೈತರು ಜಾತ್ರೆಗೆ ಬರುತ್ತಿದ್ದಾರೆ. ಪ್ರತಿ ನಿತ್ಯ ರಾಸುಗಳು ಜಾತ್ರೆಗೆ ಆಗಮಿಸುತ್ತಿವೆ. ಜಾತ್ರೆಯಲ್ಲಿ ಸಿಹಿ ತಿಂಡಿ ಅಂಗಡಿಗಳು, ಸಸ್ಯಹಾರಿ ಹಾಗೂ ಮಾಂಸಹಾರಿ ಹೋಟಲ್‌ಗಳು ಇವೆ. ಜಾತ್ರೆಯಲ್ಲಿ ಕರಕುಶಲ ವಸ್ತುಗಳು, ಕೃಷಿ ಉಪಕರಣಗಳ ಪ್ರದರ್ಶನ ಮಾರಾಟವಿರುತ್ತದೆ, ಅಲ್ಲದೆ ಉತ್ತಮ ರಾಸುಗಳನ್ನು ಜಾತ್ರೆಯಲ್ಲಿ ಮೆರವಣಿಗೆ ನಡೆಸಿ ಬಹುಮಾನಗಳನ್ನು ನೀಡಿ ಗೌರವಿಸಲಾಗುವುದು.

ದುಬಾರಿ ಬೆಲೆಯ ದನಗಳು : ದೇಶಿ ಹಸುಗಳು, ನಾಟಿ ದನಗಳು, ಹಳ್ಳಿಕಾರ್ ದನಗಳು ಹೆಚ್ಚು ಮಾರಾಟಕ್ಕೆ ಪ್ರಸಿದ್ಧಿ ಹೊಂದಿದ್ದು, ರಾಸುಗಳ ಮಾರಾಟ ಖರೀದಿ ಸುಮಾರು 20 ಸಾವಿರದಿಂದ 3 ಲಕ್ಷ ರೂಪಾಯಿವರೆಗೆ ನಡೆಯುತ್ತದೆ. ಕೆಲವು ರೈತರು ದನಗಳ ಬಗ್ಗೆ ಹೆಚ್ಚು ಅಕ್ಕರೆ ಇರುವವರು ಶಾಮಿಯಾನ ಹಾಕಿಸಿಕೊಂಡು ಪ್ರತಿ ದಿನ ಶೃಂಗರಿಸಿ ನಿತ್ಯ ಬೆಳಗ್ಗೆ ಸಂಜೆ ರೆವೆಬೂಸ, ಇಂಡಿ, ಬೆಣ್ಣೆ, ತುಪ್ಪ ತಿನ್ನಿಸಿ ಹೆಚ್ಚು ಆರೈಕೆ ಮಾಡಿ ನೋಡಿಕೊಳ್ಳತ್ತಾರೆ.