ನಗರದ ಬೀಡಿ ಕಾರ್ವಿುಕರ ಕಾಲನಿ ನಿವಾಸಿ ರೆಹಾನಾಬಾನು ಕೆಲ ವರ್ಷದ ಹಿಂದೆ ರಾಷ್ಟ್ರೀಕೃತ ಬ್ಯಾಂಕೊಂದರಲ್ಲಿ ಜನ್ಧನ್ ಖಾತೆ ತೆರೆದಿದ್ದರು. 2019ರ ಡಿಸೆಂಬರ್ 2ರ ಸಂಜೆ ಅವರ ಮನೆಗೆ ಬಂದ ಬ್ಯಾಂಕ್ ಸಿಬ್ಬಂದಿಯೊಬ್ಬರು ನಿಮ್ಮ ಖಾತೆಗೆ ಹಣ ಬಂದಿದೆ. ಆಧಾರ್ ಕಾರ್ಡ್ ತೆಗೆದುಕೊಂಡು ಬ್ಯಾಂಕಿಗೆ ಬನ್ನಿ ಎಂದಿದ್ದರು. ಆಶ್ಚರ್ಯಗೊಂಡ ಅವರು ಪತಿಯೊಂದಿಗೆ ಬ್ಯಾಂಕಿಗೆ ಹೋದಾಗ ವ್ಯವಸ್ಥಾಪಕರು ಫಾರಂ ಒಂದಕ್ಕೆ ಸಹಿ ಮಾಡಿಸಿಕೊಂಡು ಕಳುಹಿಸಿದ್ದಾರೆ. ಅನುಮಾನಗೊಂಡ ದಂಪತಿ ಡಿ.5ರಂದು ಬ್ಯಾಂಕ್ ವ್ಯವಸ್ಥಾಪಕರಿಗೆ ಸೂಕ್ತ ದಾಖಲೆ ನೀಡುವಂತೆ ತಿಳಿಸಿದರಾದರೂ ಅವರಿಂದ ಮಾಹಿತಿ ಬಂದಿಲ್ಲ. ಅಂದು ಸಂಜೆ ಬ್ಯಾಲೆನ್ಸ್ ಪರಿಶೀಲಿಸಿದಾಗ 29,99,74,084 ರೂ. ಇರುವುದು ತಿಳಿದು ಬಂದಿದೆ. ಬ್ಯಾಂಕಿಗೆ ಅಲೆದಾಡಿದ ರೆಹಾನಾಬಾನು ಮತ್ತು ಪತಿ ಜ.9ರಂದು ನಗರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಪೊಲೀಸರು ತನಿಖೆ ನಡೆಸುತ್ತಿದ್ದು, ಖಾತೆಯಲ್ಲಿ ವಹಿವಾಟು ನಡೆಸದಂತೆ ನಿರ್ಬಂಧ ಹೇರಲಾಗಿದೆ.
